რის გაკეთებას აპირებს პროკურორად დანიშვნის შემთხვევაში, დაიწყება თუ არა “წმენდა” პროკურატურაში, ამ და სხვა საკითხებზე “გურია ნიუსი” პაატა შავაძეს ესაუბრა.
_ ბატონო პაატა, ვინ დაასახელა თქვენი კანდიდატურა ამ თანამდებობაზე და როდის დაიწყო თქვენთან მოლაპარაკებები?
_ ნება მომეცით, ეს არ გავამხილო და ჯერჯერობით საჯარო არ გავხადო. ვფიქრობ, ის უფრო საინტერესოა, რისი გაკეთება შეგვიძლია, ვიდრე ის, ვისი კანდიდატურები განიხილება და ვინ დაგვასახელა. დანარჩენი, იცით, რომ ხელმძღვანელობის გადასაწყვეტია. შემიძლია გითხრათ, რომ უკვე ვამზადებ ჩემს პროგრამას, როგორ უნდა იმუშაოს მთავარმა პროკურორმა. თუკი ჩემზე იქნება შეჩერებული არჩევანი, მაქვს ჩემი მუშაობის სტრატეგია. მთავარი პროკურატურა სტრატეგიულად მნიშვნელოვანი სამართალდამცავი ორგანოა და მიმაჩნია, რომ ის რადიკალურად უნდა გარდაიქმნას და მხოლოდ ხალხის სამსახურში უნდა ჩადგეს. პროკურატურა უნდა იყოს მზად, რომ ყველაფერი კანონის შესაბამისად გააკეთოს. დანარჩენი, ხელმძღვანელობის გადასაწყვეტია. მე მზადყოფნას გამოვთქვამ და ვდებ პირობას, რომ ეს უწყება სამაგალითო იქნება. მიმაჩნია, რომ ჩემი სახით მთავარი პროკურორი იქნება ის პიროვნება, რომელსაც საზოგადოება ითხოვს.
_ როგორც ვიცით, კიდევ ერთი კანდიდატურაა დასახელებული ამ თანამდებობაზე. ბატონი კახი კახიშვილი…
_ მაქვს ეს ინფორმაცია და მივესალმები ბატონი კახის კანდიდატურასაც. თუკი მასზე შეჩერდება არჩევანი, ვფიქრობ, რომ ის არის ღირსეული ადამიანი და ნამდვილად დაძლევს იმ გამოწვევებს და სირთულეებს, რაც ამ უწყების წინაშე დგას. თუკი მასზე შეჩერდება ხელისუფლების მხრიდან არჩევანი, კახიშვილის სახით ნამდვილად ღირსეული მთავარი პროკურორი გვეყოლება. სხვა კანდიდატურების შესახებ ჩემთვის ცნობილი არ არის და მათზე არანაირი ინფორმაცია არა მაქვს. დადგა დრო, მთავარ პროკურატურაში ხელმძღვანელ პოსტებზე მივლენილ იქნან სრული ამ სიტყვის მნიშვნელობით არა ბანდიტები, კაცთა მწვალებლები და არასამართლებრივი პოლიტიკის მიმდევრები, არამედ, პირველ რიგში ადამიანური მიდგომების მქონე პროკურორები. შემდგომ თუკი ეს მიდგომები დაინერგება, მივაღწევთ იმ მთავარ მიზანს, რასაც სამართლიანობის აღდგენა ჰქვია. არაადამიანი
_ ბატონო პაატა, ყოველთვის გქონდათ შენიშვნები მთავარი პროკურატურის მუშაობასთან დაკავშირებით. რას გვეტყვით, ყოფილ მთავარ პროკურორებზე? რა შეცდომები დაუშვეს მათ?
_ არჩილ კბილაშვილი ჩემი მეგობარი და კოლეგაა. ღირსეული ადამიანია, თუმცა რატომღაც უუნარო პროკურორი დაარქვეს, რასაც არასდროს ვეთანხმებოდი და არც ახლა დავეთანხმები. მთავარი პროკურორი არის ის თანამდებობის პირი, რომელსაც უნდა მიეცეს უფლება, რომ უწყება სრულფასოვნად მართოს. თუკი არ იქნება პოლიტიკური ნება, რომ მთავარმა პროკურორმა იმუშაოს და ის ფუნქციები შეასრულოს, რაც ევალება, მაშინ ვინც არ უნდა იყოს პროკურორი, უუნარო იქნება.
_ თქვენ ამბობთ, რომ არჩილ კბილაშვილს არ ჰქონდა უფლებამოსილება მინიჭებული, რომ მას თავისი საქმიანობა სრულფასოვნად შეესრულებინა?
_ მე ამას არ ვიტყვი, მაგრამ ერთი რამ შემიძლია ვთქვა, არჩილ კბილაშვილის სახით საქართველოს არ ჰყავდა უუნარო მთავარი პროკურორი. რაც შეეხება ოთარ ფარცხალაძეს, არაერთხელ დავგმე მისი მოქმედებები. ეს პიროვნება ქართულ სამართლებრივ სივრცეში საერთოდ ვერ ჯდებოდა. მადლობა ღმერთს, რომ ის მივიდა გადაწყვეტილებამდე თანამდებობიდან წასულიყო. მან სტრუქტურა ჩაკეტა და მედიისთვის, არასამთავრობო სექტორისთვის ეს უწყება მიუწვდომელი გახადა, რაც აბსოლუტრად მიუღებელია. თუკი ჩემზე შეჩერდება არჩევანი, კვირაში ერთ დღეს გამოვყოფ მედიასაშუალებებისთვის და მთლიანად გახსნილი ვიქნები. ჩავაბარებ კვირის ანგარიშს. ეს უწყება თითოეული მოქალაქისთვის იქნება ხელმისაწვდომი და ყველა პროკურორს დაევალება მოქალაქეების მოსმენა. უწყება არ უნდა ჩაიკეტოს, როგორც ეს ფარცხალაძემ და აჭარის მთავარმა პროკურორმა ტყეშელაშვილმა გააკეთეს. მე რომ ტყეშელაშვილის ადგილზე ვყოფილიყავი და ფარცხალაძეს დაევალებინა უწყების ჩაკეტვა, მაინც არ ჩავკეტავდი, არც საზოგადოების მიღების დღეს გავაუქმებდი და მედიასაშუალებებისთვისაც მექნებოდა მზად საპასუხო კომენტარი. არ შეიძლება, პროკურორი მონა იყოს. რა თქმა უნდა, ხელისუფლების პოლიტიკა უნდა გაატარო, მაგრამ საკუთარი “მე” და ფუნქცია უნდა გქონდეს. ძალიან საინტერესო პროგრამა გვაქვს და თუკი იქნება დაინტერესება, ამის პრეზენტაციასაც გავაკეთებთ. ვდებ პირობას, რომ მთავარი პროკურატურა იქნება საზოგადოებისთვის მისაღები და შეძლებს იმ მისიის შესრულებას, რასაც სამართლიანობის აღდგენა ჰქვია.
_ დანიშვნის შემთხვევაში აპირებთ თუ არა უწყებაში რეორგანიზაციას?
_ რა თქმა უნდა, იქნება საკადრო ცვლილებები. ყველა იმ პროკურორზე, რომლებზეც საჩივრებია მოქალაქეთა მხრიდან და უკავშირდება შესაძლო კანონსაწინააღმდეგო ქმედებებს, მივცემ შესაბამის სტრუქტურულ ერთეულებს დავალებებს, რომ საქმეები უმკაცრესად განიხილონ. ყველა იმ “გამოცდილ” პროკურორს, რომლებსაც 9 წლის მანძილზე ადამიანის ტანჯვა-წამების, უკანონო გადაწყვეტილების მიღების და ასევე უკანონო სისხლის სამართლის პასუხისგებაში მიცემის მეტი არაფერი უკეთებიათ, მინიმუმ სახლში მივაბრძანებ, მაქსიმუმ სისხლის სამართლის პასუხისგებაში მივცემ. სადამდეც მიგვიყვანა მათმა “პროფესიონალიზმმა”, კარგად ვიცით. მიხეილ სააკაშვილს და ზურაბ ადეიშვილს სჭირდებოდათ ეს “პროფესიონალები”. ჩვენ, პირველ რიგში, ადამიანები გვჭირდება. არის ძალიან ბევრი კარგი და პროფესიონალი იურისტი, ახალი ხედვებით და რეალობებით, ამ ადამიანებს დავასაქმებთ კონკურსების, გასაუბრებების და რეკომენდაციების საფუძველზე. საქართველოს პროკურატურა ჩამოყალიბდება ახალგაზრდა, ნიჭიერი კადრებით, რომლებიც არ იქნებიან რეპუტაციაშელახულები. საზოგადოებას პროკურატურის არ უნდა ეშინოდეს. ის უნდა წარმოგვედგინოს სამართლიანობის ქვაკუთხედად. ვდებ იმის პირობას, რომ თუკი მე გავხდები მთავარი პროკურორი, პირველი წუთიდანვე გატარდება “ქართული ოცნების” ის პოლიტიკა, რასაც სამართლიანობის აღდგენა ჰქვია. ჩვენ ამის ვალდებულება ავიღეთ.
_ როდის უნდა ელოდოს საზოგადოება მთავარი პროკურორის დასახელებას?
_ ეს უკვე პრემიერ-მინისტრის გადასაწყვეტია. ზუსტი თარიღი ჩემთვის ცნობილი არ არის.
