დაბა ჩოხატაურის წყლისა და კანალიზაციის სისტემების რეაბილიტაციისთვის, მუნიციპალური განვითარების ფონდმა 3 მილიონი ლარი უკვე გამოყო. სამუშაოების ორი ეტაპი დასრულდა, რამდენიმეჯერ ნაციონალური მაუწყებლების საშუალებით გაპიარდა კიდეც, თუმცა, ამ დრომდე, ჩოხატაურს დაპირებული უწყვეტი წყალი ახალი წყალსადენით არ მიეწოდება.
მუნიციპალური განვითარების ფონდში ამბობენ, რომ უწყვეტი წყალმომარაგებისთვის სამუშაოების მესამე ეტაპი უნდა დაიწყოს, რომლისთვის საჭირო თანხა უკვე გამოყოფილია:
_ გაკეთებულია მესამე ეტაპის პროექტი და რამდენიმე დღეში სამუშაოების ჩასატარებლად ტენდერს გამოვაცხადებთ, _ განგვიმარტეს მგფ-ის პრესამსახურში.
გაერთიანებული წყალმომარაგების კომპანიაში ამბობენ, რომ ჩოხატაურს უწყვეტი წყალმომარაგება 2012 წლიდან ექნება:
_ ჩოხატაურის წყალმომარაგებისა და კანალიზაციის სისტემის სარეაბილიტაციო სამუშაოების პირველ ეტაპზე მოეწყო წყლის სათავე ნაგებობა, მეორე ეტაპზე გაკეთდა წყალსადენის მილების მაგისტრალური ქსელი. ახლა იწყება მესამე ეტაპი, რომელიც გულისხმობს მთლიან დაქსელვას, რომლის დასრულების შემდეგ, დაბა ჩოხატაურს უწყვეტი წყალმომარაგება ექნება, _ აღნიშნა ჩვენთან საუბრისას გაერთიანებული წყალმომარაგების კომპანიის პიარ მენეჯერმა ჯილდა მაჭავარიანმა.
მისივე თქმით, დაქსელვითი სამუშაოები რამდენიმე თვეს გასტანს:
_ შემიძლია დაზუსტებით გითხრათ, რომ დაბა ჩოხატაურს, წყალი 24-საათიანი რეჟიმით 2012 წლიდან მიეწოდება. ამ ეტაპზე, დაბა ჩოხატაურის 20 პროცენტი მარაგდება ახალი წყალსადენით, თუმცა, როგორც გითხარით, სრული მომარაგება მომავალი წლის დასაწყისიდან იქნება, _ გვითხრა მაჭავარიანმა.
“დაბა ჩოხატაურის მოსახლეობას 24-საათიანი წყალმომარაგება ექნება. სარეაბილიტაციო სამუშაოების დაწყებამდე, რაიონს წყალმომარაგების სერიოზული პრობლემა ჰქონდა. აღნიშნული პროექტის დასრულების შემდეგ კი წყალი უწყვეტ რეჟიმში მიეწოდება როგორც ჩოხატაურს, ასევე სოფელ ჩაისუბანსა და მის მიმდებარე დასახლებებს,” _ ეს ინფორმაცია მუნიციპალური განვითარების ფონდის ფეისბუქის ოფიციალურ გვერდზე დევს.
ჩვენ ხელთ არსებული ინფორმაციით კი, სოფელ ჩაისუბანს, სადაც აუზი და საქლორატორო მდებარეობს, წყალი იმ მარტივი მიზეზის გამო არ ექნება, რომ სოფლის დაქსელვა პროექტში არ შედის.
გაერთიანებული წყალმომარაგების კომპანიაში ამ ინფორმაციას არც უარყოფენ და არც ადასტურებენ:
_ ჯერჯერობით, დაზუსტებით ვერ გეტყვით შედის თუ არა მესამე ეტაპში ჩაისუბნის დაქსელვაც, რადგან ტენდერი ნაწილ-ნაწილ ცხადდება. სავარაუდოდ, უწყვეტი წყალმომარაგება ჩაისუბანსაც ექნება. უფრო დარწმუნებით პასუხის თქმა მას შემდეგ შეგვეძლება, რაც ტენდერები დაზუსტება, _ აღნიშნეს გაერთიანებული წყალმომარაგების კომპანიაში.
აღსანიშნავია ისიც, რომ ჯერ კიდევ არ არის ასფალტი დაგებული ჩოხატაურის მთავარი ქუჩაზე, რომელიც წყალსადენის სარეაბილიტაციო სამუშაოების დროს გადაითხარა.
ჩოხატაურის მუნიციპალიტეტის გამგებლის, გია გიორგაძის ინფორმაციით, ტენდერი გზის სამუშაოების ჩატარებაზე, რომლის თანხა მუნიციპალური განვითარების ფონდიდან გამოიყო, უკვე გამოცხადებულია. თუმცა, გიორგაძემ არ იცის როდის დაიწყება სარემონტო სამუშაოები. ცნობილია მხოლოდ ერთი _ ამ ზაფხულში ჩოხატაურის მთავარი ქუჩა ისევ გადათხრილი და მტვრით სავსე იქნება. როგორც გამგეობაში გვითხრეს, დასაგებია კილომეტრი და 700 მეტრის სიგრძის გზა, რაც თითქმის 2 მილიონამდე ჯდება. გიორგაძის განმარტებით, ტენდერი 300 000-ლარიან სამუშაოებზეა გამოცხადებული, რაც გზის ორმოულ შეკეთებას ითვალისწინებს.
მუნიციპალური განვითარების ფონდში ამბობენ, რომ გზის სრული რეაბილიტირება და მოასფალტება მას შემდეგ მოხდება, რაც მესამე ეტაპის სამუშაოები დასრულდება:
_ გზის დაგებას თავისი ნიუანსები ახლავს. სანამ სამუშაოები არ დასრულდება, ახალ ასფალტს ვერ დავაგებთ, რადგან ისევ გაფუჭდება. ამიტომ, ჩოხატაურში, ცენტრალური გზის სამუშაოები მომავალ წელს, წყლის სისტემის სრული რეაბილიტაციის შემდეგ დაიწყება, _ ამბობენ მუნიციპალური განვითარების ფონდში.
