“მე ყველა წვრილმანს ვერ დავასახელებ, თუ რის გამო გადავწყვიტეთ პოკორას გაშვება, მაგრამ უკვე ზღვარს გადადიოდა მისი ზოგიერთი საქციელი. ყველაზე მეტად იმან გამაოცა, რომ “ზესტაფონთან” შეხვედრამდე დებოში ატეხა _ კობა მირზაშვილი სახელმწიფო სახსრებს იტაცებს და ანგარიშზე არსებულ თანხას არ გვირიცხავსო. ფული რომ იყოს ანგარიშზე, დავმალავ და არ გადავიხდი? ასეთი სისულელე არასოდეს მსმენია! წმინდა სპორტულ ფაქტორებს რაც შეეხება, მიმაჩნია, რომ მის ხელში გუნდი ვერ განვითარდებოდა. ამაში მას შემდეგ დავრწმუნდი, რაც პოკორას საქციელი საკუთარი თვალით ვნახე. მაგრამ ამაზე საჯაროდ ვერ ვილაპარაკებ. დიდი მადლობა, ჩვენთან რომ იმუშავა, მაგრამ “გურიას” სხვაგვარი მწვრთნელი სჭირდება,” _ აცხადებდა “გურიას” დირექტორი კობა მირზაშვილი.
როგორც ირკვევა, უკრაინელის შემცვლელად, ანუ ლანჩხუთის “გურიას” მთავარ მწვრთნელად გუნდის ყოფილი მეკარე და შემდგომში მთავარი მწვრთნელი გიგლა იმნაძე მოიაზრება. მისი ხელმძღვანელობით “გურიამ” ეროვნულ ჩემპიონატებსა და თასის გათამაშებაში საუკეთესო შედეგს მიაღწია _ კლუბი პირველი ეროვნული თასის მფლობელი და საწყის ორ ეროვნულ ჩემპიონატში ვიცე-ჩემპიონი გახდა.
ბატონი გიგლას საფეხბურთო კარიერა “გურიას” უკავშირდება _ იგი წლების მანძილზე იცავდა მის ღირსებას, ხოლო 1988 წლიდან სამწვრთნელო საქმიანობა კლუბის უკრაინელ მწვრთნელ მიხეილ ფომენკოს თანაშემწედ დაიწყო, 1990 წლიდან, როცა საქართველო საბჭოთა ფეხბურთს გამოეწყო, “გურიას” თავკაცი გახდა. 2-წლიანი სამწვრთნელო გამოცდილების მიუხედავად, მან, როგორც ვთქვით, პირველივე სეზონებში დიდ წარმატებებს მიაღწია. გიგლა იმნაძე შემდგომში არა ერთ ქართულ კლუბს წვრთნიდა, ფოთის “კოლხეთი” კი ვერცხლის პრიზიორი გახადა. ასევე, მუშაობდა ახალგაზრდულ ნაკრებში, როცა მას იტალიელი რობერტო ლანდი ხელმძღვანელობდა.
ბოლოს გიგლა იმნაძე ორიოდ სეზონის წინ ედგა “გურიას” სათავეში, როცა კლუბი პლეი-აუტის გათამაშებაში მონაწილეობდა და ცოტა დააკლდა უმაღლეს ლიგაში გადასვლას. მაშინ გამოცდილი სპეციალისტისა და მშობლიური კლუბის გზები ისევ გაიყო _ იმნაძე საჩხერის “ჩიხურას” სარეზერვო გუნდს ჩაუდგა სათავეში.
როგორც ითქვა, ჯერ კიდევ გასული სეზონის შუაში და შემდეგ, როცა გუნდი უმაღლეს ლიგაში იწყებდა ასპარეზობას, მას გუნდში დაბრუნება შესთავაზეს, მაგრამ ის “გურიაში” არ დაბრუნებულა. როგორც ცნობილია, იმნაძე მაჟორიტარი დეპუტატისა და “გურიის” ლეგენდარული კაპიტნის, თემურ ჩხაიძის უახლოესი მეგობარია და შესაძლოა, ხმები ამის გამოც გავრცელდა. თუმცა, იმნაძის სამწვრთნელო რეპუტაციას ვინმეს მხარდაჭერა ნამდვილად არ სჭირდება, აქ იგულისხმება ის, რომ თემურ ჩხაიძის პარლამენტში მოხვედრის შემდეგ “გურია” გამოცდილ სპეციალისტს გამოიყენებდა.
ამიტომაც გავრცელებული ინფორმაცია, რომ გიგლა იმნაძეს “გურიას” გაწვრთნას სთავაზობენ, გასაკვირი სულაც არ არის. მით უმეტეს, რომ ადგილი ვაკანტურია და პლუს, “გურიას” წინ მძიმე ბრძოლები ელის მოწინავე ექვსეულში მოსახვედრად. ყველა შემთხვევაში, მეორე ეტაპზე კლუბს გამოცდილი სპეციალისტი სჭირდება, თანაც სფფ-ის სალიცენზიო მოთხოვნის შესაბამისად, უმაღლესი ლიგის კლუბს ა ლიცენზიის სპეციალისტი უნდა წვრთნიდეს. ლანჩხუთური ფესვების მქონე იმნაძე ამ მხრივ, ალბათ, საუკეთესო არჩევანი იქნება.
თუმცა, ჯერ ყველაფერი გარკვეული არ არის და პასუხგაუცემელია კითხვა _ დათანხმდება კი გიგლა იმნაძე ასეთ ვითარებაში არსებულ “გურიაში” დაბრუნებას? ერთია, რომ ასეთ სურვილს დირექტორატი ამჟღავნებს, მაგრამ გადამწყვეტი მწვრთნელის გადაწყვეტილება იქნება.
ჩვენ შევეცადეთ უშუალოდ გიგლა იმნაძის კომენტარი მოგვესმინა, მაგრამ მას მობილური ტელეფონი გათიშული აქვს. შემდეგ დავუკავშირდით მის უახლოეს მეგობარს, პარლამენტარ თემურ ჩხაიძეს:
_ ბატონო თემურ, გიგლა იმნაძეს მობილური გათიშული აქვს, ამიტომაც თქვენ გკითხავთ _ რა ხდება მისი “გურიას” მთავარ მწვრთნელად დანიშვნასთან დაკავშირებით? ეს თქვენზე უფრო არავის ეცოდინებათ!
_ არაფერი ვიცი, ნამდვილად არ ვიცი… გეთანხმებით, წესით, ეს ყველაფერი პირველმა მე უნდა ვიცოდე, ალბათ, მაგრამ არაფერი ვიცი ნამდვილად!
