აღნიშნულ ცვლილებას “ზოგადი განათლების შესახებ” და “პროფესიული განათლების შესახებ” კანონებში დაგეგმილი ცვლილებები ითვალისწინებს და ცვლილებათა პაკეტი პარლამენტს უკვე წარედგინა.
მანდატურებისგან განსხვავებით, სადაც ასაკობრივი ზღვარი 20 წელი იყო, ბავშვთა დაცვის ოფიცრის ასაკობრივი ზღვარი 23 წლის ასაკიდან დაიწყება.
ბავშვთა დაცვის ოფიცრების ფუნქციები და უფლებამოსილება მხოლოდ ზოგადსაგანმანათლებლო დაწესებულების კონტროლით, სკოლებში წესრიგის უზრუნველყოფითა და სამართალდარვევათა აღკვეთით არ შემოიფარგლება. მას დაემატება მოსწავლისთის ფსიქო-სოციალური მომსახურების გაწევა (ფსიქოკორექცია, ფსიქოთერაპია, პრევენცია და რესოციალიზაცია), პროფესიული არჩევანის გაკეთებასა და კარიერის დაგეგმვაში ხელშეწყობა, სამეცნიერო-კვლევითი (ფსიქოლოგიური ან სოციალური) საქმიანობის განხორციელება, ფსიქოლოგიური ექსპერტიზის ჩატარება და საექსპერტო დასკვნის გაცემა.
მათ ფუნქციებში დამატებით განისაზღვრება ფსიქოსოციალური პრობლემის მქონე მოსწავლეებთან ურთიერთობა, მათთან ინდივიდუალური გასაუბრება, მათ ქცევაზე დაკვირვება და ამ დაკვირვების საფუძველზე შუამდგომლობის გაწევა ასეთი მოსწავლის ბავშვთა დაცვის, მედიაციისა და ფსიქოლოგიური სამსახურის ფსიქოლოგებთან გადამისამართების თაობაზე.
მათთვის გამოყოფილი იქნება მინი-აფთიაქი, რის მეშვეობითაც ოფიცრები მოსწავლეებს საჭიროებისამებრ პირველად დახმარებას გაუწევენ. ამასთან ისინი მოსწავლეთა უფლებებს როგორც სკოლის შენობაში, ისე გარე პერიმეტრზე დაიცავენ.
ცვლილებების საფუძველზე, მანდატურს სკოლის ადმინისტრაციულ საქმიანობაში ჩარევის, ასევე გაკვეთილების კონტროლის უფლება აღარ ექნება და მათი მთავარი მოვალეობა მოსწავლეების დაცვა იქნება.
ამასთან “ბავშვთა დაცვის ოფიცრებს” საშუალება ექნებათ თითოეულ უბანში ან რეგიონში, როგორც ინდივიდუალურად, ასევე ჯგუფურად იმუშაონ, რაც საშუალებას მისცემთ განიხილონ პრობლემური შემთხვევები, გაუზიარონ ცოდნა და გამოცდილება და ერთმანეთთან კონსულტაციები გაიარონ.
რაც შეეხება ვიზიალურ მხარეს, ცვლილებები აქაც იგეგმება. როგორც სამინსიტროში აცხადებენ, “ბავშვთა დაცვის ოფიცრისთვის” სპეციალური ახალი ფორმა უკვე იკერება და იგი მანდატურის ფორმისგან განსხვავებით მოკრძალებული იქნება.
განათლებისა და მეცნიერების სამინისტროს განმარტებით, აღნიშნული ცვლილებისთვის მანდატურები მანდატურის სამსახურის ბაზაზე შექმნილ ფსიქოლოგიურ ცენტრში გადამზადდებიან.
სამინისტროს ინფორმაციით, ამ ეტაპზე ფსიქოლოგიურ ცენტრში პროგრამის ფარგლებში, მანდატურთა გარკვეული რაოდენობის სპეციალური გადამზადება მიმდინარეობს, ხოლო მომავალში მათ გამოცდების ჩაბარება და დანარჩენი მანდატურების დატრენინგება მოუწევთ.
“მანდატურები ტრენინგებს გაივლიან – ვერბალური და არავერბალური კომუნიკაცია, ფსიქოლოგიის საფუძვლები, მედიაცია, კონფლიქტოლოგია, ასაკობრივი თავისებურებები, ტრავმა, ძალადობის შემთხვევაში ბავშვების რეფერირების პროცედურები.
გადამზადებული მანდატურები ჩააბარებენ გამოცდებს და ისინი ფსიქოლოგიურ ცენტრთან ერთად დანარჩენ მანდატურებს დაატრენინგებენ.
ამ ცვლილებების მიზანია სკოლებში მოსწავლეთა ყველა ფენის წარმომადგენლისთვის პროფესიული და პიროვნული განვითარების სრული და თანაბარი შესაძლებლობის უზრუნველყოფა, მათი მომზადება შემდგომი დასაქმებისა და თვითდასაქმებისათვის”, _ განმარტავენ სამინისტროში.
კანონპროექტის გათვალისწინებით, ბავშვთა დაცვის, მედიაციისა და ფსიქოლოგიურმა სამსახურმა ყველა ზოგადსაგანმანათლებლო დაწესებულებაში ბავშვთა დაცვის ოფიცრის დანიშვნა 2017 წლის 1 იანვრამდე უნდა უზრუნველყოს.
შეგახსენებთ, რომ მანდატურის სამსახური 2010 წლიდან ამუშავდა და მაშინ განათლებისა და მეცნიერების მინისტრი დიმიტრი შაშკინი იყო.
ამ სიახლემ დიდი უკმაყოფილება გამოიწვია საზოგადოების ნაწილში. ფაქტობრივად, მანდატურის ფუნქციები “გაიბერა” და გასცდა სკოლებში ძალადობის აღკვეთისა თუ პრევენციის უზრუნველყოფას. მანდატურები არა მხოლოდ მოსწავლეებს, არამედ მასწავლებლებსაც აკონტროლებენ. მაგალითად, იყო შემთხვევები სკოლებში, სადაც მანდატურები აკონტროლებდნენ, აგვიანებდა თუ რა ვინმე გაკვეთილზე და დაგვიანების შემთხვევაში, წერდა თუ არა მასწავლებელი “არას”. ამან მასწავლებელთა უმრავალესობაში უკმაყოფილება გამოიწვია, რადგან ისინი მიიჩნევდნენ, რომ ეს მასწავლებლის ფუნქციაში ჩარევაა, რაც მოსწავლეთა თვალში მასწავლებლის ავტორიტეტის დისკრედიტაციას იწვევს.
მაშინ, განათლების სამინისტროში აცხადებდნენ, რომ მანდატურთა პროგრამა მიზნად სკოლებში ძალადობის აღკვეთასა და პრევენციას ისახავდა.
