“ჩვენ უკვე წელიწადი და სამი თვეა ამ პრობლემის არსებობაზე მივუთითებდით, ჩვენ ვთვლით, რომ მთავარი პრობლემა, რომელიც არის ქვეყანაში, ეს არის ეკონომიკური ზრდის ტემპის შენელება, რომელიც გამოწვეულია ორი მიზეზით. ერთი მიზეზი ის არის, რომ მთავრობაში არსებული პოლიტიკური გუნდი უკიდურესად ეკლექტიკურია და იქ არის წარმოდგენილი ადამიანები, რომლებსაც რადიკალურად განსხვავებული წარმოდგენები აქვთ იმასთან დაკავშირებით თუ როგორ უნდა მოაგვარონ ქვეყნის წინაშე არსებული პრობლემები, მეორე ეს არის კოორდინაციის პრობლემა, როგორც მთავრობის შიგნით, ისე მთავრობასა და საპარლამენტო უმრავლესობას შორის. შეგახსენებთ რამდენიმე ინიციატივას, რომელმაც გამოიწვია ეკონომიკის შენელება, ეს ეხებოდა მიწის მიყიდვის აკრძალვას უცხო ქვეყნის მოქალაქეებზე, ეს ეხებოდა ქართული ბაზრის ახალი შრომითი რეგულაციებით დატვირთვას, ეს ეხებოდა გაუაზრებელ დისკუსიებს, რომელიც გაგრძელდა თვეების განმავლობაში აზარტული თამაშების აკრძალვასთან დაკავშირებით, ეს ეხებოდა დისკუსიებს, რომ უნდა შეიქმნას ახალი სახელმწიფო საპენსიო ფონდი, შემდეგ იყო დისკუსიები, რომ უნდა შექმნილიყო სახელმწიფო სადაზღვევო ფონდი, არ მოხდა დაგეგმილი გადასახადების შემცირება, პირიქით მოხდა აქცისის გადასახადის აწევა და სხვა”.
ჯაფარიძის განცხადებით, ასეთი ინიციატივები იყო ძალიან ბევრი, რომელთა ნაწილი იქცა კანონად, ნაწილი კი რაღაც მომენტის შემდეგ უკუგდებული იქნა. მისი თქმით, ეკონომიკაში შექმნილი პრობლემები სწორედ ამ არაფრისმომცემი ინიციატივებით არის გამოწვეული.
“აღარ ვსაუბრობ ისეთ ინიციატივებზე, რომელიც ეხებოდა პრეზერვატივებს, მეხრეებს, ჩოხებს, იმას, რომ ურემზე უნდა იყოს დამაგრებული მაშუქები და სამუხრუჭე სისტემები… ჩვენი აზრით, ეკონომიკაში პრობლემები გამოიწვია გაუაზრებელმა და უპასუხისმგებლო ინიციატივებმა”.
ჯაფარიძე აცხადებს, რომ ის და მისი თანამოაზრეები ცალსახად მიესალმებიან იმას, რომ პრემიერმა გააცნობიერა კოორდინაციის პრობლემის არსებობა და გაასაჯაროვა ის.
“მაგრამ ეს არ ნიშნავს იმას, რომ მთავრობა გაექცევა პასუხისმგებლობას იმის თაობაზე, რომ შარშან ეკონომიკაში დავკარგეთ დაახლოებით მილიარდ-ნახევარი, დავკარგეთ ბიუჯეტში დაახლოებით ერთი მილიარდი და წელს მთავრობა იღებს 2 მილიარდამდე ახალ ვალს იმისათვის, რომ დააფინანსოს ის ვალდებულებები, რომელი ვალდებულებების შესრულებასაც საქართველოს ბიუჯეტი უპრობლემოდ ახერხებდა ვალების გარეშეც”.
პრემიერის განცხადებას დღესვე გამოეხმაურა საპარლამენტო უმცირესობის წევრი დავით დარჩიაშვილი და განაცხადა, რომ მთავრობაში არსებობს პროფესიონალიზმის ნაკლებობა და არაკოორდინირებულობა.
“პრემიერის რეაქცია აჩვენებს არაკოორდინირებულობას, პროფესიონალიზმის ნაკლებობას მთავრობაში, გუნდურობის რეალურად არ არსებობას”.
დარჩიაშვილი აცხადებს, რომ სასამართლოს გარეშე ინფორმაციის მთავრობისთვის გაცემა ბიზნესს შეუქმნის პრობლემებს, რაც იმოქმედებს ეკონომიკაზე და აისახება სამუშაო ადგილების შემცირებასა და ახლის არ შექმნაზე.
