“აქცია მწვანე საფარის გადარჩენისკენ არის მიმართული. ვაკის პარკს აქვს სიმბოლური დატვირთვა, ის ყველაზე დიდი პარკია თბილისში. ყველაფერს შეეხნენ ქალაქში: ციყვების ტერიტორიას, ასათიანის ქუჩას და ქალაქი რჩება გამწვანების გარეშე. ეს არის სწორედ საგანგაშო. აქ არაა საუბარი იმაზე, ორი ხე გაიჩეხება თუ ორი ბუჩქი, საუბარია იმაზე, რომ მალე ქალაქში მწვანე საფარი აღარ იქნება. მერია რომ არაფრის შეცვლას არ აპირებს, სწორედ იმიტომაა ეს აქცია აქ!“ _ აცხადებს გარემოსდაცვითი ორგანიზაცია “მწვანე ალტერნატივას“ წარმომადგენელი დავით ჭიპაშვილი.
მერიასთან გამართულ აქციაზე დღეს ცნობილი ადამიანებიც მივიდნენ. მომღერალ ქეთათო ჩარკვიანის თქმით, კანონიერი მშენებლობის მიუხედავად, მორალი ამ ყველაფერზე მაღლა უნდა იდგეს.
“ძალიან მნიშვენელოვანია, საზოგადოება გაერთიანდეს ამ კონკრეტულ საკითხთან მიმართებაში, რადგან ეს არის პრინციპული მომენტი. ვის საკუთრებასაც არ უნდა წარმოადგენდეს მიწის კონკრეტული მონაკვეთი, არა აქვთ უფლება, გაჩეხონ ხეები და ააშენონ მაღალსართულიანი შენობა. დღეს გადაწყდება, ქართული საზოგადოება რამდენად მზად არის საკუთარი უფლებების დაცვისთვის. ზეწოლა უნდა მოვახდინოთ ხელისუფლებაზე, ჩვენი პრინციპული პოზიცია რომ გავიტანოთ,” _ გვითხრა ქეთათო ჩარკვიანმა.
აქცია-კონცერტს შეუერთდა მომღერალი ბაკურ ბურდულიც.
“ეს არამარტო ვაკის პარკს, მთელ თბილისს და მთელ საქართველოს ეხება. ძალიან დიდი კონტროლის ქვეშ უნდა დადგეს ყველაფერი და აიკრძალოს ხეების ჭრა, იმიტომ, რომ ჩვენ იმას ვკარგავთ, რასაც ყველაზე დიდი სასიცოცხლო მნიშვნელობა აქვს, ჰაერი აღარ გვექნება, რომ ვისუნთქოთ. მინდა, რომ ყველა ადამიანმა მივიღოთ ამ პროცესში მონაწილეობა, რაღაცა რომ დავუტოვოთ ჩვენს შვილებს,” _ აღნიშნა ბურდულმა.
აქციის ორგანიზატორებმა მერის მოვალეობის შემსრულებელთან შეხვედრა გამართეს. სევდია უგრეხელიძემ აღნიშნა, რომ ტერიტორია კერძო საკუთრებაა. თბილისს სჭირდება განვითარება და აუცილებლად უნდა აშენდეს სასტუმროები.
თბილისის მერიას არ ეთანხმება და ვაკის პარკის გადარჩენას ემხრობა გარემოს დაცვის მინისტრი.
“იმას, რომ მშენებლობა ვაკის პარკის მიღმა მიმდინარეობს, განსაკუთრებული მნიშვნელობა არ აქვს, ვინაიდან, თბილისი მჭიდროდ დასახლებული ქალაქია, იზრდება ტრანსპორტის რიცხვი, მიმდინარეობს მშენებლობები და შესაბამისად, რეკრეაციულ ზონებსა და გამწვანებას ქალაქისთვის ძალიან დიდი მნიშვნელობა აქვს.
თბილისი, ერთ სულ მოსახლეზე გამწვანებული ტერიტორიების მიხედვით სტანდარტებს ქვემოთ არის. შესაბამისად, ჩვენი მიზანი უნდა იყოს ის, რომ იქ, სადაც შესანარჩუნებელია, რეკრეაციული ზონები შევინარჩუნოთ, სადაც განსავითარებელია, განვავითაროთ და არა – პირიქით, სადაც არსებობს ტერიტორია, ყველგან მშენებლობა დაიწყოს. ქალაქს უნდა გააჩნდეს განვითარების გეგმა, უნდა ვიცოდეთ, სად უნდა მოხდეს ინფრასტრუქტურული პროექტების განვითარება, სად არის რეკრეაციული ზონები და სად უნდა განვითარდეს ისინი კიდევ უფრო მეტად. ვაკე საკმაოდ მჭიდროდ დასახლებული უბანია, შესაბამისად, მოსახლეობისთვის, ჰაერის ხარისხისთვის, ხმაურის შემცირებისთვის უმნიშვნელოვანესია, შენარჩუნებული იყოს სიმწვანე,” _ აღიშნა ხათუნა გოგალაძემ.
აქციის მიმდინარეობისას ინციდენტიც მოხდა. აქციის მონაწილეებმა მერიის პიკეტირება სცადეს. ინციდენტის დროს სამართალდამცავებმა “გრინფისის მხარდამჭერთა ჯგუფის” წარმომადგენელი ლაშა ჩხარტიშვილი დააკავეს.
