“მიუხედავად იმისა, რომ დაპირისპირების ფაქტს არ უარყოფს პროკურატურა, ლევან ბაჩეიშვილი დღემდე პროკურატურაში პროკურორის თანამდებობაზე რჩება. მაშინ ვკითხოთ პროკურატურის მაღალჩინოსნებს და იუსტიციის მინისტრს, რისთვის სხედან ალექსანდრე გორგაძე და ზურაბ შამათავა ციხეში? ადამიანები, რომლებიც ემსახურებოდნენ ჩვენს ქვეყანას, იბრძოდნენ 2008 წლის აგვისტოს ომში და მთელი ცხოვრება გაატარეს სამშობლოს სადარაჯოზე. ეს ადამიანები ციხეში სხედან იმისთვის, რომ ჯარისკაცებს ავარჯიშებდნენ და მიაყენეს თურმე ფიზიკური და სიტყვიერი შეურაცხყოფა. შეადარეთ ეს პროკურატურაში შესული ადვოკატისთვის სიტყვიერი და ფიზიკური შეურაცხყოფის მიყენებას პროკურორის მიერ. რამდენად შეიძლება ბაჩიაშვილს არ ჰქონდეს ბრალი წაყენებული ამ ფაქტთან დაკავშირებით და ისევ იკავებდეს პროკურორის თანამდებობას?!”
თუთბერიძის განცხადებით, ქვეყანაში შერჩევითი სამართალი მოქმედებს, მაგრამ მიუხედავად ამისა მოუწოდა პროკურატურას სამართლიანად განიხილოს არსებული საქმე და არ გაიზიაროს წინა ხელისუფლების ბედი.
“გასაგებია, რომ დღეს შერჩევითი მართლმსახურება გვაქვს სახეზე, მაგრამ მოვუწოდებ პროკურატურას, თუ არ უნდათ წინა ხელისუფლების ბედი გაიზიარონ, სასწრაფოდ მოახდინონ ადეკვატური რეაგირება კონკრეტულ ფაქტთან დაკავშირებით. არ შეიძლება ადამიანი, რომელიც შეურაცხყოფას აყენებს ადვოკატს დღემდე იკავებდეს პროკურორის პოსტს”.
პროკურატურაში მომხდარ ინციდენტს იმ დღესვე სოციალური ქსელით გამოეხმაურა ბაჩო ახალაიას მეუღლე ანი ნადარეიშვილი.
“დღეს მთავარ პროკურატურაში მოხდა ინციდენტი, რომელმაც უკვე ყველა ზღვარს გადააჭარბა. პროკურორ ლევან ბაჩიაშვილს, რომელიც არის ბაჩო ახალაიას თითქმის ყველა საქმის პროკურორი, რომლებშიც ბაჩო გამართლდა სასამართლოს არაერთ ინსტანციაში, ამოძრავებს რა თავისი პირადული დაღმავალი კარიერული ბოღმა (და როგორც ჩანს “ქართული ოცნების” მხრიდან არაერთხელ მოხვდა სასამართლოში მისი წაგებული საქმეების გამო) დღეს მთავარი პროკურატურის შენობაში სულ სხვა საქმეზე მისულ ბაჩოს ადვოკატს რომეო საჯაიას (რომელიც სასამართლოებზე გამოირჩეოდა თავისი პროფესიონალიზმით და ჰქონდა რეალობასთან შესაბამისად ადეკვატური ემოციური გამოსვლები) ფიზიკური და სიტყვიერი შეურაცხყოფა მიაყენა სხვა პროკურორების და ადვოკატების თვალწინ. ინციდენტი ასევე ასახულია შენობაში არსებული სათვალთვალო კამერებით. როგორც გვაცნობეს ამ ფაქტზე დაიწყო გამოძიება და დიდი იმედი მაქვს, რომ ლევან ბაჩიაშვილი აღმოჩნდება საბრალდებო სკამზე.
შეგახსენებთ, რომ ჩვენს გმირ, ომში დაჭრილ სამხედროებს ზურა შამათავას და ალეკო გორგაძეს ამაზე ბევრად უფრო უმნიშვნელო ბრალდებით მიუსაჯეს 5 წლით თავისუფლების აღკვეთა.
მივმართავ ყველა საერთაშორისო და არასამთავრობო ორგანიზაციას, დაინტერესდნენ ამ უმსგავსო ფაქტით, როდესაც პროკურორის მუნდირში გამოწყობილი ვიგინდარა პროკურატურის შენობაში თავს ესხმის ადვოკატს”, _ წერს “ფეისბუქის” გვერდზე.
შეგახსენებთ, რომ პროკურატურაში მომხდარ ინციდენტზე განცხადება გაავრცელა ადვოკატთა ასოციაციის თავმჯდომარემ და პროკურორის ქმედებას სამარცხვინო უწოდა.
“ადვოკატთა ასოციაციის თავმჯდომარე შეშფოთებული ვარ პროკურორ ლევან ბაჩიაშვილის მიერ ადვოკატ რომეო საჯაიას მიმართ განხორციელებული ძალადობის ფაქტის გამო. საქართველოს სამარცხვინო პროკურატურა, როგორც ამას აკეთებდნენ კანონიერი ქურდები, გადავიდა ადვოკატთა კორპუსის პროკურატურაში დაბარებებზე და საქმის გარჩევებზე რაც შემაშფოთებელი ფაქტია. ადვოკატი რომეო საჯაია 2014 წლის 8 იანვარს დაბარებული იქნა ქ.თბილისის პროკურატურაში საპროცესო მოქმედების შესრულებისთვის. კერძოდ, პროკურორმა დაიბარა საქმის მასალების გადაცემის მიზნით. რომეო საჯაია გამოცხადდა ქ.თბილისის პროკურატურაში 15:00 საათზე საქმის მასალების მისაღებად. ამ დროს, პროკურატურის შენობის პირველ სართულზე მარცხენა მხარეს, დაცვის ოთახში შემოვიდა პროკურორი ლევან ბაჩიაშვილი, რომელმაც ადვოკატ რომეო საჯაიას მიაყენა სიტყვიერი და ფიზიკური შეურაცხყოფა. კერძოდ, შეაფურთხა ადვოკატს და ხელი დაარტყა სახის არეში. რის შემდეგ, ადვოკატი რომეო საჯაია იძულებული გახდა თავი დაეცვა თავდამსხმელისაგან. ადვოკატ რომეო საჯაიას აღენიშნება დაზიანებები. მივმართავ საქართველოს სამარცხვინო პროკურატურას, სასწრაფოდ დაიწყოს რომეო საჯაიას მიმართ განხორცილებული ძალადობის ფაქტის ეფექტური გამოძიება. ამოიღოს ქ.თბილისის პროკურატურის პირველ სართულზე განლაგებული რამოდენიმე ვიდეო თვალით გადაღებული მასალები და პროკურორი ლევან ბაჩიაშვილი სასწრაფოდ დასვას საბრალდებო სკამზე. საქართველოს სამარცხვინო პროკურორების გასაგონად, რომლებიც არ იცნობენ ადვოკატებთან მიმართებაში დადგენილ საერთაშორისო სტანდარტებს, განვმარტავ, რომ ადვოკატის ხელმძღვანელობს გაეროს ძირითადი პრინციპებით ადვოკატის როლის შესახებ (27 აგვისტო -7 სექტემბერი, 1990, ჰავანა), რომელიც შემდგომ მთლიანად ასახულ იქნა მინისტრთა კომიტეტის დადგენილებაში”, _ ნათქვამია განცხადებაში.
პროკურატურის განცხადებით აღნიშნულ ფაქტთან დაკავშირებით გამოძიება უკვე დაწყებულია.
