უკვე ვწერდით, რომ გუნდში არსებული ფინანსური პრობლემებით გუბერნატორიც კი დაინტერესდა, როგორც “გურია ნიუსთან” განმარტა, მან ყოფილ მწვრთნელს, თემურ ლორიას შესთავაზა წარმოადგინოს თავისი ხედვა.
“გურია ნიუსმა” დავით მახარაძისგან კომენტარი აიღო, ასევე მოვახერხეთ თემურ ჩხაიძის ჩაწერა:
_ ბატონო დავით, როგორც ერთ-ერთ თქვენს მიერ მიცემულ ინტერვიუში წავიკითხეთ, “ორპირ ადამიანებთან ურთიერთობას არ აპირებდით”, ვის გულისხმობდით და რატომ შეიცვალეთ აზრი?
_ არ მინდოდა აქედან წასვლა და ვთვლი, რომ რაღაც ჩემი წვლილიცაა იმ წარმატებაში, რამაც 27 ქულა მოგვიტანა, ასევე წვლილი მიუძღვის გია ჩხაიძეს და მთელ შტატს. გამომდინარე აქედან, არ მინდოდა დამეტოვებინა აქაურობა და წავსულიყავი სხვაგან. როცა მე ვთქვი, რომ რომ მქონდა შემოთავაზება სხვა კლუბიდან, მითხრეს, აქ გამოსწორდება ყველაფერი და არ წახვიდეო, ვიფიქრე, რადგან რომან პოკორა წავიდა, ველოდი, რომ მე გამაგრძელებინებდნენ მუშაობას, მაგრამ წავიკითხე ერთ-ერთ სტატიაში, სადაც ეწერა, რომ კლუბის ხელმძღვანელობამ მწვრთნელობა გიგლა იმნაძეს შესთავაზა, მეწყინა, არ უნდა მწყენოდა? გუშინ გავარკვიე კობასგან, რომ ინტერვიუში არასწორად ეწერა და არ ყოფილა ისე, როგორც სტატიაში იყო. არავისთვის არ შეუთავაზებიათ, ინტერვიუში ისიც ეწრა, რომ ამა და ამ დროს დაიწყებოდა წვრთნები, მოიყვანდა კონკრეტულ ფეხბურთელებს, მაგრამ ის ფეხბურთელები, ვინც იქ ეწერა, სხვადასხვა გუნდებში არიან ახლა და ამან უფრო დამარწმუნა , რომ ინტერვიუ სწორი არ იყო. გადავწყვიტე, რომ მინდა აქ ყოფნა და ვიქნები კიდეც. რაღაც პოზიციიდან გამომდინარე ადრეც შემეძლო მეთქვა, რომ უმადურობას ჰქონდა ადგილი, თუნდაც პოკორას ჩამოყვანის შემდეგ, მაგრამ ისიც მაქვს ნათქვამი, რომ პოკორასთან ურთიერთობით არ წამიგია არაფერი, ყურადღებას ვამახვილებდი არა მხოლოდ ადამიანურ, არამედ სპორტულ თვისებებზეც, იმ მომენტში არასწორი იყო რაღაც ცვლილებები.
_ ასევე წავიკითხეთ, რომ თუ ეს ხალხი დარჩა გუნდში, აუცილებლად წავალ გუნდიდან, ვის გულისხმობდით?
_ ხომ ვამბობ, როგორც ამიხსნეს ინტერვიუ არ ყოფილა სწორი ინტერპრეტაციით გაკეთებული, გამომდინარე აქედან ვერ დავიწყებ ძიებას, კლუბის დირექტორი მეუბნება, რომ მას მსგავსი განცხადება არ გაუკეთებია. დანარჩენი არის ხელმძღვანელობის გადასაწყვეტი, ვინ იქნება მწვრთნელი. ის, რომ მე გურიას გავწვრთნი, მხოლოდ სიტყვიერ დონეზე ითქვა, ოფიციალურადაც ალბათ აწი იქნება. 8 იანვარს გადავწყვიტე, რომ გავაგრძელო კლუბთან ურთიერთობა.
_ როგორც ვიცით თემურ ჩხაიძემაც დაუჭირა მხარი თქვენს კანდიდატურას…
– თემურს მე დიდი ხანია ვიცნობ და კარგი ურთიერთობა მქონდა ჯერ კიდევ ფეხბურთელობის დროიდან, რა თქმა უნდა ეს ურთიერთობა არც მისი დეპუტატად დანიშვნის შემდეგ შეცვლილა. კონკრეტულად ამ საკითხზე მივსულიყავი და გვესაუბრა, არ ყოფილა, გადმომცეს, რომ მან ჩემს კანდიდატურას დაუჭირა მხარი, არ ვიცი ეს სად მოხდა გუბერნატორთან შეხვედრაზე თუ სხვაგან, გამიხარდა ძალიან. როგორც მიცნობს, ისე დამახასიათა და მადლობა მინდა გადავუხადო მას ამისთვის.
_ თქვენ არ ყოფილხართ გუბერნატორთან შეხვედრაზე, მაშინ როცა ფეხბურთის საკითხს განიხილავდნენ, რატომ?
_ არ გამიგია, არავის უთქვამს, აბა როგორ მივიდოდი, ის, რომ გუბერნატორი ფეხბურთის საკითხთან დაკავშირებით შეხვედრას მართავდა, თქვენი საშუალებით გავიგე, თქვენი ინტერვიუ წავიკითხე.
_ წყენამ გაგიარათ?
_ გამიარა, გამომდინარე იქედან, რომ ამიხსნეს სიტვაცია, ასევე წასვლა არ მინდოდა იმ მონაპოვრის გამო, რაც გურიას დღეს- დღეობით გააჩნია. ის, რომ მეტის გაკეთება ვერ შევძელით, არ არის მწვრთნელების ბრალი, ბოლო თამაშებში სიტუაცია ისე წარიმართა, გუნდი ვერ ემზადებოდა შესაბამისად და სამწუხაროდ მივიღეთ ეს შედეგი. ასევე წავიკითხე, ისიც, რომ გუბერნატორი თემურ ლორიას სთხოვს ხედვის წარმოდგენას და ამბობს, რომ ლორია ლანჩხუთელია, ფესვები მეც მაქვს ლანჩხუთში, მაგრამ ის, რომ ფეხბურთელი და მწვრთნელი ლანჩხუთელი უნდა იყოს, არასწორი მიდგომაა, თუნდაც ქუთაისი ავიღოთ, ორი კაცი თუ იყო ადგილობრივი, დანარჩენი ჩამოიყვანეს. ასეთი მიდგომა, რომ ადგილობრივი უნდა იყოს, არასწორია. სასურველია ადგილობრივიც ბევრი იყოს, მაგრამ არის და იგნორირებას ვუკეთებთ?პრივილეგია შესაძლებელია, თუ იქნებიან ადგილობრივს ჰქონდეს. ჩვენი პრობლემები ფინანსებიდან გამომდინარეც არის, თუ თანხა არ იქნა, ვერ მოვიწვევთ ფეხბურთელებს, ვერ დავიწყებთ ახალ სეზონს, თუ არ გაუმჯობესდა პირობები, ახალი გუნდის გაკეთება მოგვიწევს, რაც ძალიან რთულია.
ის, რომ დეპუტატმა, თემურ ჩხაიძემ მხარი დავით მახარაძის კანდიდატურას დაუჭირა, ჩვენთან ინტერვიუში არ უარყო.
_ თქვენ მხარი დაუჭირეთ დავით მახარაძის კანდიდატურა, გვიდასტურებთ თუ არა ამ ინფორმაციას?
_ ჩემი აზრით დაიმსახურა ამ ადამიანმა გუნდის მწვრთნელობა, რადგან ყველაზე მძიმე პერიოდში ყოველგვარი ანაზღაურების გარეშე გვერდით ედგა გუნდს, სწორედ ამ ადამიანის დამსახურება იყო ის, რომ ბიჭები აიყოლია და გავიდნენ სათამაშოდ. ამიტომაც დავუჭირე მხარი, რომ მას გაეგრძელებინა მუშაობა. ადამიანი, რომელიც მოვიდა გუნდში, უკვე რამდენი თვეა კაპიკი არ აუღია და ასეთი ადამიანი გაუშვა სახლში, ღმერთი არ გაპატიებს.
_ თუ იცის თქვენი პოზიცია გუბერნატორმა?
_ მე და ბატონი გიორგი გუშინ შევხვდით ერთმანეთს, მაგრამ არ გვქონია საუბარი ამასთან დაკავშირებით. ვიცი, რომ არის მონდომებული კლუბ “გურიაში” არსებული პრობლემები მოაგვაროს. თვითონ ბიზნესმენი ადამიანია და უფრო მეტი შანსი აქვს კარგად მიხედოს ამ საქმეს. სხვანაირად ისედაც გაგჭირვებულ რაიონში, სადაც ბიუჯეტი ძალიან მცირეა და ბევრი სოციალურად შეჭირვებული ცხოვრობს, კლუბის ბიუჯეტის ხარჯზე არსებობა ძნელია.
_ ასევე დასახელდა მეორე კანდიდატიც, ყოფილი მწვრთნელი, თემურ ლორია…
_ მე არ ვესწრებოდი შეხვედრას და არ ვიცი. რაც შეეხება წინა გუნდს, არ მინდოდა თავიდანვე, რომ ის ხალხი, ვინც გუნდი უმაღლეს ლიგაში გადაიყვანა, დაშლილიყო, გვინდოდა ერთიანი ძალებით გაგვეკეთებინა საქმე, განა მარტო მე ვიყავი მათი დაშლის წინააღმდეგი, არამედ ყველა. მერე რატომღაც თქვეს, რომ კახა ებრალიძე აუცილებლად უნდა ყოფილიყო კლუბ “გურიას” პრეზიდენტი, რასაც ვერ ვხვდები რატომ უნდა ყოფილიყო. თან იმათ როგორც აწყობდათ, ისე უნდა გაკეთებულიყო, რაზედაც ვერ შევჯერდით და გააგრძელა სულ სხვა შემადგენლობამ მუშაობა.
_ რას იტყოდით ახალი გუნდის მუშაობაზე?
_ მოდით რა , სიმართლე ვთქვათ, მით უმეტეს ჩემნაირი კაცი, ვინც კარგად იცნობს ფეხბურთს, არ იყოს მადლობელი, როცა გაუსაძლის პირობებში გუნდი არსებობდა, როცა ყველა წუთში მოსალოდნელი იყო გუნდის დაშლა, სიცივეში, ზამთრის პირობებში მუშაობა მართლაც რთული და წარმოუდგენელი იყო, მაგრამ უნდა თქვათ, რომ კაცურად გააკეთეს ის, რაც უნდა გაეკეთებინათ. თავის დროზე ვერ ვარჯიშობდნენ, იყო კვებაზე და საცხოვრებელზე პრობლემები და ძალიან რთულია ასეთ პირობებში გუნდის შენახვა. მერე იყო ის, რომ ძველი ვალები გადმოყვა გუნდს, ამის შემდეგ გაგვიჭირდა წელში გამართვა. მე მინდა რაღაც გავაკეთო, მაგრამ რა? ამ დრომდე გაკეთდა ის, რომ რაღაც ეტაპზე გადავარჩინეთ გუნდი, თუ სახელმწიფო არ დაგვეხმარა, არაფერი გამოვა. ისე სულ ვცდილობდი მაქსიმალურად დავხმარებოდი გუნდს, შეიძლება ეს არ ჩანდა, მაგრამ მე ამას ვაკეთებდი. დღევანდელ დღეს ფეხბურთის შენახვა ძალიან რთულია, ფეხბურთის რომელსაც მაყურებელი არ ჰყავს, იმას არ ვამბობ, რომ ფანები არ ყავს, 1000 კაცი ყველა თამაშზე დადის, მაგრამ ფეხბურთის მოყვარულმა ერთი ლარი მაინც უნდა გადაიხადოს, როცა ფეხბურთელი ამ წვიმაში, თოვლში გამოდის და გლადიატორივით იბრძვის, არ ღირს ერთი ლარი?
მინდა ბოლოს ვთქვა, რომ მაშინ როცა გუბერნატორი მართავდა შეხვედრას ლანჩხუთში ფეხბურთის საკითხთან დაკავშირებით, ამდგარა რამდენიმე ადამიანი ახლანდელ გურიას ხელმძღვანელობის წარმომადგენლებს ვგულისხმობ და დაუტოვებიათ დარბაზი, მე მინდა ვთქვა, რომ ეს არ იყო პროტესტი ბატონი გიორგის მისამართით, იქ სხვა სიტუაცია იყო და აქ ბატონი გიორგი არაფერ შუაშია.
