“ფოთის მერი, დავით სარსანია ერთპიროვნულად, სუბიექტურად ნიშნავს და ათავისუფლებს საჯარო მოსამსახურეებს. მან თავის თანაშემწედ კულტურისა და სპორტის საკითხებში დანიშნა ოთარ ხარჩილავა, რომელიც ამგვარი ბექგრაუნდით მოვიდა:
ოთარ ხარჩილავა 2007 წლის 29 ივლისს გასამართლდა ნარკოტიკების მოხმარებაზე და დაეკისრა ადმინისტრაციული ჯარიმა- 500 ლარის ოდენობით.
2010 წლის 27 ოქტომბერს მასზე კიდევ აღიძრა საქმე 260-ე მუხლის II ნაწილით – ნარკოტიკული ნივთიერების შეძენასა და შენახვაზე. საპროცესო გარიგებით დაეკისრა 50 000 ლარის გადახდა.
2013 წელს პრეზიდენტ სააკაშვილის შეწყალებით მოეხსნა ნასამართლეობა”.
სტატიას თავად ოთარ ხარჩილავა გამოეხმაურა და ჩატარებულ ბრიფინგზე აღნიშნა, რომ არ ეთანხმება სტატიაში მოყვანილ ფაქტებს და აპირებს მიმართოს სასამართლოს.
“გურია ნიუსი” ოთარ ხარჩილავას დაუკავშირდა.
_ ამბობთ, რომ სტატიაში ფაქტები დამახინჯებულია და გამოცემას თქვენს დისკრედიტაციაში ადანაშაულებთ. იქნებ უფრო კონკრეტულად გვითხრათ რას გულისხმობთ, არ იყავით ნასამართლევი?
_ უფრო გასაგები რომ იყოს, ცოტა შორიდან დავიწყებ. ეს ჟურნალისტი საახალწლოდ იყო მოსული და ქალაქში დაგეგმილ ღონისძიებებთან დაკავშირებით იღებდა ინტერვიუს. ნასამართლეობაზე ბოლოს მკითხა, ისიც ვერ მივხვდი უცებ, რა შუაში იყო ეს თემა საახალწლო ღონისძიებებთან. მე ვკითხე კიდეც ეს და მისი ქცევიდან გამომდინარე ისიც ვუთხარი, რომ კითხვა-პასუხის რეჟიმში კი არ ვიყავით, არამედ დაკითხვის ფორმატში. მე ვუთხარი, რომ ნასამართლეობა მოხსნილი მაქვს და შეგიძლია გადაამოწმო-თქო, მაგრამ დაამახინჯა ჩემი ნათქვამი და არასწორი ინფორმაცია გაავრცელა, თითქოს ორჯერ ვიყავი ნასამართლევი. ისიც არ შეესაბამება სიმართლეს, რომ 2013 წელს მომეხსნა ნასამართლეობა. საქმე შეწყდა 2012 წლის 26 მაისს პრეზიდენტის შეწყალებით, მაგრამ სარჩელი პროკურატურაშია და დღესაც მიმდინარეობს განხილვა. მე აუცილებლად დავამტკიცებ, რომ როგორც ბევრი ადამიანი უდანაშაულოდ ვიყავი დაკავებული.
_ მოდით დავაკონკრეტოთ, თქვენ ამბობთ, რომ 2007 წელს არ იყავით დაკავებული…
_ არა, არ ვყოფილვარ ნასამართლევი.
_ მაშინ მოგვიყევით, როგორ და რატომ მოხდა თქვენი დაკავება 2010 წელს?
_ მამაჩემი ახლაც და მაშინაც იყო ფოთის ჰიდრომანქანათმშენის გენერალური დირექტორი. იცით რა პერიოდი იყო, რა რეჟიმში ვცხოვრობდით. მამას მოსთხოვეს მისი ქონების სახელმწიფოზე გადაცემა ჩუქების გზით, რაზეც უარი მიიღეს, რის შემდეგაც ზუსტად სამ დღეში მოხდა ჩემი დაკავება. მე მაშინ „ეგრისი+“-ის გენერალური დირექტორი ვიყავი, უნდა აღინიშნოს, რომ ფირმა საკმაოდ კარგ პოზიციაზე იყო, იცოდნენ ყველა თეთრის ბრუნვა, თან მამაზე შურის საძიებლად ყველაზე კარგი “ვარიანტი” ვიყავი, ჩემი ძმა მაშინ 15 წლის იყო, დედა პედიატრია და სწორედ მე ჩამიდეს ნარკოტიკები.
_ სად იყავით ამ დროს?
_ ვმოძრაობდი სამსახურის ავტომანქანით, გადამიდგა სამი მანქანა, გადმოცვივდნენ სამხარეოს სოდის თანამშრომლები, ჩამიმტვრიეს საქარე მინა, მე ჩამომაგდეს მანქანიდან და წამიყვანეს ზუგდიდში, სადაც მაჩვენეს ტაბლეტები და მითხრეს შენია, მოგვეცი აღიარებითი ჩვენებაო. ისიც დააყოლეს, მანქანა აქ დარჩება, ამას კი 50 000 ლარი დაამატეთ, თორემ 14 წელს გაატარებ ციხეშიო. მერე ოჯახმა მოიძია ეს თანხა და ორ დღეში გამომიშვეს იზოლატორიდან. იმ პერიოდში ისეთი რაღაცეები ხდებოდა როლანდ ახალაიას სამხარეო პროკურორობის დროს, უკვირდათ კიდეც ასე “იოლად” რომ დავაღწიე თავი. მერე სარჩელი შევიტანე გენერალურ პროკურატურაში და ახლაც მიმდინარეობს ძიება. საქმე აღიძრა ჩემს უკანონოდ დაკავებაზე.
_ ფოთის მერის თანაშემწედ როდის დაინიშნეთ?
_ 2013 წლის ზაფხულში.
_ მანამდე სად მუშაობდით?
_ ფირმა “ეგრისი +”-ის გენერალური დირექტორი ვიყავი, მერე დირექტორად გადავედი, 2013 წელს გადავდექი ამ თანამდებობიდან და დავინიშნე მერიაში აღნიშნულ თანამდებობაზე.
_ თქვენ თქვით, რომ აპირებთ სასამართლოს მიმართოთ…
_ მე ვითხოვ გამოცემისგან ოფიციალურად ბოდიშის მოხდას, რადგან გაავრცელა არაობიექტური და ცრუ ინფორმაცია. მე ჟურნალისტს ინტერვიუშიც ვუთხარი, რომ საქმე ჩემზე 2010 წელს შეწყდ და ისიც, რომ არ ვყოფილვარ ორჯერ ნასამართლევი. ყველანაირ ზღავარს გადავიდა გამოცემა და პირდაპირ ეწევა ქალაქის მერის და ჩემს დისკრედიტაციას, თან ეს ინტერვიუ წინასაახალწლოდ ჩაწერა და მხოლოდ ახლა დაიწერა სტატია. ვფიქრობ ვიღაც მიზანმიმართულად მოქმედებს.
_ მაინც რას უკავშირებთ ამ მიზანმიმართულობას?
_ ჭორებს ჩემს დაწინაურებაზე და ქალაქის მერის გუბერნატორის მოადგილედ დანიშვნის თაობაზე. ვაცხადებ, რომ ეს არ შეეფერება სიმართლეს და ვიღაცის თუ რაღაცის გამო არ შეიძლება ადამიანების დისკრედიტაცია. არ შეიძლება ასეთი ბინძური მეთოდებით ბრძოლა.
_ ახლა რას აპირებთ?
_ ველოდები ოფიციალურად მომიხადონ ბოდიში, წინააღმდეგ შემთხვევაში უახლოეს ხანებში მივმართავ სასამართლოს.
“გურია ნიუსი” შეეცადა დაკავშირებოდა “ნიკოლაძის გზას”, მაგრამ გამოცემის საიტზე მითითებული ტელეფონის ნომერი გამორთულია. თუ ჩვენს კოლეგებს სურვილი ექნებათ უპასუხონ ოთარ ხარჩილავას კომენტარს, “გურია ნიუსი” მზად არის საუბრისთვის.
