“26 მაისი იყო 9 აპრლის იდენტური გეგმა. აპრილში გეგმავდა და ახორციელებდა რუსეთი, ახლა კი მიტინგის ორგანიზატორები. მაშინ ხალხი ჩაკეტა ტანკებმა და რუსმა სამხედროებმა, ახლა კი ამას აპირებდნენ ტროსებითა და რკინის ჯაჭვებით. მერაბიშვილი ისჯება იმისთვის, რომ არ მისცა რუსეთის სპეცსამსახურებს გეგმის განხორციელების საშუალება”.
შაშკინმა აღნიშნა, რომ მის გარშემო, ისევე როგორც მისი თანაგუნდელების გარშემო მიმდინარეობს პოლიტიკური დევნა. მისი თქმით დაინტერესებას ერთდროულად გამოხატავს ფინანსური პოლიცია, სამხედრო პოლიცია, პროკურატურა და სწორედ ეს არის პოლიტიკური დევნა.
“პოლიტიკური დევნაა ის პროცესი, როცა ხორციელდება პოლიტიკური მოღვაწის ირგვლივ მიზანმიმართული ძიება. მიმდინარეობს გაუთავებელი დაკითხვები. ასეა ახლა ჩემს გარშემოც. აუდიტმა ამოიღო ჩემი მინისტრობის პერიოდი , დაიკითხა ათობით ადამიანი და დაიდო დასკვნაც, რომელიც ერთის მხრივ ძალიან სასაცილოა, მეორეს მხრივ კი საინტერესო. მედავებიან საცურაო აუზის და პროფტექნიკუმის აშენებას, სხვათაშორის ერთ-ერთმა სააგენტომაც დაწერა სტატია ამის შესახებ-“შაშკინის უკანონო მშენებლობები”, მაგრამ ეს სასაცილოა. მე კანონი არ დამირღვევია და თუ დამნაშავე ვარ სკოლების, ტექნიკუმების, საცურაო აუზების აშენებისთვის, კი, ბატონო, გამასამართლონ”.
შაშკინის განცხადებით მიწა, რომელზეც გლდანში აშენდა პროფესიულ-ტექნიკური სასწავლებელი და საცურაო აუზი, იყო კერძო საკუთრება, რომლის მეპატრონესაც ეკონომიკის სამინისტრომ უფრო კარგი ტერიტორია გადასცა. მისი თქმით ეს ორივე ობიექტი აშენდა მთავრობის დადგენილებით. რეფორმატორთა კლუბის ხელმძღვანელის განცხადებით სწორედ რომ ახალი მთავრობის ლოგიკაში ჯდება მისი სკოლების მშენებლობისთვის დაპატიმრება.
“თუ ჩემი ყველაზე დიდი დანაშაულია სკოლების, კოლეჯების აშენება, დაანგრიონ ეს შენობები და ჩამსვან ციხეში. ახალი მთავრობის ლოგიკით, მაშინ როცა ვანო მერაბიშვილი ისჯება ქვეყანაში სიმშვიდის და უსაფრთხოების შენარჩუნებისათვის, მეც გამასამართლებენ სკოლების აშენებისთვის. სწორედ რომ ჯდება მათ ლოგიკაში”.
შაშკინი საუბრის დასასრულს კიდევ ერთხელ შეეხო ქვეყანაში დასაქმების პრობლემას და განაცხადა, რომ ბოლო ხანებში კი არ ჩნდება, არამედ ქრება სამუშაო ადგილები.
“ახალი წელის დაიწყო “არქიმედეს” ხელოვნური გაკოტრებით, ათობით ადამიანი დარჩა სამუშაოს გარეშე, ასე რომ ჩვენს ქვეყანაში სამუშაო ადგილები კი არ იქმნება, არამედ თვალსა და ხელს შუა ქრება”.
