“აღნიშნული პროექტი დღეს ხელოვნურად შეჩერებულია რიგი სახელმწიფო უწყებების ყოვლად უპასუხისმგებლო და საკითხისადმი ზერელე დამოკიდებულების გამო. მაგალითად, საქართველოს გარემოს დაცვის სამინისტრომ ვერ განახორციელა დროული და ეფექტური კოორდინაცია სხვა სახელმწიფო უწყებებსა და სამინისტროებთან. დღეს, როდესაც საერთაშორისო საფინანსო ინსტიტუტების მიერ უკვე გამოყოფილია ელექტროგადამცემი ხაზის მშენებლობისთვის საჭირო 77 მილიონი ევრო, პროექტის გარემოზე ზემოქმედების შეფასების დოკუმენტის შეუთანხმებლობა, ხდება ამ პროექტის შეჩერების და დაბლოკვის _ განაცხადა ლევან კალანდაძემ.
“ჯვარი-ხორგას ელექტროგადამცემი ხაზის პროექტი” წარმოადგენს “შავი ზღვის ელექტროგადამცემი ქსელის პროექტის” ერთ-ერთ უმნიშვნელოვანეს კომპონენტს, რომელსაც საქართველოს მთავრობის თხოვნით ახორციელებს “ევროპის რეკონსტრუქციისა და განვითარების ბანკი” (EBRD), “ევროპის საინვესტიციო ბანკი” (EIB), “გერმანიის რეკონსტრუქციის საკრედიტო ბანკი” (KFW) და “ევროპის სამეზობლო საინვესტიციო ფონდი“ (ECNIF). პროექტის მთლიანი ღირებულება 270 მილიონ ევროს შეადგენს. ამ მასშტაბური პროექტის მეორე ფაზა ითვალისწინებდა დაახლოებით 60 კმ. სიგრძის ჯვარი-ხორგას 500 კვ-იანი მაღალი ძაბვის ელექტროგადამცემი ხაზის მშენებლობას და ორი ქვესადგურის – ხორგას (220 კვ.) ქვესადგურის რეაბილიტაცია/რეკონსტრუქციას და ჯვარის ახალი (500 კვ.) ქვესადგურის მშენებლობას. პროექტი და მათ შორის, ამ პროექტის “გარემოზე ზემოქმედების შეფასება” (გზშ) მომზადებულია “ევროპის რეკონსტრუქციისა და განვითარების ბანკის” (EBRD) მიერ. ამ ეტაპზე EBRD-ის და KFW მიერ უკვე გამოყოფილია ჯვარი-ხორგას ელექტროგადამცემი ხაზის მშენებლობისთვის საჭირო საინვესტიციო თანხა 77 მილიონი ევროს ოდენობით.
ლევან კალანდაძე: “ამასთან, საყურადღებოა ის გარემოება, რომ როგორც “შავი ზღვის ელექტროგადამცემი ქსელის პროექტი”, ასევე მისი მეორე ფაზით განსაზღვრული “ჯვარი-ხორგას ელექტროგადამცემი ხაზის პროექტი”, მთლიანად სახელმწიფო პროექტია. ეს არ არის რომელიმე კერძო ინვესტორის მიერ დაგეგმილი და განხორციელებული საინვესტიციო პროექტი. ამ პროექტის აღმასრულებელი არის თავად სახელმწიფო და სახელმწიფო ორგანიზაცია “საქართველოს სახელმწიფო ელექტროსისტემის” (სსე) ქოლგის ქვეშ არსებული ორგანიზაციები. აღნიშნულის გათვალისწინებით, საკითხისადმი ასეთი დამოკიდებულება და პრაქტიკულად სრული ქაოსი და გაურკვევლობა სახელმწიფო სტრუქტურების არაკოორდინირებული მუშაობის კუთხით, კიდევ უფრო მეტ კითხვას და ბუნდოვანებას აჩენს.”
ლევან კალანდაძის განცხადებით, გადაუჭარბებლად შეიძლება ითქვას, რომ დღეს ჯვარი-ხორგას ელექტროგადამცემი ხაზის მშენებლობის შეფერხება არის ყოვლად უპასუხისმგებლო ნაბიჯი და გადაწყვეტილება. “ეს არის ქვეყნისათვის ერთ-ერთი უმნიშვნელოვანესი სტრატეგიული საკითხისადმი სახელმწიფო უწყებების მხრიდან არასახელმწიფოებრივი მიდგომების გამოვლენის “ბრწყინვალე” მაგალითი.”
კითხვაზე, რა სტრატეგიული დანიშნულება აქვს აღნიშნულ პროექტს ქვეყნისთვის, ლევან კალანდაძემ განაცხადა:
“პროექტის განხორციელებით, ერთის მხრივ, ჩვენ გვაქვს რეალური შესაძლებლობა, მოვიზიდოთ მრავალ ათეულ მილიონიანი პირდაპირი უცხოური ინვესტიცია “ევროპის რეკონსტრუქციისა და განვითარების ბანკისგან (EBRD), განვახორციელოთ უმნიშვნელოვანესი სტრატეგიული დანიშნულების მქონე ენერგეტიკული პროექტი საქართველოში, მნიშვნელოვნად შევუწყოთ ხელი ქვეყნის ენერგოდამოუკიდებლობის და რაც ყველაზე მნიშვნელოვანია, ენერგოუსაფრთხოების დონის ამაღლებას. აღნიშნმული პროექტის მეშვეობით, მნიშვნელოვნად შევამციროთ რუსეთის ენერგოსისტემაზე ჩვენი ქვეყნის ენერგოდამიკიდებულების ხარისხი, რეალურად კიდევ უფრო გავზარდოთ საქართველოს ენერგეტიკული საექსპორტო პოტენციალი.”
აღნიშნულ საკითხთან დაკავშირებით “გურია ნიუსმა” უკვე გაგზავნა კითხვები გარემოს დაცვის სამინისტროში და მათ პოზიციას მოგვიანებით შემოგთავაზებთ.
