ამ თემას სპეციალური ბრიფინგი ირმა ინაშვილმა და ადვოკატმა ჯუმბერ მილორავამ მიუძღვნეს.
“ნიშანდობლივია, რომ ეს ინტერვიუ გაავრცელა ბაჩო ახალაიას მეუღლემ, ანი ნადარეიშვილმა, ამ ინტერვიუში ყოფილი პატიმარი აცხადებს, რომ თითქოს ირმა ინაშვილმა დაუწერა ტექსტი, რომელიც მან წაიკითხა და სწორედ ამ ტექსტის მიხედვით დაადანაშაულა პატიმრებზე ზეწოლაში ბაჩანა ახალაია, მეგის ქარდავა, დავით საყვარელიძე, ოლეგ ფაცაცია. იმ ინტერვიუში, რომელიც 2013 წლის მარტში მომცა ჯოლოხავამ, იყო შემზარავი ფაქტები ნაამბობი. ეს მასალა ჩვენ მივაწოდეთ შესაბამის უწყებებს, ჩვენ ადვოკატ ჯუმბერ მილორავასთან ერთად მხოლოდ ორი თვის შემდეგ შევძელით პროკურატურას დაეკითხა ყოფილი პატიმარი და კიდევ უფრო მეტი ინფორმაცია მიეწოდებინა მათთვის. თქვენ შეგიძლიათ იხილოთ ის ინტერვიუ, რომელიც მან მე მომცა და ის ინტერვიუ, რომელიც გუშინ გავრცელდა და ნახავთ, რომ ჩემთვის მოცემულ ინტერვიუში ის ყოველგვარი ზეწოლის გარეშე, ემოციებით ლაპარაკობდა, რომელსაც ვერ შეძლებდა დაზეპირებული ტექსტით, გარდა ამისა, მას იმ პერიოდში თავისუფლად შეეძლო გადაადგილება, თავისი ნებით მივიდა დაკითხვაზე პროკურატურაში, სადაც მე ნამდვილად არ ვიქნებოდი, რადგან არავინ დამასწრებდა დაკითხვის პროცესს და თუ მე ვახდენდი მოწმეზე ზეწოლას, მას ამის შესახებ თავისუფლად შეეძლო განეცხადებინა. საინტერესოა ისიც, რომ ჯოლოხავა რამდენიმე ხნის წინ გაქრა, ის მე მიკავშირდებოდა და მეუბნებოდა, რომ მასზე არის ზეწოლა ახალაიას და ქარდავას მხრიდან და ითხოვდა დაცვას. მე და ბატონი ჯუმბერიც დაჟინებით ვითხოვდით მისთვის დაცვის გამოყოფას, დაცვის პროგრამაში ჩასმას, მაგრამ საქართველოს მთავარმა პროკურატურამ არ გამოუყო დაცვა, უფრო მეტიც, კბილაშვილმა განაცხადა, რომ „ობიექტივს“ დაეცვა მოწმე. “ობიექტივი” არის მედია-კავშირი და ვერ განახორციელებდა მის დაცვას, მაგრამ მაინც ვიცავდით მანამდე, ვიდრე ის მიცემდა ოფიციალურ ჩვენებას. 2013 წლის მარტში ჯოლოხავას თავს დაესხნენ, მე ჩავატარე ბრიფინგი, კრიმინალური პოლიციაც ჩაერთო საქმეში, მაგრამ საქმე ბოლომდე არ იქნა მიყვანილი და არ იქნა გამოძიებული თუ ვინ დაესხა თავს.
დღეს ძალიან ბევრი ადამიანი საუბრობს იმის შესახებ, რომ ინტერვიუში “ჟურნალისტი”, რომელიც ჯოლოხავას კითხვებს უსვამს, ხმით ძალიან ჰგავს ახალაიას ადვოკატს ონიანს, სწორედ ამიტომ ჩვენ დღეს მივმართავთ ექსპერტიზის სამსახურს, რომ ჩატარდეს ექსპერტიზა თუ ვინ იწერს ინტერვიუს, ვისი ხმაა და თუ მართლაც ონიანის ხმაა, ეს აშკარად მიანიშნებს ახალაიას მხრიდან ზეწოლაზე. გარდა ამისა მივმართავთ შსს-ს, გამოცხადდეს ძებნა ჯოლოხავაზე, რადგან მაქვს ეჭვი, რომ შესაძლებელია ცოცხალიც არ იყოს. ის ბოლოს დამიკავშირდა ოდესიდან, მთხოვა ვიდეო-კამერა გამეგზავნა, რადგან შეეძლო საკმაოდ საინტერესო მასალები მოეწოდებინა ციხის ყოფილ მაღალჩინოსნებზე, ეს იყო რამდენიმე თვის წინ, გარდა ამისა, ზუსტად რამდენიმე თვის წინ უცხო ნომრიდან შემომივიდა შეტყობინება, სადაც მწერდნენ, რომ ჩაწერილია ინტერვიუ, სადაც ჯოლოხავა უარყოფს „ობიექტივზე“ გასული ინტერვიუს დეტალებს და აბსოლუტურად განსხვავებულ რამეს ყვებაო. აქედან შეიძლება ითქვას, რომ ეს ინტერვიუ ჩაწერილია უფრო ადრე, ვიდრე 13 იანვარს, როცა გავრცელდა. მე აუცილებლად გადავცემ ძიებას ამ ნომერს და ყველა მასალას, რომელიც ხელთ გვაქვს.
გოდერძი ჯოლოხავა გაწირა სახელმწიფომ, სახელმწიფომ ვერ დაიცვა ყველაზე მნიშვნელოვანი მოწმე”.
ინაშვილი აცხადებს, რომ მოწმეზე, რომელსაც ოფიციალური ჩვენება აქვს მიცემული პროკურატურისთვის, არ შეიძლება ვინმემ ზეწოლა განახორციელოს ან თავს მოახვიოს თავისი აზრები. მისი განცხადებით საჭიროა დაიწყოს ხელახალი გამოძიება და დადგინდეს სიმართლე. ჟურნალისტი ამბობს, რომ რაც მოხდა ჯოლოხავას შემთხვევაში, იგივე ხდება ბევრი მოწმის შემთხვევაში და ეს ყველაფერი სწორედ რომ კოჰაბიტაციის შედეგია.
“ვითხოვთ ახალი გამოძიების დაწყებას, რა მოხდა სინამდვილეში, რატომ და ვისი ზემოქმედებით შეცვალა ჯოლოხავამ ჩვენება. ჩვენ ვითხოვთ დაიწყოს გამოძიება არჩილ კბილაშვილთან მიმართებაშიც, რომელმაც გამოავლინა თანამდებობრივი დაუდევრობა და ვერ მოახერხა მოწმის დაცვა, ასევე ვითხოვთ დაიწყოს გამოძიება მთელი იმ საგამოძიებო ჯგუფის წინააღმდეგ, რომელმაც მიიღო ჩვენება და ვერ დაიცვა მოწმე. ჩვენ მზად ვართ ვითანამშრომლოთ გამოძიებასთან”.
ირმა ინაშვილი აცხადებს, რომ ის უთანაგრძნობს გოდერძი ჯოლოხავას და განიცდის მის გამო, რადგან ის არის პროვოკაციის მსხვერპლი და აბსოლუტური გაგებით ხვდება მის ნაბიჯს, რადგან მას ჰყავს ცოლ-შვილი და ვერ გაწირა ისინი. ინაშვილის განცხადებით ყველა ეს ადამიანი გაწირა საქართველოს ხელისუფლებამ და მთავარმა პროკურატურამ.
ადვოკატი ჯუმბერ მილორავა აცხადებს, რომ მას ხშირი შეხვედრა ჰქონდა ჯოლოხავასთან და ამ უკანასკნელს ყოველთვის შეეძლო ეთქვა მისთვის იმ ზეწოლაზე, რომელზეც გუშინ გავრცელებულ ჩანაწერში საუბრობს.
“მე კატეგორიულად ვაცხადებ, რომ ჯოლოხავაზე არანაირ ზეწოლას არ ჰქონია ადგილი მაშინ, როცა 2013 წლის მარტში მან ინტერვიუ მისცა ინაშვილს. ის დაკითხული იქნა მოწმის სახით პროკურატურაში გამომძიებელთან და პროკურორ გელა პატრიაშვილთან ერთად. მან ზუსტად ის ჩვენება მისცა, რაზეც ისაუბრა “ობიექტივის” ეთერში. ის ვიდეო, რომელიც გუშინ გავრცელდა სოციალური ქსელით ნამდვილად დადგმულია და მტკიცებულება არ არის და არანაირ ღირებულებას არ წარმოადგენს. მტკიცებულება მხოლოდ მაშინ იღებს ძალას, როცა ოფიციალურად იქნება დაკითხული. შეუძლიათ ბაჩო ახალაიას ახლობლებს, წარმოადგინონ ჯოლოხავა მთავარ პროკურატურაში და იქ დაიკითხოს.”
ბრიფინგზე გაიჟღერა ინფორმაციამ, რომ ჯოლოხავას მეუღლის ნათესავია მეგის ქარდავა და როცა ყოფილი პატიმარი ზეწოლაზე საუბრობდა, სწორედ ამ ნათესავების მხრიდან მოდიოდა ეს ზეწოლა.
ინაშვილის მიერ ბრიფინგზე გაჟღერებულ საკითხს, რომ ის მიმართავს ექსპერტიზას “ჟურნალისტის” ხმის დასადგენად, ანი ნადარეიშვილი სოციალური ქსელით გამოეხმაურა.
“რაც შეეხება ინტერვიუს, ნამდვილად გოგა ონიანმა ჩაწერა, არ გინდათ ექპერტიზაში ზედმეტი თანხების გადახდა, მე გიდასტურებთ, რომ გოგა ონიანი კითხავდა, ხოლო მე ვიწერდი და კამერის უკან ვიდექი.
P.S. ისე ერთი კითხვა მაქვს ამასთან დაკავშირებით, რომ აცხადებთ, თუ გოგა ონიანი იწერდა ინტერვიუს, მაშინ ბაჩო ახალაიას დაკვეთით მოხდაო, გოგა ონიანის მაგივრად ბარნაბა ეძგვერაძეს რომ გაეკეთებინა ეს ინტერვიუ, მაშინ ბაჩო ახალაიას დაკვეთით აღარ იქნებოდა? თუ როგორ არის ჩვენი საქმე?”, _ წერს ნადარეიშვილი.
