“ყოყმანობდნენ – მომხდარიყო მტკიცებულებათა ფაბრიკაცია, თუ გაცხადებულიყო, რომ ჩანაწერი არ არსებობს”

“საქართველოს მთავრობას ერთი თვე დასჭირდა იმის სათქმელად, რომ ვიდეო ჩანაწერები, სადაც აღბეჭდილია, თუ როგორ ხდება ვანო მერაბიშვილის გატაცება საკნიდან, არ არსებობს. მათი ცინიკური მტკიცებით, სასჯელაღსრულების მე-9 დაწესებულებაში განლაგებული კამერების ჩანაწერები, თურმე, 24 საათის განმავლობაში იშლება. შეგახსენებთ, რომ სულ ცოტა ხნის წინ, თავად სასჯელაღსრულების მინისტრი, სოზარ სუბარი ამტკიცებდა, რომ ჩანაწერები ათი დღის განმავლობაში ინახება.

“ქართული ოცნების” არა ერთი ლიდერი კი ჯიუტად იმეორებდა, რომ ფირების ამოღება შესაძლებელია, უბრალოდ ამას სჭირდება გარკვეული პროცედურა, რის გამოც ეს ვერ მოხდებოდა სწრაფად. როგორც ჩანს ამ ხნის განმავლობაში მიმდინარეობდა ყოყმანი, მომხდარიყო მტკიცებულებათა ფაბრიკაცია, დამონტაჟება, თუ პირდაპირ გაცხადებულიყო, რომ შესაბამისი ჩანაწერი არ არსებობს. მათი გუშინდელი განცხადება ცხადყოფს, რომ მთავრობამ აირჩია უფრო მარტივი გზა. აბსოლუტურად გაუგებარია, თუ ჩანაწერი მართლა არ არსებობდა, რატომ ვერ გახდა ეს ცნობილი პირველივე დღეს. სასჯელაღსრულების სამინისტროში დიდი ხნის წინ დამკვიდრებული პრაქტიკის თანახმად, მსგავსი ჩანაწერები ინახება ერთი თვე, ხოლო განსაკუთრებულ შემთხვევებში ნახევარი წელიც კი. ამას ადასტურებს ბაჩო ახალაიას შემთხვევაც, როცა მისი ჩანაწერი გამოქვეყნდა რამდენიმე თვის შემდეგ.

გავრცელებულმა განცხადებამ სრულიად აშკარა გახადა, რომ დანაშაულებრივ ქმედებას, ყოფილი მთავარი პროკურორის, ოთარ ფარცხალაძის მხრიდან, საქართველოს ყოფილი პრემიერ-მინისტრის ვანო მერაბიშვილის წინააღმდეგ ნამდვილად ჰქონდა ადგილი.

“ქართული ოცნების” მთელმა პოლიტიკურმა ხელმძღვანელობამ, საკუთარ თავზე აიღო პოლიტიკური პასუხისმგებლობა და შეეცადა ამ დანაშაულის დაფარვას. უდაოა, რომ საქმე გვაქვს პოლიტიკური ანგარიშსწორების დაკვეთასთან, რომლის განხორციელებაშიც ჩართულია მთელი მმართველი კოალიცია. ამ საქმის გამოსაძიებლად აუცილებელია საპარლამენტო კომისიის შექმნა.””

სასჯელაღსრულების სამინისტროს განცხადებას გამოეხმაურა მერაბიშვილის ადვოკატი დავით ხაჟალიაც და განაცხადა, რომ ეს განცხადება სამინისტროს მიერ კითხვებზე პასუხის გაცემისგან თავის არიდებაა.

“თავიდანვე გვქონდა ვარაუდი იმის შესახებ, რომ ეს კადრები არ იქნებოდა ამოღებული და გაკეთდებოდა განცხადება, რომ კადრები წაშლილია. რაც შეეხება გზაზე განლაგებულ კამერებს, აქედან ბუნებრივია, ივანე მერაბიშვილის იდენტიფიცირება ვერ მოხდებოდა. თუმცა სასჯელაღსრულების სამინისტროს შეეძლო, დაეფიქსირებინა მანქანა, რომელიც სამინისტროს ან სახელმწიფოს კუთვნილებაა. მიგვაჩნია, რომ ეს არის უბრალოდ თავის არიდება იმ კითხვებზე პასუხის გაცემისგან, რაც გაჩნდა”, _ ამბობს ხაჟალია.

უმცირესობის წევრმა, მიხეილ მაჭავარიანმა კი განაცხადა, რომ სასჯელაღსრულების სამინისტროს ამ განცხადებით „ხელს აფარებს კრიმინალ ფარცხალაძეს“ და საქართველოს მთავრობას პოლიტიკური პასუხისმგებლობის აღება დააკისრა.

“ეს არის დანაშაულის დაფარვა. კრიმინალ ფარცხალაძესთვის ხელის დაფარება და საქართველოს მთავრობის მიერ პოლიტიკური პასუხისმგებლობის აღება. მათ სამი კვირა იფიქრეს და ამაზე მეტი ვერაფერი მოიფიქრეს, რომ ფირები უბრალოდ გაანადგურეს. თქვენ გახსოვთ, რომ ბაჩო ახალაიას კამერიდან არა მარტო ვიდეო, არამედ აუდიო ჩანაწერიც დაახლოებით 2–3 თვეში გამოქვეყნდა. თუ ჩანაწერები ბაჩო ახალაიას შემთხვევაში არ წაიშალა ავტომატურად, რაღა მერაბიშვილის ჩანაწერი წაიშალა”, _ განაცხადა მაჭავარიანმა.

შეგახსენებთ, რომ ვანო მერაბიშვილის საკნიდან გაყვანის საკითხზე დაწყებული სამსახურებრივი შემოწმება დასრულდა. სასჯელაღსრულების სამინისტროს ინფორმაციით, ჩანაწერის დათვალიერებისას საქმისათვის საინტერესო ფაქტობრივი გარემოებები ვერ იქნა აღმოჩენილი. რაც შეეხება სათვალთვალო კამერების ჩანაწერებს, სამინისტროში აღნიშნავენ, რომ “მერაბიშვილის მიერ განცხადების გაკეთების მომენტისთვის ჩანაწერი აღარ არსებობდა, ვინაიდან შენობებში არსებული ვიდეო-სათვალთვალო ტექნიკური საშუალებები 24 საათის გასვლის შემდეგ ახალი ინფორმაციის ჩაწერის გამო ძველ ჩანაწერებს ავტომატურად შლის.”