საპარლამენტო უმრავლესობის წევრი გია ვოლსკის თქმით, ჩანაწერი 24 საათის განმავლობაში არ უნდა წაშლილიყო. მისი ვარაუდით სისტემა გაუმართავად მუშაობს.
“მგონია, რომ რაღაც სისტემა მუშაობს გაუმართავად, რომელსაც არ უნდა წაეშალა 24 საათში ფირი. კარგი იქნებოდა, ჩანაწერი ყოფილიყო, მაგრამ არავითარი საფუძველი არ მაქვს, არ დავუჯერო სისტემას, რომელიც წესიერად მართავს და ადამიანის უფლებებსაც ითვალისწინებს”
არც საპარლამენტო უმრავლესობის წევრ ზურაბ აბაშიძეს შეაქვს ეჭვი სასჯელაღსრულების სამინისტროს მიერ ექს–პრემიერ ვანო მერაბიშვილის ციხიდან გაყვანის საქმეზე წარმოებულ გამოძიებაში.
“ამ შემთხვევაში მატროსოვის ციხეში ამ კადრების წაშლა უფრო ადრე მოხდა და როგორც გამოძიება ამბობს, რეჟიმიდან გამომდინარე, 24 საათის განმავლობაში ჩანაწერი აღარ იარსებებდა. ჩვენ არანაირი საფუძველი არ გვაქვს, ეჭვი შევიტანოთ იმ გამოძიებაში, რომელიც აწარმოა სასჯელაღსრულების სამინისტროს გენერალურმა ინსპექციამ”, _ განაცხადა აბაშიძემ.
სოზარ სუბარის პირველი მოადგილე გიგა გიორგაძე კი აცხადებს, რომ მასალა არქივდება მხოლოდ ინციდენტის შემთხვევაში, აქ კი არანაირ ინციდენტს ადგილი არ ჰქონია.
“თუ რაიმე ხდება, საკანში 24-საათიან რეჟიმში მუდმივი ზედამხედველობა მიმდინარეობს და ინციდენტის შემთხვევაში არქივდება მასალა, რათა ეს შემდგომი შესწავლის საგანი გახდეს. ამ შემთხვევაში არაფერი მომხდარა, ინციდენტს ადგილი არ ჰქონია და ბუნებრივია, ავტომატურ რეჟიმში მოხდა მისი წაშლა”.
არასამთავრობო ორგანიზაციებსა და მთელ რიგ პოლიტიკოსებს შორის სასჯელაღსრულების სამინისტროს დასკვნის გამოქვეყნების შემდეგაც ბევრი კითხვა რჩება, რომელთაგან უმთავრესო მაინც ვიდეო-ფირების გაქრობას ეხება.
