მაგალითად, “ბიძინა ივანიშვილი _ ქართული ოცნების” წარმომადგენელს დეპუტატ ზურაბ ტყემალაძეს სესიებზე დასწრებისა და კენჭისყრაში მონაწილეობის გრაფაში ნული უწერია. ტყემალაძეს ფეხდაფეხ მოსდევს ზვიად კვაჭანტირაძე _ ვებ-გვერდის მონაცემების მიხედვით, მთელი წლის განმავლობაში არც ის დასწრებია სესიებს და კენჭისყრებს. ასეთივე სტატისტიკა აქვს ბიზნესმენ-დეპუტატს ვალერი გელაშვილს. ვების მონაცემებით, სხდომებს არ დასწრებია დეპუტატი ლევან ბერძენიშვილიც, სამაგიეროდ, მისი ძმის დავით ბერძენიშვილის დასწრების მაჩვენებელი 84%-ს გასცდა.
ამ გვერდის მონაცემებს თუ დავუჯერებთ, არც ერთ სხდომას არ დასწრებია ნაციონალებს გამიჯნული მარიკა ვერულაშვილი, არ გამოჩენილა გიორგი ოჩიაური, 0% უწერია ნუგზარ წიკლაურს, ისევე, როგორც მის თანამოაზრე ზურაბ ჯაფარიძეს. 0,83% აქვს გივი-გიორგი თარგამაძეს. ზაზა კედელაშვილს კი, სულ რაღაც 1,71%.
მაჩვენებლების მიხედვით, ყველაზე აქტიურ დეპუტატებად მანანა კობახიძე, ფატი ხალვაში, პაატა ბარათაშვილი, გიორგი გაჩეჩილაძე უნდა ჩაითვალონ, რადგან მათი დასწრების მაჩვენებელი 95%-ზე მეტია.
საპარლამენტო მონიტორინგის ვებგვერდი chemiParlamenti.ge “საერთაშორისო გამჭვირვალობა – საქართველოს” საპარლამენტო პროგრამის ფარგლებში შეიქმნა და მიზნად ისახავს მოქალაქეების ინფორმირებულობის ამაღლებას იმის შესახებ, თუ ვინ წარმოადგენს მათ ხმას პარლამენტში და რა გადაწყვეტილებები მიიღება მათი სახელით.
“საერთაშორისო გამჭვირვალობა – საქართველო” ჟურნალისტებისთვის სანდო წყაროა, და ჩვენ ამ მონაცემებზე დაყრდნობით მასალაც მოვამზადეთ, თუმცა, გადამოწმებისას აღმოჩნდა, რომ კონკრეტულად ეს საიტი დახვეწის პროცესშია. ორგანიზაციაში ამბობენ, რომ დაუყოვნებლივ მიიღებენ ზომებს, რომ საიტზე შესაბამისი გაფრთხილება არსებობდეს.
“საერთაშორისო გამჭვირვალობაში” განმარტავენ, რომ ვებგვერდზე ატვირთული ინფორმაცია ავტომატურად განახლებადია, როგორც კი პარლამენტიდან მოდის ახალი მონაცემი. ორგანიზაციის განმარტებით, “პარლამენტი არდასწრებად თვლის, როდესაც დარეგისტრირდები, მაგრამ კენჭისყრაში არ იღებ მონაწილეობას. ანუ მაჩვენებელი – 0, ნიშნავს იმას, რომ დეპუტატს კენჭისყრაში არ ექნება მონაწილეობა მიღებული, შესაძლებელია თავი შეიკავა ხმის მიცემისგან.”
ოზურგეთის მაჟორიტარი დეპუტატი ზვიად კვაჭანტირაძე ამბობს, რომ ყველა სხდომას ესწრებოდა და საიტზე მითითებული ინფორმაცია არასწორია: “ალბათ, რაღაც გაუგებრობაა. არ გამომიტოვებია არც ერთი კენჭისყრა და არც ერთი დოკუმენტის განხილვა. თუ საზღვარგარეთ არ ვარ მივლინებაში, გაცდენა არ მაქვს პრაქტიკულად. უფრო მეტსაც გეტყვით: მამა რომ გარდამეცვალა, პანაშვიდის დღესაც კი კენჭისყრაზე ჩავედი ქუთაისში.”
მაჟორიტარი დეპუტატი ვიქტორ ჯაფარიძეც უარყოფს სხდომების გაცდენას. მისი თქმით, ის ყველა სხდომას შეძლებისდაგვარად ესწრება და ვებგვერდზე მითითებული მონაცემი სინამდვილეს არ ასახავს: “რას ჰქვია კენჭისყრაში არ მიმიღია მონაწილეობა?! რა სისულელეებსაც დაწერენ, უნდა დავიჯეროთ?!”
სხდომების გაცდენას არ ადასტურებს “ნაციონალური მოძრაობის” დეპუტატი ზურაბ ჯაფარიძე. მისი თქმით, მისი აქტივობა საპარლამენტო სხდომების პირდაპირი ტრანსლირების დროსაც კარგად ჩანს: “ეს ყველაფერი youtube-ზეც არის ატვირთული; არ ვიცი, ვინ რას იკვლევს, იძიებს ან როგორ აახლებს ვებგვერდს, მაგრამ, ჩემს შემთხვევაში, ეს ინფორმაცია არის მცდარი!”
