პრესკონფერენციაზე, რომელიც კომპანიის მიერ ჩატარებული რევიზიის შედეგად გამოვლენილ ბუნებრივი აირის უკანონო დატაცების ფაქტებს მიეძღვნა, მინისტრის მოადგილემ განაცხადა, რომ მალხაზ აბდუშელიშვილის ქუჩის #1-ში რეგისტრირებულ მისამართზე, რომელიც პრეზიდენტის ავლაბრის რეზიდენციის ტერიტორიაა, აღმოჩენილია ბუნებრივი აირის უკანონოდ დატაცების ფაქტი.
“ზამთრის სიცივეებთან ერთად მკვეთრად იმატა ბუნებრივი აირის მოხმარებამ და სამწუხაროდ, ხშირ შემთხვევაში, გაზის დატაცების ფაქტებმა. განსაკუთრებით საგანგაშოა, როცა ბუნებრივი აირის უკანონოდ მოხმარებას ბიზნესსექტორის წარმომადგენლები და სხვა დიდი ორგანიზაციები ცდილობენ. კონკრეტული შემთხვევა, რის შესახებაც ახლა გვინდა, თბილისელებს ვაცნობოთ, მალხაზ აბდუშელიშვილის ქუჩის №1-ში რეგისტრირებულ მისამართზე ანუ პრეზიდენტის ავლაბრის რეზიდენციის ტერიტორიაზე აღმოჩენილ საგანგაშო ფაქტს უკავშირდება. შპს “ყაზტრანსგაზ-თბილისის” უსაფრთხოების სამსახურის მიერ გეგმიური შემოწმების შედეგად აღმოჩენილია მრიცხველის გვერდის ავლით შეყვანილი გაზის მილი. კომპანიის თანამშრომლების მიერ ადგილზე უკვე გაფორმდა ადმინისტრაციული სამართალდარღვევის ოქმი, ორგანიზაციას შეუწყდა გაზმომარაგება, რომლის აღდგენაც მხოლოდ დაკისრებული ჯარიმის გადახდის და გაზმომარაგების ქსელის მოწესრიგების შემდეგ მოხდება. შპს “ყაზტრანსგაზ-თბილისი” აფრთხილებს მომხმარებლებს, რომ საგანგებო რეიდები და შემოწმებები მთელი თბილისის ტერიტორიაზე გაგრძელდება და ურჩი გადამხდელების წინააღმდეგ კანონმდებლობით გათვალისწინებული სანქციები გატარდება,” _ განაცხადა ილია ელოშვილმა.
როგორც ილია ელოშვილმა განმარტა, დატაცება, სავარაუდოდ, ადმინისტრაციის შექმნის დღიდან ხდებოდა და ბუნებრივი გაზი, სასადილოსა და დამხმარე ნაგებობებს ხმარდებოდა. სავარაუდოდ, პრეზიდენტის ადმინისტრაცია თვეში დაახლოებით 5-6 000 ლარის ბუნებრივ აირს მოიხმარდა.
ელოშვილის თქმით, შედგენილია ადმინისტრაციული აქტი, დალუქულია ობიექტი და მიმდინარეობს იქ დადგმული სიმძლავრეების დადგენა, რათა ზუსტად განისაზღვროს ჯარიმის ოდენობა. დაკისრებული ჯარიმა სახელმწიფო უზრუნველყოფის სამსახურმა უნდა გადაიხადოს.
მინისტრის მოადგილის თქმით, როდესაც ბედავდა პრეზიდენტის ადმინისტრაცია და იპარავდა ბუნებრივ აირს, ეს მეტყველებს იმაზე თუ რა განუკითხაობა იყო ამ სფეროში.
კომპანია “ყაზტრანსგაზის” სპეციალურმა მმართველმა ირაკლი გაბუნიამ მომხმარებლებს მოუწოდა თავი შეიკავონ მსგავსი ფაქტებისაგან, რადგან ადმინისტრაციული ჯარიმით დაჯარიმდებიან. მისივე თქმით, თანხის ოდენობა დანადგერების, სიმძლავრისა და სადენი მილის დიამეტრის მიხედვით დადგინდება.
როგორც ენერგეტიკის მინისტრის მოადგილემ ილია ელოშვილმა და “ყაზტრანსგაზ თბილისის” სპეციალურმა მმართველმა ირაკლი გაბუნიამ ბრიფინგზე განაცხადეს, ორგანიზაციას გაზმომარაგება უკვე შეუწყდა.
