“პარტიების ფინანსური მონიტორინგის სამსახურის მიერ გავრცელებულ განცხადებაში უზუსტობებს აქვს ადგილი”

 _ პოლიტიკური პარტიების ფინანსური საქმიანობის მონიტორინგის სამსახურმა საქართველოს პრეზიდენტის 2013 წლის არჩევნების პერიოდში საარჩევნო პროცესების მონიტორინგის შედეგად დაასრულა მოკვლევა 6 ადმინისტრაციულ საქმესთან დაკავშირებით, რაზეც შედგენილ იქნა ადმინისტრაციული სამართალდარღვევის ოქმები და შემდგომი რეაგირების მიზნით გაიგზავნა თბილისის საქალაქო სასამართლოში. აღნიშნული ოქმები შედგენილია შემდეგ საკითხებზე: პრეზიდენტობის კანდიდატის, ქართლოს ღარიბაშვილის მიერ 3-კვირიანი და საარჩევნო პერიოდის დეკლარაციების წარმოუდგენლობა, ითვალისწინებს ჯარიმას 1 000 ლარის ოდენობით; პრეზიდენტობის კანდიდატის, მამუკა მელიქიშვილის მიერ 3-კვირიანი და საარჩევნო პერიოდის დეკლარაციების წარმოუდგენლობა, ითვალისწინებს ჯარიმას 1 000 ლარის ოდენობით; პრეზიდენტობის კანდიდატის, ნესტან კირთაძის მიერ საარჩევნო პერიოდის დეკლარაციის წარმოუდგენლობა, ითვალისწინებს ჯარიმას 1 000 ლარის ოდენობით; პრეზიდენტობის კანდიდატის ნესტან კირთაძის საარჩევნო კამპანიის ფონდის ანგარიშიდან ნაღდი ფულის გატანის ოპერაცია სახელმწიფო აუდიტის სამსახურის ნებართვის გარეშე, ითვალისწინებს ჯარიმას 1 000 ლარის ოდენობით; მოქალაქეთა პოლიტიკური გაერთიანება “ერთიანი ნაციონალური მოძრაობის” წინასაარჩევნო რეკლამის შესახებ ინფორმაციის წარმოუდგენლობა, რომელიც ითვალისწინებს ჯარიმას 2 000 ლარის ოდენობით; მოქალაქეთა პოლიტიკური გაერთიანება „დემოკრატიული მოძრაობა-ერთიანი საქართველოს“ სასარგებლოდ განხორციელებული შემოწირულებების დამალვა (32 318 ლარის ოდენობით), ითვალისწინებს მიღებული შემოწირულების ორმაგი ოდენობის ჯარიმას, _ აღნიშნულია განცხადებაში.

“გურია ნიუსი” დაუკავშირდა ნესტან კირთაძეს და კომენტარი სთხოვა:

 _ამ ინფორმაციის შესახებ პრესით შევიტყვე. აქ რამდენიმე უზუსტობას აქვს ადგილი. სახელმწიფო აუდიტის სამსახური საპრეზიდენტო ფონდის დაფუძნებასთან ერთად, რეგულარულად ახდენდა მონიტორინგს საპრეზიდენტო ფონდზე და ეს ხორციელდებოდა ოფიციალური დოკუმენტების წარდგენით, რომელსაც ამზადებდა ფონდის ფინანსური დირექტორი და ადასტურებდა საარჩევნო შტაბი – ცენტრალურ საარჩევნო კომისიაში წარდგენილ ჩემს ოფიციალურ წარმომადგენლებთან და საარჩევნო შტაბის იურისტთან ერთად, _ გვითხრა კირთაძემ.

_ როდის წარმოადგინეთ ბოლოს ასეთი დოკუმენტაცია?

_ ბოლო ასეთი დოკუმენტაციის წარდგენა მოხდა დეკემბრის თვეში. რამ გამოიწვია ასეთი შეფასება ამ დროისთვის, ჩემთვის უცნობია, თუმცა, ცხადია, დაგეგმილია შტაბის ხელმძღვანელობის შეხვედრა აუდიტის წარმომადგენლობასთან 20 იანვარს. მეორეც, ვფიქრობ, რომ მეტ სიცხადეს და დაზუსტებას მოითხოვს რეგულაციები საარჩევნო ფონდებთან დაკავშირებით. დარწმუნებული ვარ, რომ ასეთ ვითარებაში აღმოჩნდებოდა ყველა კანდიდატის შტაბი.

_ აპირებთ ჯარიმის გადახდას?

_ სამწუხაროა, მაგრამ, როგორც ძველი რომაელები ამბობდნენ – კანონი კანონია. ჩემი ფინანსური ვითარებიდან გამომდინარე, უთუოდ რთულია საჯარიმო სანქციებზე საუბარი, მაგრამ მომიწევს მისი გადახდა.

“მონიტორინგის სამსახური კვლავ აგრძელებს გასული პერიოდისა და მიმდინარე პროცესების მონიტორინგს და მოახდენს შესაბამის რეაგირებას, რადგანაც სამსახური ვალდებულია, უზრუნველყოს პოლიტიკური პარტიების ფინანსური გამჭვირვალობა და პოლიტიკურ პროცესებში უკანონო თანხების გამოყენების ხელშეშლა”, – აცხადებენ უწყებაში.