“მე დღეს დავასახელებ იმ ადამიანების ვინაობებს, რომლებიც მამაჩემის მკვლელობაში არიან გარეულნი. ადრეც ვახსენებდი ყოფილ პოლიციელს სამეგრელოდან, მაგრამ დღეს კონკრეტულად დავასახელებ, ეს არის გურიკა ქადარია. ინფორმაცია მაქვს ჟურნალისტ ნანა ფაჟავასგან, რომელმაც 2013 წლის 21 მაისს გაიგო თუ ვის მიერ მოხდა მკვლელობის ორგანიზება და შესრულება. შემდეგ ფაჟავა თავად ამ პოლიციელს ესაუბრა და დაარწმუნა ის პროკურატურაში მიეცა ჩვენება. ფაჟავამ შეახვედრა ქადარია საოლქო პროკურორს ვალერი იოსავას 2013 წლის 27 მაისს და ქადარიამაც მისცა ჩვენება. როგორც ირკვევა მკვლელობამდე ცოტა ხნით ადრე ქადარია დაიბარა მეგის ქარდავამ და უბრძანა ორი სპეცნაზელის თბილისში წაყვანა, რომლებსაც გურამ შარაძე უნდა მოეკლათ. ეს სპეცრაზმელები არიან თემურ ჯგერენაია, მეტსახელად ჯგერე და გია ფაჩულია. ქადარიას მეგის ქარდავამ მისცა 5000 დოლარი და უთხრა, რომ დანარჩენ ინფორმაციას უკვე თბილისში “მასტერასგან” მიიღებდა. თანხა და ცეცხლსასროლი იარაღი, ქადარიას გადასცა კოხტა კოდუას ბიძამ. იარაღი კახა ლატარიას დახმარებით იქნა მოპოვებული. გურიკა ქადარიამ გადაწყვიტა არანაირი მონაწილეობა არ მიეღო მკვლელობაში და მიმართავდა სხვადასხვა ექიმებს ჯანმრთელობის გაუარესების გამო, რამაც გამოიწვია ეჭვი მეგის ქარდავაში და დაიწყო ზეწოლა ამ პოლიციელზე, ის ცოტა ხნით სამხარეო პოლიციაშიც იყო გამოკეტილი, სადაც მასზე ზეწოლას ახორციელებდნენ პოლიციელები-ლაშა ეხონია, ზაზა ხასაია და გურამ ჭითაია. შემდეგ ქადარია ერთობლივად დაიბარეს თენგიზ გუნავამ და მეგის ქარდავამ, ახლა უკვე საკუთარი დისშვილის დაკავება მოსთხოვეს ნარკოტიკების ჩადებით, რაზეც პოლიციელმა უარი განაცხადა და გუნავა ამის გამო ფიზიკურად იქვე გაუსწორდა. ამის შემდეგ ქადარიამ პატაკი დაწერა და სამსახურიდან წავიდა. შემდეგ ჩატარდა სპეცოპერაცია მის სახლში, გაჩხრიკეს, ამოიღეს ის იარაღი, რომელიც კოდუას ბიძამ გადასცა და ქადარიას დედისთვის ჰქონდა მიბარებული და დააკავეს ყოფილი პოლიციელი. ციხეში მასზე ხორციელდებოდა ზეწოლა, ხოლო მას შემდეგ, რაც დარწმუნდნენ, რომ ქადარია არ გაცსემდა მკვლელობის შესახებ არანაირ ინფორმაცია გამოუშვეს. 2012 წელს ის ჩაერთო საპარლამენტო არჩევნებში და საკუთარ სახლში “ქართული ოცნების” შტაბი გახსნა”.
რუსუდან შარაძე აცხადებს, რომ დღეს მის მიერ დასახელებული პიროვნებები, გარდა თემურ ჯგერენაიასი, რომელიც უკრაინაში გაურკვეველ ვითარებაში გარდაიცვალა, ისევ მაღალ თანამდებობებზე არიან და სტრუქტურებში მუშაობენ. შარაძე კატეგორიულად მოითხოვს მოწმის გურიკა ქადარიას და ჟურნალისტ ნანა ფაჟავას დაცვას. ის ასევე მიმართავს იმ მოწმეებს, რომლებმაც საკმაოდ კარგად იციან თუ რა მოხდა 2007 წლის 20 მაისს.
“მივმართავ მოწმეებს, რომლებიც სდუმან, სააკაშვილი და მისი ბანდა აღარ არსებობს, სამართლიანობას სახლში ლანგარით არავინ მოგართმევთ, იგრძენით პასუხისმგებლობა ქვეყნისა და მამაჩემის წინაშე და თქვით სიმართლე, ასევე მივმართავ იმ პოლიციელებს, რომლებმაც ძალიან კარგად იციან რა მოხდა 2007 წლის 20 მაისს ნუ სდუმან და დაიწყონ სიმართლის სადარაჯოზე დგომა”.
რუსუდან შარაძე მოითხოვს ახლადაღმოჩენილი გარემოებების გათვალისწინებით დაუყოვნებლივ დაიწყოს გურამ სარაძის მკვლელობის ხელახალი გამოძიება.
