გარდა “მხარეთა” ადვოკატებისა, კონსულტანტების ან მრჩევლებისა, ან კანონით გათვალისწინებული შემთხვევებისა,” _ ვკითხულობთ შეთანხმებაში მორიგების თაობაზე, რომელიც ბადრი პატარკაციშვილის ოჯახსა და საქართველოს სახელმწიფოს შორის შედგა.
შეთანხმებას საქართველოს სახელით ხელს აწერენ:
1. საქართველო, სათანადოდ წარმოდგენილი საქართველოს იუსტიციის მინისტრის პირველი მოადგილე ქ-ნი თინა ბურჯალიანის მიერ, რომელიც საქართველოს პრეზიდენტის 2011 წლის 30 ივნისის # 70 ბრძანებულების თანახმად უფლებამოსილია იყოს საქართველოს წარმომადგენელი და დადოს წინამდებარე დამატებითი შეთანხმება;
2. საქართველოს იუსტიციის სამინისტრო
3. საქართველოს იუსტიციის სამინისტროს გენერალური პროკურატურა,
4. საქართველოს შინაგან საქმეთა სამინისტრო
5. კონსტიტუციური უსაფრთხოების დეპარტამენტი
6. საქართველოს თავდაცვის სამინისტრო
7. საქართველოს ფინანსთა სამინისტროს ფინანსური პოლიცია (ამჟამად საგამოძიებო დეპარტამენტი)
8. საქართველოს ფინანსთა სამინისტროს საგადასახადო დეპარტამენტი (ამჟამად საქართველოს შემოსავლების სამსახური),
9. საქართველოს კომუნიკაციების ეროვნული კომისია
10. თბილისის მერია (1-10-მდე მხარეები მოიხსენიებიან როგორც “ქართული მხარეები”)
პატარკაციშვილების ოჯახის მხრიდან ხელმომწერები არიან:
ქ-ნი ინა გუდავაძე (“ი.გ.”), დაბ. 1955 წლის 20 თებერვალს თბილისში, საქართველო
11. ქ-ნი ლია პატარკაციშვილი, დაბ. 1983 წლის 17 მარტს თბილისში, საქართველო
12. ქ-ნი ლიანა ჟმოტოვა, დაბ. 1980 წლის 6 მაისს თბილისში, საქართველო და
13. ქ-ნი ნათელა პატარკაციშვილი, დაბ. 1933 წლის 1 მაისს თბილისში, საქართველო
(11-14-მდე მხარეები ერთობლივად მოიხსენიებიან როგორც “აპ-ს (არკადი პატარკაციშვილის. ავტ.) ოჯახის მხარეები”)
ამავე შეთანხმებაში, რომელსაც საქართველოს სახელით ყველა სამართალდამცავი უწყება წარმოადგენს, ვკითხულობთ:
“აპ-ს ოჯახის მხარეები” ადასტურებენ, რომ წინამდებარე შეთანხმების დადების დღეს:
(ა) მათ არ გააჩნიათ ტელეკომპანია “იმედთან” დაკავშირებით პრეტენზიები მისი ამჟამინდელი მფლობელის მიმართ ან “ქართული მხარეების” ან საქართველოს ორგანოების, სააგენტოების, ორგანიზაციების (საქართველოს პირდაპირ ან არაპირდაპირ მფლობელობაში მყოფი ან კონტროლირებადი ყველა ორგანიზაციის ჩათვლით), აგენტების ან წარმომადგენლების მიმართ.
(ბ) მათ არ გააჩნიათ პრეტენზიები “მთაწმინდის პარკთან” ან შპს “ლინქსთან” დაკავშირებით “ქართული მხარეების”, ორგანოების, სააგენტოების, ორგანიზაციების (საქართველოს პირდაპირ ან არაპირდაპირ მფლობელობაში მყოფი ან კონტროლირებადი ყველა ორგანიზაციის ჩათვლით) აგენტების ან წარმომადგენლებისა თუ “მთაწმინდის პარკის” ამჟამინდელი მოიჯარის ან ოპერატორის მიმართ.
2011 წლის 6 ივლისი _ საიდუმლო გრიფის დღე…
“ჩვენი ოჯახი კმაყოფილია იმით, რომ დღევანდელი ხელშეკრულებით დაისვა წერტილი მრავალწლიან დავაში. მგონი, ეს ძალიან პოზიტიური მოვლენაა”_ ამ განცხადებას ბადრი პატარკაციშვილის ქვრივი ინა გუდავაძე 2011 წლის 6 ივლისს, ხელისუფლებასთან გაფორმებული ხელშეკრულების შემდეგ აკეთებს.
“წერტილი დაესვა ყველა დავას, რომელიც მიმდინარეობდა, მე ხაზგასმით აღვნიშნავ საერთაშორისო არბიტრაჟში მიმდინარე დავას და განსაკუთრებით მივესალმებით იმ ფაქტს, რომ დავების დასრულებასთან ერთად და ყველა ღია საკითხის დახურვასთან ერთად ოჯახი, ქალბატონი ინა აპირებს გააგრძელოს ბიზნეს-საქმიანობა საქართველოში რაც ძალიან მისასალმებელია ბუნებრივია და იმედი გვაქვს, რომ წარმატებული იქნება ეს საქმიანობა.” _ განაცხადა ხელშეკრულების გაფორმების შემდეგ იუსტიციის მინისტრის მაშინდელი მოადგილემ თინა ბურჯალიანმა.
წინა ხელისუფლების დროს პატარკაციშვილების ოჯახს ერთხელაც არ გამოუთქვამთ პრეტენზია ამ გარიგებასთან დაკავშირებით. ისინი არც მედიასთან აკეთებდნენ კომენტარს. თემა დაიხურა.
2012 წლის 27 დეკემბერს, ბადრი პატარკაციშვილის ოჯახის წევრებმა ქალაქის მერთან, გიგი უგულავასთან ერთად საზეიმო ვითარებაში, შამპანურის თანხლებით გახსნეს ფუნიკულიორი. გახსნის ცერემონიალს ბადრი პატარკაციშვილის დედა, ნათელა პატარკაციშვილიც ესწრებოდა, რომელმაც განაცხადა, რომ ძალიან კარგი საქმე გაკეთდა და ეს ბადრის ოცნება იყო…
ბადრი პატარკაციშვილი: “იმედი” არ იყიდება…” 2007 წლის 10 ოქტომბერი…
“იმედი” არ იყიდება, მე არასოდეს ვიტყვი უარს ორ რამეზე: ღირსებასა და სიტყვის თავისუფლებაზე _ ასე განუცხადა პატარკაციშვილმა “იმედის” თანამშრომლებს 2007 წლის 10 ოქტომბერს…
პარლამენტარი შალვა შავგულიძე, რომელიც მაშინ ბადრი პატარკაციშვილს ინტერესებს იცავდა, “გურია ნიუსთან “საუბრისას იხსენებს, რომ პატარკაციშვილის სიკვდილის შემდეგ მას უთხრეს შეეტანა განცხადება სისხლის სამართლის საქმის შეწყვეტის მოთხოვნით, რაზედაც ადვოკატმა კატეგორიული უარი განაცხადა. ასეთი განცხადების შეტანა ნიშნავდა იმას, რომ საქმე დაიხურებოდა, პატარკაციშვილს კი ქვეყნის მოღალატის სტატუსი დარჩებოდა.
“რაც შეეხება ამ საქმეზე ჭეშმარიტების დადგენას, არც მედიის სათანადო ყურადღების ქვეშ მოექცა და სამწუხაროდ, მაშინ არც ბადრის მეუღლემ, ქალბატონმა ინამ გამოხატა აქტიური პოზიცია, რომ სისხლის სამართლის საქმე გაგრძელებულიყო და ბოლომდე მისულიყო. ასე რომ მომხდარიყო, მერწმუნეთ, უფრო თვალსაჩინო გახდებოდა ვიდეომასალის მონტაჟიც და სხვა სიყალბეებიც, რაც აღნიშნულ სისხლის სამართლის საქმეში, უხვად მოიპოვებოდა. საუბარია გაყალბებულ და დაუშვებელ მტკიცებულებებზე, რომელზეც მთელი ბრალდება იყო აგებული. ასეთ შემთხვევაში, შედეგი სულ სხვა იქნებოდა. სამწუხაროდ, ამ საქმეზე ჭეშმარიტების დადგენა ვერ მოხერხდა.” _ აცხადებს შალვა შავგულიძე “გურია ნიუსთან.”
გრიფით საიდუმლო ხელშეკრულების შესახებ პირველად ყოფილმა პრემიერ მინისტრმა ბიძინა ივანიშვილმა გააკეთა განმარტება. “გურია ნიუსისთვის” მიცემულ ინტერვიუში მან ექსკლუზიურად განაცხადა:
“მინდოდა, რომ რაც შეიძლება ადრე გამომზეურებულიყო ეს მასალები. პატარკაციშვილის ოჯახს ოდესღაც წაართვეს რაღაცეები და შემდგომ, ტელევიზიის სანაცვლოდ უკან დაუბრუნეს. როგორც მახსოვს 400 მილიონზეა საუბარი მათი შეფასებით, მაგრამ ეს რამდენად შესატყვისია და რამდენად სწორად იყო შეფასებული ცალკე საანალიზოა. პირადად მე არ წამიკითხავს. მხოლოდ იუსტიციის მინისტრის მოხსენება წავიკითხე. ამ საქმეს პროკურატურა იძიებს. შოკის მომგვრელი იყო ჩემთვის, რომ სახელმწიფო ჩინოვნიკი ხელს აწერს სუპერ კონფიდენციალურ დოკუმენტს, რომლის გახსნის უფლება ქვეყნის არსებობის ისტორიის მანძილზე არავის არ აქვს. ამ დოკუმენტს მეორე მხრიდან ოჯახის ყველა წევრი აწერს ხელს და იქ აშკარად ჩანს, როგორ ათმობინებენ ოჯახს ტელევიზიას და სანაცვლოს უბრუნებენ სახელმწიფო ქონების დიდ ნაწილს.”
გარანტირებული კონფიდენციალურობა და 400 მილიონად შეფასებული დუმილი…
“საქმე გვაქვს სისტემურ დანაშაულთან, თუ როგორ ეპყრობოდნენ ბიზნესს და მედიას. ტვ “იმედი” არის ამის კლასიკური მაგალითი. პატარკაციშვილის ოჯახი თანახმაა განსაჯაროვდეს დოკუმენტი და მოხდება მისი განსაჯაროვება. საქართველოს და საერთაშორისო საზოგადოება იხილავს, თუ როგორ მოხდა ამ ბიზნესის წართმევა. ეს იქნება სკანდალი და ყველა დამნაშავე იქნება პასუხისგებაში მიცემული.” _ განაცხადა 16 იანვარს მედიისთვის გამართულ შეხვედრაზე პრემიერ-მინისტრმა ირაკლი ღარიბაშვილმა.
მეორე დღეს, ამ საკითხთან დაკავშირებით, იუსტიციის მინისტრმა, თეა წულუკიანმა, ინა გუდავაძის ადვოკატებთან ერთად საგანგებო ბრიფინგი მოაწყო და განაცხადა:
“საქართველოს დღევანდელი მთავრობა, როგორც მხარე, შეთანხმდა ბატონი ბადრი პატარკაციშვილის ოჯახთან, მათი ადვოკატების წარმომადგენლობით, რომ საზოგადოებისთვის გახდეს ცნობილი 2011 წლის 6 ივლისის მორიგების ხელშეკრულებები.
ამ დღეს დადებული იქნა ორი ხელშეკრულება. მხარეები იყვნენ იუსტიციის სამინისტრო, მთავარი პროკურატურა, შს სამინისტრო, თავდაცვის სამინისტრო, თბილისის მუნიციპალიტეტი.
მორიგების ხელშეკრულებას ხელი მოაწერა იუსტიციის მინისტრის პირველმა მოადგილემ, თინა ბურჯალიანმა. მეორე მხარეს წარმოადგენდა ბადრი პატარკაციშვილის ქვრივი, დედა და ოჯახის სხვა წევრები.
ყველას კარგად ახსოვს, რომ 7 ნოემბრის შემდეგ პატარკაციშვილის წინააღმდეგ ხელისუფლებამ ტერორი აწარმოვა. გარდაცვალების შემდეგ ოჯახმა დაიწყო სამართლებრივი დავა, 2008 წელს საარბიტრაჟო წესით მოხდა საქმის ინიცირება საერთაშორისო საარბიტრაჟო სასამართლოში.
ოჯახი მიზნად ისახავდა “იმედის” დაბრუნებას, მთაწმინდის პარკთან დაკავშირებით ხელშეკრულების აღდგენას, ან 400 მილიონით დაკმაყოფილებას ბიზნესინტერესების დარღვევისთვის. მხოლოდ ამის გამო დაიწყო მოლაპარაკება. გაფორმდა 17 საწარმოსთან საგადასახადო შეთანხმებები და რეაბილიტაციის დასრულების პროცესში ხელშეწყობა.
თავიდან გაფორმდა თბილისის მუნიციპალიტეტთან მორიგების ხელშეკრულება მთაწმინდის პარკთან დაკავშირებით, პატარკაციშვილს გადაეცა რუსთავის ყოფილი მეტალურგიული ქარხნის მთლიანი ქონება. ეს უნდა ყოფილიყო გადაცემული ყოველგვარი ვალდებულებებისგან თავისუფალი, ეკონომიკის სამინისტროს უნდა გაეფორმებინა ხელშეკრულება და მაუდის ქარხნის აქციები გახდებობდა შესაბამისი ორგანოს ქონება.
ამის გამო შეწყვიტა ოჯახმა ბრძოლა “იმედის” დაბრუნებასთან დაკავშირებით, იძულების გზით უარი თქვა დავაზე სხვადასხვა კომპანიებთან დაკავშირებით. ჩვენი ხელისუფლების პირობებში ამ ხელშეკრულებებს მოეხსნა გრიფით საიდუმლო. ხელშეკრულებები იყო დაცული სპეციალური მუხლი “კონფიდენციალურობის შესახებ”.
ჩვენი ხელისუფლება გმობს იმ მიდგომას, რომელიც წინა ხელისუფლებამ პატარკაციშვილის წინააღმდეგ აწარმოა. ეს იყო ბიზნესზე სამაგალითო ზეწოლა, რომელიც განხორციელდა და იყო ის მოდელი, რომლითაც ბიზნესს ებრძოდა “ნაციონალური მოძრაობის” ხელისუფლება”, _ განაცხადა წულუკიანმა.
წულუკიანის ამ განცხადებას პასუხი მოჰყვა “ქართული ფოლადის” დირექტორის, ნათია ჯაყელის მხრიდან:
“ამ ფაქტზე სასაუბროდ რამდენიმე დღეში სპეციალურად შევხვდებით დაინტერესებულ პირებსა და მასმედიის წარმომადგენლებს. ჩვენ შეფასებებსა (და არა მარტო სამართლებრივს) გაგაცნობთ. ეს დრო იმისთვის გვჭირდება, რომ კარგად გავეცნოთ უკვე გამოქვეყნებულ დოკუმენტს და ვთარგმნოთ.
2011 წლის 6 ივლისს ხელმოწერილი შეთანხმება “ნაციონალური მოძრაობისთვის” “არასკანდალური და ჩვეულებრივია” საქართველოს ამჟამინდელი იუსტიციის მინისტრისთვის კი “პატარკაციშვილების ოჯახზე ძალადობის” ამსახველი დოკუმენტი.
დღეს მხოლოდ ერთი რამ შემიძლია ვთქვა:
1. ამ ურთიერთშეთანხმების შემდეგ ორ საათში სპეცრაზმმა იძულების წესით რუსთავის მეტალურგიული ქარხანა 15 წუთში დაგვატოვებინა.
2. ამ ურთიერთშეთანხმების საფუძველზე ინა გუდავაძემ და მისმა გუნდმა მაქინაციების გზით ორი სააქციო საზოგადოება “ქართული ფოლადი” და “თუჯი XXI” აქტივების გარეშე დატოვა.
3. ამ ურთერთშეთანხმების საფუძველზე ინა გუდავაძემ და მისმა გუნდმა ბიუჯეტიდან სულ მცირე 39 მილიონი მიითვისა.
4. ამ შეთანხმების საფუძველზე ინა გუდავაძე საარჩევნოდ “ნაციონალების” მხარდასაჭერად 2000 მუშა-მოსამსახურეს ატერორებდა.
5. ამ შეთანხმების საფუძველზე ინა გუდავაძე და მისი გუნდი ნაციონალური მოძრაობის წევრებს მათთვის საჭირო ინტერპრეტირებული დოკუმენტაციით ამარაგებდა.
6. უმთავრესი, ამ ბრძოლას ჩვენი მეგობრების ალიკო მაისურაძისა და ზაზა ნინიძის სიცოცხლე შეეწირა.
ეს სია შემიძლია უსასრულოდ გავაგრძელო და დეტალური მაგალითებიც მოვიხმო, მაგრამ ამას ალბათ რამდენიმე დღეში გავაკეთებ, მანამდე კი კიდევ ერთი:
საქართველოში უნდა დამთავრდეს დრო, როცა სამართალი და სიმართლე სტერეოტიპებისა და სპეკულაციის მსხვერპლი ხდება.
ქალბატონ თეა წულუკიანს კი შევახსენებ: ფიზიკური თუ იურიდიული პირი როცა შეთანხმებითა და სპეცრაზმით იტაცებს სხვის ქონებას მოძალადეა და არა დაზარალებული!
ის, ვინც ბიუჯეტის ფულს ითვისებს ქურდია და არა დაზარალებული!
ის ვინც სასამართლოს გადაწყვეტილებებს უარყოფს დაყადაღებულ ქონებას ყიდის დამნაშავეა და არა დაზარალებული!
ის, ვინც საზოგადოებას, ხელისუფლებას და სასამართლოს ატყუებს და აშანტაჟებს, მატყუარა და შანტაჟისტია და არა დაზარალებული!” _ ნათქვამია ნათია ჯაყელის განცხადებაში.
უპასუხოდ დარჩენილი კითხვები
თეა წულუკიანისა და ინა გუდავაძის ადვოკატების მოწყობილი პრესკონფერენცია 10 წუთში ისე დასრულდა, რომ ჟურნალისტებს კითხვის დასმის საშუალება არ მოგვეცა… ადვოკატებმა მხოლოდ ფურცელზე ამობეჭდილი ელექტრონული ფოსტის მისამართი დაგვიტოვეს, მაშინ როდესაც ადგილზევე შეეძლოთ ეპასუხათ საქართველოში არსებული თითქმის ყველა მედიასაშუალებისთვის, რომელიც სწორედ კითხვების დასასმელად იყო იქ მისული…
ჩვენ გვქონდა შემდეგი კითხვები:
1. რა სახის ძალდატანებას ჰქონდა ადგილი, თუ კონტრაქტის პირობები 3 თვე თანხმდებოდა მხარეებს შორის და ხელმოწერა განხორციელდა ინა გუდავაძის მხრიდან ბადრი პატარკაციშვილის ლონდონის სახლში?
2. ვისი მხრიდან მოხდა ზეწოლა ოჯახზე და ხომ არ არის ეს ხელშეკრულება თავისი აზრით კრიმინალური გარიგება, რადგან ძალდატანების ელემენტები არ იკვეთება და ორივე მხარე ამ გარიგებით მოგებული დარჩა?
3. ფაქტია, ძალდატანებას ადგილი რომ ჰქონოდა, მაშინ კონტრაქტი არ შესრულდებოდა და 2010 წლიდან დღემდე, ანუ თითქმის 4 წელი ოჯახს არ გამოუთქვამს საჯაროდ სახელმწიფოსგან ზეწოლის შესახებ პრეტენზია. უფრო მეტიც კონტრაქტის ყველა პირობა სახელმწიფოსგან შესრულდა (მეტალურგიული ქარხანა, მთაწმინდის პარკი, ცირკი და სხვა აქტივები გადაეცა ინა გუდავაძეს) და პლუს მიიღო ხელშეუხებლობა. პატარკაციშვილის ყოფილ ბიზნეს პარტნიორებზე კი აღიძრა სისხლის სამართლის საქმეები. რა ზეწოლაზეა საუბარი, როცა მთაწმინდის პარკის საზეიმო გახსნაზე პატარკაციშვილის ოჯახმა გიგი უგულავასთან ერთად, შამპანურით აღნიშნა ეს დღე?
4. ბიძინა ივანიშვილს, რომ არ წამოეწია ეს თემა, 4 წლის განმავლობაში არ წამოუწევიათ, რა იყო გაჩუმების მიზეზი? რატომ არ მოითხოვეს კონტრაქტის გაწყვეტა სახელმწიფოსგან 2012 წლის საპარლამენტო არჩევნების შემდეგ, როცა ხელისუფლებაში “ქართული ოცნება” მოვიდა?
5. კონტრაქტის პირობების მიხედვით სახელმწიფოს უნდა გადაეხადა ინა გუდავაძისთვის 400 მილიონი დოლარი. რამდენი მიიღო ინა გუდავაძემ აქტივების სახით და რამდენი მიიღო ფულადი სახით და საიდან?
იმ შემთხვევაში, თუ ინა გუდავაძე საჭიროდ ჩათვლის გვიპასუხოს ამ კითხვებზე, “გურია ნიუსი” მზადაა, გამოაქვეყნოს პასუხები.
