“მთავარი ასპექტია, როგორ ინიშნება მთავარი პროკურორი. მთავარი პროკურორის დანიშვნის პროცესი კრიტიკას ვერ უძლებს. ფარცხალაძის შემთხვევაში ჩვენ მოწმენი გავხდით, რომ ის იყო სამოქალაქო სექტორში გადასული ყოფილი პრემიერის კანდიდატურა და ბრმად მოხდა მისი დანიშვნა. საზოგადოებაში იყო მოლოდინი, რომ ახლა მთავრობა ფორმალურად მაინც დაიცავდა პროცედურებს და გამართავდა კონსულტაციებს იუსტიციის მინისტრთან, მაგრამ როცა ორი დღის წინ თეა წულუკიანი აცხადებდა, რომ არ იყო საქმის კურსში და არ იცნობდა კანდიდატურებს, იმის მაგივრად, რომ თავად განეხილა კანდიდატურები, შემდეგ კი მისი წარდგენით პრემიერი ნიშნავს მთავარ პროკურორს, აჩენს ბევრ კითხვას. ჩნდება განცდა, რომ პრემიერმა ისევ ერთპიროვნულად დანიშნა ახალი პროკურორი. აქედან გამომდინარე, ადამიანი, რომელიც სამი თვეა რაც პროკურატირის სისტემაში გადაიყვანეს და მერე მთავარ პროკურორად დანიშნეს, ბუნებრივია იძულებული იქნება მისი დამნიშნავის სურვილები აასრულოს. არ არის საუბარი კონკრეტულად ბადაშვილზე, აქ არის საუბარი დანიშვნის დემოკრატიულობაზე”.
მანანა ნაჭყებია აცხადებს, რომ ახალი მთავრობის მოსვლის შემდეგაც პროკურატურა რჩება მმართველი ძალის მართულ ძალად და ხელისუფლების დაპირება, რომ აღმოიფხვრებოდა ეს მანკიერება, დაპირებადვე დარჩა. პარტიის ლიდერის თქმით, ახალი პროკურორის მთავარი ტესტი იქნება მერაბიშვილის საქმესთან მიდგომა და არსებული კითხვების გაქარწყლება.
“ახალი პროკურორის მთავარი ტესტი იქნება მერაბიშვილის საქმესთან მისი დამოკიდებულება. ოპოზიცია, არასამთავრობო ორგანიზაციები, სახალხო დამცველი ამბობენ, რომ არ სჯერათ მოკვლევის შედეგად გავრცელებული ინფორმაციის, პრემიერი და მისი გუნდი კი აცხადებს, რომ კითხვები არ აქვთ და შესაბამისად პრობლემაც არ არსებობს, ამით ისინი “ნაციონალების” პრაქტიკას აგრძელებენ. თუ ჩვენ გვინდა შევდგეთ დემოკრატიულ სახელმწიფოდ, საჭიროა ერთ ფაქტზე მაინც დადგინდეს სამართალი, დადგინდეს ჭეშმარიტება, აღარ იყოს კითხვები და საბოლოოდ დაიხუროს თემა. აი, როგორ შეძლებს გიორგი ბადაშვილი ამას, დრო გვიჩვენებს”.
