უკვე ცნობილია სახელმწიფო რწმუნებულის-გუბერნატორის ადმინისტრაციის საჯარო მოხელეთა მუდმივმოქმედი საკონკურსო-საატესტაციო კომისიის წევრების ვინაობაც.
მუდმივმოქმედი საკონკურსო-საატესტაციო კომისიის შემადგენლობა ასეთია: გიორგი ჩხაიძე, სახელმწიფო რწმუნებული-გუბერნატორი _ კომისიის თავმჯდომარე; ივანე მენაბდე, სსიპ “ოზურგეთის იუსტიციის სახლის” მენეჯერი _ თავმჯდომარის მოადგილე; ნინო გობრონიძე, სსიპ “ოზურგეთის იუსტიციის სახლის” ხანგრძლივი სივრცის ოპერატორი _ თავმჯდომარის მოადგილე; მერაბ ჭანუყვაძე, სახელმწიფო რწმუნებულის-გუბერნატორის პირველი მოადგილე _ საპრეტენზიო კომისიის თავმჯდომარე; კომისიის წევრები: თეიმურაზ ქინქლაძე, პროფესიული კავშირის ოზურგეთის რაიონული ორგანიზაციის თავმჯდომარე, ოზურგეთის მუნიციპალიტეტის საკრებულოს წევრი, ლევან ჩხაიძე, დამოუკიდებელი სპეციალისტი, “პრივატ ბანკის” მენეჯერი, ნესტან ბილიხოძე, დამოუკიდებელი სპეციალისტი, როდერ მექავბიშვილი, დამოუკიდებელი სპეციალისტი, აუდიტი.
იმის შესახებ, თუ ვინ შეარჩია კომისიის წევრები და რამდენად სამართლიანი იქნება კომისიის გადაწყვეტილება, “გურია ნიუსთან” კომენტარს გურიის გუბერნატორი გიორგი ჩხაიძე აკეთებს.
_ წევრები მე შევარჩიე. ივანე მენაბდე შერჩეული იქნა, როგორც იურისტი; ასევე, თეიმურაზ ქინქლაძე, ლევან ჩხაიძე _ როგორც დამოუკიდებელი სპეციალისტი და ფინანსისტი, ნესტან ბილიხოძე _ დამოუკიდებელი სპეციალისტი, საქართველოს ბანკის თანამშრომელი და ფინანსისტი. კომისიის ძირითადი მაკომპლექტებელი იყო იურიდიული და ფინანსური კუთხე.
_ ბატონო გიორგი, როგორც ვიცით, ყველა მათგანს თქვენ უშუალოდ არ იცნობთ და სავარაუდოდ, მითითებები და რჩევები სხვისგან მიიღეთ.
_ ეს ადამიანები არ არიან სახელმწიფო სტრუქტურის წარმომადგენლები. ერთ-ერთი, მაგალითად, პროფესიული კავშირის წევრია. ჩვენ დავურეკეთ ამ კავშირის ცენტრალურ ოფისს და თვითონ ამ ორგანიზაციამ შემოგვთავაზა თემურ ქინქლაძის კანდიდატურა, რომელიც ოზურგეთის ორგანიზაციის თავმჯდომარეა.
_ ამავდროულად ნატანების მაჟორიტარი დეპუტატიც.
_ კი, ბატონო, გასაგებია.
_ რამდენად სამართლიან გადაწყვეტილებებს მიიღებს კომისია?
_ ალბათ, ეს შეკითხვა კომისიის წევრებიდან გამომდინარე გიჩნდებათ. ორი წევრი არის ფინანსისტი, კერძო სტრუქტურის _ ბანკის წარმომადგენელი. მე, პირადად, არც ერთ მათგანს არ ვიცნობდი _ აქ მოვიკითხეთ სპეციალისტები ამ სფეროში. განმსაზღვრელი იყო ნდობის მომენტი. ვერავინ ვერ იტყვის, რომ რომელიმე მათგანს ვიცნობდი. სპეციალურად ზუსტად იმიტომ შევარჩიე ამ კრიტერიუმით, რომ არ ეთქვათ, გუბერნატორის ინტერესებს ახორცილებენო.
_ ბატონო გიორგი, ჩვენი წყარო ამბობს, რომ თქვენ უკვე გაქვთ იმ ადამიანების სია, რომლებმაც უნდა დატოვონ სამსახური. წყარო იმასაც ამტკიცებს, რომ ტესტირება ფორმალურად ჩატარდება.
_ ძალიან კარგი, თუ იცით, ვინ დატოვებს სამსახურს და ვინ _ არა. კომენტარს მაშინ გავაკეთებ, თუ ატესტაციის შემდეგ თქვენ მიერ მოწოდებული ინფორმაცია გამართლდება. ისე, ასეთი სია ბუნებაში არ არსებობს, _ გვითხრა გუბერნატორმა.
