ჩხაიძე ამ კომპანიის 15%-იანი წილის მფლობელიცაა. რეესტრში ცვლილება 19 დეკემბერს, ჩხაიძის გუბერნატორად დანიშვნიდან 6 დღის შემდეგ არის გახორციელებული, თუმცა, იგი ისევ კომპანიის დირექტორად დარჩა.
_ შპს “ორბელის” დირექტორი აღარ ვარ, _ ამბობს ჩვენთან საუბრისას გიორგი ჩხაიძე.
_ რეესტრის მონაცემებით ხართ და, შესაბამისად, გუბერნატორობა და კერძო კომპანიის დირექტორობა კანონთან შესაბამისობაში ვერ მოდის…
_ მაგას თავისი პროცედურა აქვს. ფიზიკურად გადამდგარი ვარ, მაგრამ იურიდიულად, დოკუმენტები უნდა ჩაბარდეს საჯარო რეესტრს და ეს ყველაფერი უნდა შეიცვალოს. ჩემი განცხადების საფუძველზე მე უკვე დირექტორი აღარ ვარ.
_ რეესტრის ამონაწერით სხვა რამე ფიქსირდება.
_ რეესტრში რეგისტრაცია არის ერთი და განცხადება არის _ მეორე. თანამდებობას დირექტორი კარგავს განცხადების საფუძველზე, როდესაც მისი აქციონერთა კრება განცხადებას დაამოწმებს. შემდეგ უკვე ფირმის კომპეტენციაა, რომ ეს განცხადება ჩააბაროს საჯარო რეესტრს.
_ დამფუძნებლების მიერ დამოწმებული განცხადების გამოგზავნა შეგიძლიათ?
_ კი, რა თქმა უნდა. წაიკითხეთ ვინ არიან დამფუძნებლები?
_ რომ წავიკითხეთ, იმიტომაც გირეკავთ… დამფუძნებლები თქვენ და თქვენი ახლობლები ხართ…
_ ჰო, რაზეა ლაპარაკი, მე დავრჩი დამფუძნებლად.
_ რეესტრში ცვლილება 19 დეკემბერს არის შესული, მაშინ როცა თქვენ უკვე გუბერნატორად იყავით დანიშნული და არსად არ წერია, რომ გათავისუფლებული ხართ.
_ განცხადება, თუ არ მეშლება, 20-ში ან 21-ში დავწერე. თუ არ ვცდები, კანონით არის ორკვირიანი ვადა, რომ თუკი კანონთან შეუსაბამობაში მოდის თანამდებობა, შეასწორო.
გუბერნატორის თქმით, “ორბელი” არის კომპანია, რომელიც რამდენიმე კომპანიას მართავს და თავად არ ეწევა ეკონომიკურ საქმიანობებს.
კომპანიას საკმაოდ დიდი ქონება გააჩნია _ საქართველოს სხვადასხვა რაიონში ფლობს მიწებს, მათ შორის 500 კვმეტრ მიწის ნაკვეთს ბახმაროში.
გურიის პირველ პირს ქონებრივი დეკლარაცია ჯერ არ შეუვსია. თუმცა, როგორც ამბობს, მისი ყველა ქონება და შემოსავალი მალე აისახება შესაბამის დოკუმენტში: _ ეგ ყველაფერი ოფიციალურ დოკუმენტში იქნება ჩადებული. მე რამდენიმე კომპანიის სამეთვალყურეო საბჭოს თავმჯდომარეც ვიყავი.
სამართალმცოდნე ლევან ალაფიშვილის თქმით, სანამ სამეწარმეო რეესტრში არ დარეგისტრირდება დირექტორის ცვლილება, მანამ, სამართლებრივად, მესამე პირისთვის, სუბიექტი დირექტორად მიიჩნევა.
_ ბატონო ლევან, გუბერნატორის განმარტებით, მან განცხადება გადადგომის შესახებ რეესტრში ბოლოს გახორციელებული ცვლილების შემდეგ დაწერა. მისივე თქმით, რეესტრში რომ ცვლილება აისახოს, ამას გარკვეული დრო სჭირდება.
_ მაქსიმალური ვადა 4 დღეა. მოდით, გავყვეთ პროცედურებს _ იდეაში, დირექტორის უფლებამოსილება მესამე პირებისთვის სამართლებრივად მხოლოდ მას შემდეგ წარმოიშობა, რაც ასეთად რეგისტრირებული იქნება საჯარო რეესტრში. დირექტორის დანიშვნა-გათავისუფლებაზე გადაწყვეტილებას იღებენ პარტნიორები. მას შემდეგ, რაც პარტნიორები გადაწყვეტილებას მიიღებენ, ეს ფორმდება ოქმით და წარედგინება რეესტრს სარეგისტრაციოდ.
_ იმავე დღეს?
_ ეს მათზეა დამოკიდებული. თუკი თავისთვის დაიტოვებენ ამ ოქმს და არ წარადგენენ რეესტრში, ეს იქნება მათი ოქმი და დირექტორი, მაგალითად, არ იქნება უფლებამოსილი გააფორმოს ხელშეკრულება, მიიღოს რაიმე გადაწყვეტილება ან თანამშრომელი. რაც შეეხება გათავისუფლების პროცესს, ის ასე მიდის _ ან დირექტორმა უნდა მიიღოს გადაწყვეტილება გადადგომის შესახებ ან პარტნიორებმა უნდა გაუშვან. ყველა შემთხვევაში, საბოლოო ჯამში, ეს ფორმდება დოკუმენტით, შემდეგ ეს გადაწყვეტილება მიაქვთ სამეწარმეო რეესტრში. ამ ფაქტის რეგისტრაციის შემდგომ, კონკრეტული პირი აღარ ითვლება დირექტორად.
_ თავად ამბობს, რომ განცხადება აქვს დაწერილი…
_ გასაგებია _ დაწერა განცხადება პარტნიორების სახელზე.
შეთქმულების თეორიების და ასეთების არ მჯერა, მაგრამ არსებობს მანიპულირების საშუალება, როცა თვითონ ამბობს _ იცით რა, მე დავწერე განცხადება, აღარ ვარ დირექტორი, თუმცა, რეალურად დირექტორია.
“ახალგაზრდა იურისტთა ასოციაციის” იურისტის ჯაბა ზერეკიძის თქმით, გუბერნატორს არ აქვს უფლება, ასრულებდეს ანაზღაურებად სამუშაოს:
_ საჯარო სამსახურში ინტერესთა შეუთავსებლობისა და კორუფციის შესახებ საქართველოს კანონის შესაბამისად, სახელმწიფო რწმუნებული-გუბერნატორი წარმოადგენს თანამდებობის პირს; ამავე კანონის შესაბამისად, თანამდებობის პირს უფლება არ აქვს, ასრულებდეს რაიმე ანაზღაურებად სამუშაოს, გარდა სამეცნიერო, პედაგოგიური ან შემოქმედებითი საქმიანობისა, ან ეკავოს რაიმე თანამდებობა რომელიმე სხვა სახაზინო დაწესებულებაში ან სახაზინო საწარმოში, ან სხვა ქვეყნის ორგანოში ან დაწესებულებაში ან რომელიმე საწარმოში. თანამდებობის პირი თავისი და თავისი ოჯახის წევრის შეუთავსებლობის აღმოფხვრის დამადასტურებელ საბუთებს წარუდგენს იმ ზემდგომ თანამდებობის პირს (ორგანოს), რომლის უშუალო დაქვემდებარებაშიც იგი იმყოფება, აგრეთვე კადრების შესაბამისს სამსახურს. თანამდებობის პირი უნდა გათავისუფლდეს დაკავებული თანამდებობიდან: თუ მან ან მისი ოჯახის წევრმა დაარღვია ამ კანონით გათვალისწინებული თანამდებობრივი შეუთავსებლობის მოთხოვნები ან სასამართლო გადაწყვეტილებით დადასტურდა, რომ თანამდებობის პირის მფლობელობაშია უკანონო ან/და დაუსაბუთებელი ქონება, _ აღნიშნა “გურია ნიუსთან” საუბრისას ზერეკიძემ.
