“დღევანდელი ჩვენი შეხვედრის თემა იქნება ის ორი ფაქტი, რაც მოხდა გუშინ ლანჩხუთის რაიონის მუნიციპალიტეტის ადმინისტრაციულ შენობაში. ეს შეეხება იმ ადამიანების დასაქმებას, რომლებიც წინა ხელისუფლების პერიოდშიც მუშაობდნენ. ეს პროცესი დღემდე გრძელდება.
ეს არ არის პირველი შემთხვევა, მსგავსი სიტუაცია მანამდეც იყო. იმ ფონზე, როდესაც ბიუჯეტს არა აქვს სახსრები, რომ აიყვანოს დამატებითი კადრები, როცა შენობა გადაჭედილია, სკამიც კი აღარ არის საკმარისი, რომ დასაქმებული ადამიანები დასხდნენ, კონკრეტულ ადამიანებზე მიმდინარეობს სამსახურების მორგება. იქედან გამომდინარე, რომ რაც არ უნდა გასაკვირი იყოს, ეს ადამიანები იყვნენ “ნაციონალების” ძალიან აქტიური წევრები და ყოფილი გამგებლის, გია გოგუაძის მარჯვენა ხელი ყველა არჩევნებში. ჩემთვის გასაოცარია ის ფაქტი, რომ ამ ადამიანების დანიშვნას ხელს უწყობს ლანჩხუთის მუნიციპალიტეტის პირველი პირები, ისინი ვინც არიან აღმასრულებელი და წარმომადგენლობითი ორგანოს წარმომადგენლები.”
მისივე თქმით, საკრებულოს თავმჯდომარე, ამირან გიგინეიშვილი რამდენიმე ხნის წინ ხელშეკრულებას უფორმებდა ყოფილ ნაციონალს, თუმცა, როგორც კვირკველია ამბობს, კონკრეტულად მისი და ფრაქცია “რესპუბლიკელების” ჩარევის შემდეგ, რომლის წევრიც არის საკრებულოს თავმჯდომარე, ხელშეკრულება არ გაფორმდა:
“ერთი ფაქტი გუშინ წინ მოხდა საკრებულოში, ჩვენდა გასაოცრად ხორციელდება იმ ადამიანების დაბრუნება თანამდებობებზე, ვინც წინა ხელისუფლებას წარმოადგენდა. მიუხედავად ჩემი დიდი პატივისცემისა ამირან გიგინეიშვილის მიმართ, რომელმაც ხელშეკრულებაზე ხელი მოუწერა ადამიანს, რომელიც უნდა დანიშნულიყო საკრებულოს აპარატში, თუმცა, შუადღეზე, მას შემდეგ, რაც საქმეში ჩავერთეთ, “ქართული ოცნება- დემოკრატიული საქართველოს” კრება შედგა და ჩვენ მივმართეთ მას, რომ მსგავს ფაქტებს ადგილი არ ჰქონოდა. არ გამოვრიცხავ ეს ინფორმაცია უარყონ, მაგრამ არსებობს ამის დამადასტურებელი საბუთები, რომ მსგავს ფაქტს ადგილი ნამდვილად ჰქონდა.
რაც შეეხება მეორე ფაქტს, ის ეხება გამგეობის ერთ-ერთ სამსახურში, სოციალურ სამსახურში განყოფილების შექმნას. სამსახურის უფროსის მოხსენებითი ბარათი, რომ ითხოვენ განყოფილებას. სამსახურში უკვე არის ერთი განყოფილება – ვეტერანთა და გასაგებია, რომ უნდა იყოს კიდეც, მაგრამ განყოფილებას მართალი გითხრათ არც კი ვიცი რა ერქმევა, მაგრამ ვიცი, რომ კონკრეტული ადამიანის მოსარგებად ხდება ამ განყოფილების შექმნა.”
მისი თქმით, მუნიციპალიტეტის ხელმძღვანელმა პირებმა, რომლებიც ახალი ხელისუფლების სახელით არიან მოსული თანამდებობაზე, ასეთი რამ არ უნდა გააკეთონ:
მე რა მინდა ვთქვა, არიან ადამიანები, რომელთაც საკმაოდ კარგი განათლება აქვთ, მაგრამ 9 წლის განმავლობაში არ უმუშავიათ, გამომდინარე იქედან, რომ დამლაგებელიც კი ერთ პირთან შეთანხმებით ინიშნებოდა და არ არის საჭირო ისევ ძველი კადრების დაბრუნება, იქნებ იმ ადამიანებში გვეძებნა კანდიდატი და ის ადამიანი დავასაქმოთ, ვინც საკუთარ სიცოცხლეს შეუქმნა საფრთხე, საკუთარი ოჯახი დადო სასწორზე.
მე მივმართავ ამ ორ ადამიანს, არ დაუშვან ასეთი შეცდომები, მაშინ, როცა ისინი მოვიდნენ ამ თანამდებობებზე ახალი ხელისუფლების სახელით, ერთი მათგანი არის “რესპუბლიკური” ფრაქციის წევრი, რომლის თავმჯდომარეც ამ კონკრეტულ ფაქტებს გმობს, მეორე არის “ქართული ოცნების” კვოტით მოსული აღნიშნულ თანამდებობაზე. არც ერთ მათგანთან არანაირი პირადული პრეტენზია არ გამაჩნია, მე ვარ ფრაქცია “ქართული ოცნების” თავმჯდომარე და ამ ყველაფრიდან გამომდინარე მაქვს პოლიტიკური ვალდებულება იმ ადამიანების წინაშე, ვინც დღესაც ქუჩაშია, ჩემთან ერთად სიკვდილს ჩახედეს თვალებში, უსამსახუროდ არიან. თუ ჩატარდება კონკურსი, მიიღონ ყველამ მონაწილეობა, არ ვარ ამის წინააღმდეგი,” _ განაცხადა ბრიფინგზე მაკა კვირკველიამ.
“გურია ნიუსი” კომენტარისთვის საკრებულოს თავმჯდომარე ამირან გიგინეიშვილს დაუკავშირდა:
“არავინ დაგვისაქმებია და არავისთან გაგვიფორმებია ხელშეკრულება. ჩვენთან არაერთი ადამიანი მოდის დასაქმების თხოვნით, მაგრამ ეს არ ნიშნავს, რომ ყველას ვასაქმებთ. რომ გვდებს ბრალს, ხომ უნდა იყოს დადასტურებელი? არ არის დანიშნული არავინ,” _ გვითხრა გიგინეიშვილმა.
“გურია ნიუსმა” კომენტარი ასევე მუნიციპალიტეტის გამგებელ ზაზა ურუშაძეს სთხოვა:
“ამ განყოფილების შექმნის შესახებ განცხადებით მოგვმართა სოციალური სამსახურის უფროსმა. თუმცა, საფინანსო სამსახურის უფროსთან ერთად გავარკვიეთ, რომ ჩვენ ამის ფინანსები არ გვაქვს. სამსახურში ამ ეტაპზე არსებობს ვეტერანთა განყოფილება, მაგრამ სავარაუდოდ, ეს განყოფილება ვეტერანთა საქმეების დეპარტამენტის დაქვემდებარებაში გადავა. თუმცა, ამ ეტაპზე ასეთი რამ არ მომხდარა, განყოფილება სოციალურ სამსახურთან არსებობს და დამატებით კიდევ ერთ განყოფილებას ვერ დავამატებთ. ამდენად, ახალი განყოფილება არ შეიქმნება,” _ დასძინა ურუშაძემ.
