“მოვუწოდებ პროკურატურას და გამოძიებას, რომ კარგად გაარკვიონ ლევან ბუხაიძის და ქალაქის სამმართველოს მაშინდელი ხელმძღვანელის მერაბ ბაღათურიას როლი გირგვლიანის საქმეში. მე მაქვს ეჭვი, რომ სავარაუდოდ გირგვლიანი ბუხაიძის მიერ არის მოკლული და ამის ჩაფარცხვაში ხელი შეუწყო ქალაქის სამმართველოს მაშინდელმა ხელმძღვანელობამ. ბუხაიძეს მიეხმარნენ, რომ რაღაცნაირად ეს საქმე კონსტიტუციური დეპარტამენტისკენ წასულიყო.”
_ გერონტი ალანიამ და ამ საქმეში ბრალდებულმა სხვა პირებმა დანაშაული აღიარეს. თქვენ კი ამბობთ, რომ ეს საქმე კუდს ტყუილად დაბრალდა?
_ კი ბატონო, კუდის ხალხი ვინც იყვნენ გასამართლებულები, არ უარყოფენ , ჩვენ ავიყვანეთ და ვცემეთო , მაგრამ გირგვლიანი გაიქცა. ესენი წამოვიდნენ. ის და ბუხაიძე ორივე დატოვეს იქ და მერე გირგვლიანი არის დილას ნაპოვნი გარდაცვლილი. ექსპერტიზის დასკვნაა ისეთი, რომ შოკში ჩავარდებით საზოგადოება. ასე რომ მაგათ ურჩევნიათ კარგად გაარკვიონ ამ ორი ადამიანის როლი.
_ ლევან ბუხაიძე იყო სანდრო გირგვლიანის მეგობარი. მისი მოკვლისთვის რა მოტივი უნდა ჰქონოდა?
_ მოტივი არა, მაგრამ საქმეში დევს ისეთი საქმის მასალები, რომ . მოკლედ მე ამ ეჭვს არ გამოვთქვამდი, რომ არ მქონდეს აბსოლუტური დასაბუთება. საქმის მასალებით ის საბუთდება, რომ გირგვლიანის საქმეზე რამდენჯერაც არის ბუხაიძე დაკითხული, იმდენჯერ ურთიერთსაწინააღმდეგო ჩვენებები აქვს მიცემული. რაც შეეხება პატივცემულ ბაღათურიას და ბუხაიძეს, საქმეში არის ისეთი სკანდალური მონაცემები, რომ ეს საქმე ძალიან ცუდად დამთავრდება ზოგიერთისთვის.
_ ბატონო ირაკლი, რამდენადაც ვიცი გამოძიების მიერ გაფრთხილებული ხართ, რომ გეკრძალებათ საქმის მასალების გამჟღავნება. როგორ აპირებთ იმ სკანდალური დოკუმენტის გასაჯაროებას?
_ დიახ, მე გაფრთხილებული ვარ, რომ არ გავამჟღავნო მასალები, მაგრამ ჰაერზე არაფერს ვამბობ. მე ამას გავასაჯაროებ, დაე მე ვაგო ამისთვის პასუხი, მთავარია რომ სიმართლე არ დაიმალოს და ერთხელ და სამუდამოდ ნათელი მოეფინოს. მე გავაკეთებ ამას ჩემი პირადი ინტერესების ხარჯზე. მოთხოვნილი მაქვს ალტერნატიული ექსპერტიზა, მაგრამ არ მაძლევენ ამის საშუალებას. სასამართლო სამედიცინო ექსპერტიზის დანიშვნის მიზნით ვითხოვდი რომ მოეცათ უფლება რომელი მტკიცებულება შეიძლებოდა წარმედგინა ალტერნატიული ექპსერტიზისათვის და პასუხი დღესაც არ მაქვს მიღებული. შემიზღუდეს დაცვის უფლება, თვითონაც ვერ მოიპოვეს ეს დასკვნა და ელოდებიან უკვე მერამდენე თვეა. გამოძიება ჩიხშია შესული და გარწმუნებთ ვერასოდეს ვერ დაასრულებენ ამას.
მთავარი პროკურატურა ადვოკატის მოსაზრებას, რომ გირგვლიანის საქმის გამოძიება ჩიხშია შესული არ ადასტურებს.
“გამოძიება მიდის ჩვეულებრივი წესით, არ შეფერხებულა. ერთი წუთითაც არ გაჩერებულა და ძალიან მალე საზოგადოებისათვის ცნობილი გახდება შედეგები. არანირი პრობლემა არ აქვს გამოძიებას, უბრალოდ დრო სჭირდება დასრულებას,” _ ამბობს პროკურატურის საზოგადოებასთან ურთიერთობის სამსახურის უფროსი თემურ დოლიძე.
დათა ახალაიას ადვოკატის ბრალდებას მტკიცებულებების განადგურებისა და საქმის ჩაფარცხვის შესახებ აბსურდულს უწოდებს თბილისის მთავარი სამმართველოს ყოფილი უფროსი მერაბ ბაღათურია.
“მე არ გამოვრიცხავ, რომ ეს ადვოკატები ისეთ ჩიხში არიან შესულები, რომ შანტაჟზე მოდიან. თუ რამე მტკიცებულება და ფაქტები გააჩნია გამოაქვეყნოს და მერე პასუხს აგებს სიცრუეზე და საზოგადოების შეცდომაში შეყვანის გამო. რაც შეეხება ჩემი გვარის დასახელებას ამ საქმეში, ეს მხოლოდ მისი ფანტაზიის ნაყოფია. საქმის მასალები სახეზეა, აქტიურად ვთანამშრომლობ გამოძიებასთან ამ საქმეზე და ძალიან მალე პროკურატურა შედეგს დადებს.”
“გურია ნიუსი” ლევან ბუხაიძესაც დაუკავშირდა. მას კომენტარის გაკეთება არ სურს, თუმცა ამბობს, რომ ადვოკატ ზაქარეიშვილის ბრალდება აბსურდულია და რეალურად სულ სხვა მიზნებს ისახავს.
“ეს ყველაფერი აბსურდულია. თვით მათ პროკურორებსაც არ გასჩენიათ ასეთი ეჭვი, ან რა მოტივი უნდა მქონოდა? გამოძიების ინტერესებიდან გამომდინარე არ ვაპირებ ვინმესთან პოლემიკაში შესვლას, მით უმეტეს ასეთ სულელურ განცხადებებზე კომენტირება არ მიმაჩნია საჭიროდ,” _ ამბობს ბუხაიძე.
“გურია ნიუსის” წყაროს ინფორმაციით, ადვოკატ ირაკლი ზაქარეიშვილს სერიოზული პრობლემები აქვს თავად ახალაიას ოჯახთან. ეს დაპირისპირება დათას სახელით სოციალურ ქსელში წერილის გავრცელებას მოყვა. როგორც ჩვენი წყარო ამბობს, ზაქარეიშვილი ახალაიებთან ვალშია და ცდილობს როგორმე გამოასწოროს დაშვებული შეცდომა. გარდა ამისა დათა ახალაიას დღეს ახალი ბრალი წარუდგინა პროკურატურამ და დაცვა სულ სხვა საქმეზე ცდილობს ყურადღების გადატანას.
