როგორც გამგეობაში აღნიშნავენ, აღნიშნული თანხა წყლის რეაბილიტაციის ნაწილობრივ შეკეთებას მოხმარდა და არა მთლიან რეაბილიტაციას.
“გურია ნიუსს” ბახვის მცხოვრებლები კვლავ უკავშირდებიან და სოფელში უწყლობასთან დაკავშირებულ პრობლემებზე ესაუბრებიან. ისინი ამბობენ, რომ სოფლის მხარდამჭერი პროგრამით გამოყოფილი თანხა არამიზნობრივად იხარჯება, რაც იმაში გამოიხატება, რომ სამუშაოები არ შესრულებულა კეთილსინდისიერად.
_ ვერავისგან გავიგეთ, ვინ უნდა აგოს პასუხი აღნიშნული პრობლემის გამო. ყველა ერთმანეთს აბრალებს, ჩვენ არავის ცუდი არ გვინდა, არც არავის დაჭერა, მაგრამ ჩვენი, ხალხის ფული მოგვახმარონ ხალხს, წყალს ვითხოვთ! _ ამბობენ ბახველები “გურია ნიუსთან”.
ოზურგეთის მუნიციპალიტეტის გამგეობაში კი აცხადებენ, რომ “წყლის სისტემის მასალების შეძენა არ განუხორციელებია შემსრულებელს, რის გამოც მას ჯარიმა დაეკისრა”.
“გურია ნიუსის” ინფორმაციით, ინდმეწარმე, რომელსაც აღნიშნული სამუშაოები უნდა შეესრულებინა, მირიან მამალაძეა. ის ამ თემასთან დაკავშირებით კომენტარს არ აკეთებს.
“გურია ნიუსი” უკვე წერდა ბახველთა ამ პრობლემის შესახებ, რომელიც წლებია, აწუხებს მოსახლეობას. მოსახლეობის თქმით, “ყოველ წელს მიმდინარეობს წყალგაყვანილობის სისტემის შეკეთება, თუმცა, სამუშაოები უხარისხოდ ტარდება და ეს პრობლემა მუდამ გადაუჭრელია.”
როგორც “გურია ნიუსს” ბახვის მცხოვრებლებმა უთხრეს, 7 თვეა, სოფელს წყალი არ მიეწოდება. ამ ინფორმაციას “გურია ნიუსთან” ოზურგეთის მუნიციპალიტეტის სოფელ ბახვის ტერიტორიული ერთეულის რწმუნებული, იური ვაშალომიძეც ადასტურებს: _ უწყლობა უპირველესი პრობლემაა. ხალხი გაწვალებულია, მაგრამ რა ქნან? შეეჩვივნენ და კმაყოფილდებიან იმით, რაც აქვთ. ზოგი ჭით სარგებლობს. წყლის მილები ამორტიზებული და დამსკდარია. მოძველებულია მთლიანი სისტემა, რასაც დაემატა აგვისტოს სტიქია _ მოიშალა სათავე ვაკიჯვარში, საიდანაც მოდის წყალი ბახვში, _ გვითხრა სოფელ ბახვის რწმუნებულმა, იური ვაშალომიძემ.
“გურია ნიუსის” ინფორმაციით, წყლის პროექტი 2013 წლის ნოემბერში უნდა დასრულებულიყო, თუმცა, როგორც ვიცით, სამუშაოები ჯერაც არ არის შესრულებული.
“გურია ნიუსმა” ოზურგეთის მუნიციპალიტეტის გამგეობის ინფრასტრუქტურის სამსახურის უფროსს, თემურ გიორგაძეს მიმართა, რომელმაც ჩვენს კითხვებს თავი აარიდა:
_ რამდენჯერ უნდა მკითხოთ ბახვის შესახებ? ერთხელ ხომ გიპასუხეთ? _ გვითხრა მან.
_ ბატონო თემურ, ჩვენ მოგვმართავს მოსახლეობა და კითხვებსაც მათი ინტერესებიდან გამომდინარე გისვამთ.
_ მოქალაქეები მელოდებიან და არ მცალია.
_ ბახვში მცხოვრები მოსახლეობის პრობლემები თქვენს ინტერესში არ შედის? ხალხს აინტერესებს, რაში დაიხარჯა სოფლისთვის გამოყოფილი თანხა და როდის ექნებათ წყალი.
_ მოგვწერეთ წერილობით და გიპასუხებთ.
_ შესრულებულ სამუშაოში წყლის რეაბილიტაციისთვის თანხა უკვე გადახდილი გაქვთ?
_ ნაწილობრივ კი.
რა თანხა იყო გამოყოფილი სოფლის მხარდამჭერი პროგრამით სოფელ ბახვში წყლის რეაბილიტაციისთვის, რატომ არ არის შესრულებული პროექტი, გადახდილი აქვს თუ არა ოზურგეთის მუნიციპალიტეტის გამგეობას თანხა ინდმეწარმისთვის, რომელსაც უნდა შეესრულებინა სამუშაო, ჩაიბარა თუ არა პროექტი გამგეობამ და დაეკისრა თუ არა სანქცია ინდმეწარმეს შეუსრულებელი სამუშაოსთვის? _ ამ კითხვებით ოზურგეთის მუნიციპალიტეტის გამგეობას ოფიციალურად მივწერეთ, საიდანაც ასეთი პასუხი მივიღეთ: “2013 წელს, ბახვის თემში წყლის სისტემის ნაწილობრივი რეაბილიტაციისთვის გამოყოფილია 83 990 ლარი. სამწუხაროდ, ბახვში წყლის მთლიანი სისტემა ამორტიზირებულია და კაპიტალურ შეკეთებას საჭიროებს. მოსახლეობის აზრის გათვალისწინებით, “სოფლის მხარდაჭერის პროგრამის ფარგლებით” გათვალისწინებული თანხა წყლის სისტემის ნაწილობრივ შეკეთებას მოხმარდა და არა მის მთლიან რეაბილიტაციას. წყლის სისტემის შეკეთებასთან დაკავშირებით ოთხი ხელშეკრულება გაფორმდა. ორი ეხება წყლის სისტემისთვის მასალების შეძენას, ორი კი სისტემის სარეაბილიტაციო სამუშაოებს. აღნიშნული პროექტები მუნიციპალიტეტს ჩაბარებული აქვს შესრულებული სამუშაო აქტის შესაბამისად. ვაკიჯვრის წყლის სისტემის სათავო ნაგებობასა და მაგისტრალზე ჩატარებული სარემონტო სამუშაოების გამო ბახვში შეჩერდა წყლის სისტემაზე მიწის მიყრის სამუშაოები, რადგანაც მაგისტრალში არ იყო წყალი და ვერ ხერხდებოდა შეკეთებული მაგისტრალის შემოწმება. გამომდინარე აქედან, არ განხორციელდა მიწის უკუმიყრის სამუშაოები, რასაც დაერთო კლიმატური პირობების გაუარესება, აღნიშნული სამუშაოები უახლოეს პერიოდში შესრულდება. გამგებელი პროექტს არ იბარებს, პროექტის მიმღები არის მუნიციპალიტეტის ინფრასტრუქტურული პროექტების მთლიანი ან ნაწილობრივი სამშენებლო სამუშაოების, ასევე, სხვადასხვა პროექტების ფარგლებში მიღებული საქონლისა და მომსახურების შემსწავლელი კომისია. წყლის სისტემის მასალების შეძენა არ განუხორციელებია შემსრულებელს, რის გამოც, მას ჯარიმა დაეკისრა”.
