_ ოზურგეთის მუნიციპალიტეტის სოფლების 80 პროცენტს წლებია, ეს პრობლემები აწუხებს. მოსახლეობის განცხადებით, თითქმის ყოველ წელს, სოფლის მხარდამჭერი პროგრამით სახელმწიფოს მიერ გადმორიცხული თანხით აღნიშნული პრობლემის მოგვარებას ითხოვენ, თუმცა, თანხები იმდენად მიზერულია და ამ პრობლემის მოგვარებას ვერ ახერხებენ.
“გურია ნიუსს” ოზურგეთის მუნიციპალიტეტის სოფელ ბაღდადის მცხოვრებლები თავიანთ სოფლის ყველაზე დიდ პრობლემაზე ესაუბრებიან.
გურამ ლომინაძე: _ სადაა, ბატონო, წყალი? როგორ გეკადრებათ?! სამი წლის წინ იყო, მაგრამ მერე რა მოხდა, არ ვიცით. სამი წელია, სოფელ ბაღდადის მოსახლეობას წყალი არ მოგვეწოდება. ვაკიჯვარში გამოიყვანეს და ჩვენ, ბაღდადელები დაგვტოვეს. მოითხოვე, რამდენიც გინდა, ან ვის უნდა მოსთხოვო? ვინ გააკეთებს? გვქონდა ვაკიჯვრის წყალი, მოვითხოვეთ ახლა სოფლის მხარდამჭერი პროგრამითაც, მაგრამ ვის ესმის? რაც მათ უნდათ და იოლად გასაკეთებლად მიაჩნიათ, იმას აკეთებენ, რამდენიმე მოსახლეს სპეციალური ჭა გვაქვს ეზოში, მაგრამ ვისაც არ აქვს, იმან რა უნდა ქნას? უწყლობა შეიძლება? წყალი უნდა ყველაფერს!
ბადრი ჩხაიძე: _ სადაა წყალი? ნახევრამდე გამოიყვანეს და გაჩერდა შუა გზაზე. ფული არ აქვთო, ასე თქვეს. მოსახლეობა, სოფლის მხარდამჭერი პროგრამებით, უპირველესად წყალს ვითხოვთ, ასევე, გამრიცხველიანების პრობლემა გვაქვს _ 21-ე საუკუნეში მეზობლები ერთმანეთს გადაკიდებული არიან, დავალიანება მოდის ძალიან დიდი და არის გაურკვევლობა _ 30 ოჯახს ზედმეტად 4-4 ლარი მოგვივიდა დავალიანება. მოკლედ, ამ გაჭირვებული ხალხისთვის არაფერი შეცვლილა, ვერაფერს იგრძნობ, ვართ ისევ ისე, როგორც ადრე.
_ იცით, რა გაკეთდა ბაღდადში სოფლის მხარდამჭერი პროგრამით?
_ არ ვიცი, რა გაკეთდა და ამაზე პასუხს ნახევარი სოფელი ვერ გაგცემს. იმას რომ არ გააკეთებენ, რაც გჭირდება და აუცილებელია სოფელში, სხვა რა უნდა იცოდე? ქვედა ბაღდადში ხომ საერთოდ არანაირი წყალი არ არის. გამოიყვანეს ერთ კილომეტრზე და მორჩა. ჩვენ პატრონი არასდროს არ გვყოლია. დასამალი არც არაფერი მაქვს და არც არაფრის მეშინია.
ლოლა ვასაძე: _ არავინ არაფერს არ გააკეთებს მაინც. რამდენიც გინდა თქვი და ილაპარაკე, რა აზრი აქვს?! წყალი არ არის, გამრიცხველიანება ხომ ერთი კიდევ ყველაზე დიდი მოუგვარებელი პრობლემაა. სიცოცხლე მოგვისპეს მაგით, სულ ამაზე გვაქვს ჩხუბი. წამოდით, ნახეთ, საიდან ვეზიდები წყალს _ მეზობელს აქედან 100 მეტრში აქვს ჭა და იქედან მომაქვს. წარმოგიდგენიათ, რა დღეში ვიქნები? გაფუჭებულია მილები, სულ დახეთქილია. კომუნისტების დროინდელი მილებია მიწაში. ზაფხულში ამობრძანდით და გაგიჟდებით, რომ ნახავთ წყალზე რაც ხდება _ ჭაში წყალი შრება, გორაზე რომ ხალხი ცხოვრობს, უნდა ნახოთ, რა დღეში არიან.
ოზურგეთის მუნიციპალიტეტის სოფელ ცხემლისხიდი-ბაღდადის ტერიტორიული ერთეულის რწმუნებული დავით ჭანუყვაძე “გურია ნიუსთან” აღნიშნავს, რომ უწყლობა მართლაც ძალიან დიდი პრობლემაა, რომლის მოგვარება დიდ თანხებთან არის დაკავშირებული:
_ სოფელ ბაღდადში ეს პრობლემა ახალი ნამდვილად არაა. წლების განმავლობაში, რაც თანხები გამოიყო სოფლის მხარდამჭერი პროგრამით, ყველა წყალში ჩაიდო და არ ეყო კიდევ. ეს იყო, დაახლოებით, 20 000 ლარი მარტო ბაღდადისთვის. ძირითადი აუზი არის ვაკიჯვარში, საიდანაც უნდა მიეწოდოს წყალი ბაღდადელებს, ვაკიჯვრიდან დავიწყეთ და შეიცვალა 1 კილომეტრი სიგრძის მილი, ნაწილი თანხით წინა წლის სოფლის პროექტებიდან ჰქონდათ შეძენილი 800 მეტრი მილი, 400 მეტრი მილი კი წლევანდელი წლით შევიძინეთ. პრობლემაა წყლის სათავეზეც, სადაც მოსახლეობა თვითონ დადის შესაკეთებლად. ამ პრობლემის მოგვარებისთვის 20 000 ლარი იყო ძალიან მიზერული თანხა. ინდმეწარმემ, რაც შეიძლებოდა აღნიშნული თანხით გაკეთებულიყო, ის გააკეთა. ეს თვითონ მოსახლეობამ აირჩია პრიორიტეტად. რაც შეეხება გამრიცხველიანებას, იცით, რომ ეს კერძო კომპანიის პრეროგატივაა და ინფორმაცია არ გვაქვს, როდის დაიწყება ამ პრობლემის მოგვარება, _ გვითხრა ჭანუყვაძემ.
