“დავით რუსიშვილის მიმართ განხორციელდა მორალური, ფსიქოლოგიური და ფიზიკური ზეწოლა”

მკვლელობა 2011წლის 17 ოქტომბერს თბილისში, რუსთაველის გამზირზე მოხდა.  ფაქტი რუსთაველის გამზირზე განლაგებული 4 გარე სათვალთვალო ვიდეო კამერით არის დაფიქსირებული.

განაჩენის მიხედვით, ზურაბ ტარაშვილის მკვლელობის მიზეზი, 2010 წელს გრიბოედოვის ქუჩაზე  მომხდარი, 21 წლის სანდრო გოგბერაშვილის  მკვლელობა გახდა.  ინციდენტში, რომელსაც ეს მკვლელობა მოჰყვა, სხვებთან ერთად მონაწილეობდა ზურა ტარყაშვილი, რომელიც ამ ინციდენტში მონაწილეობის გამო დააპატიმრეს და ხულიგნობისა და იარაღის უკანონო ტარების მუხლით საპროცესო შეთანხმებით 2 წლით თავისუფლების აღკვეთა მიუსაჯეს. 1 წლის და 7 თვის შემდეგ, 2011 წლის ოქტომბრის დასაწყისში ტარყაშვილი ვადამდე გათავისუფლდა პატიმრობიდან და ათიოდე დღეში, 17 ოქტომბერს იგი რუსთაველზე იქნა მოკლული.

მკვლელობაში რუსიშვილთან ერთად ბრალდებული იყვნენ 2 წლის წინ მოკლული სანდრო გოგბერაშვილის მამა ივერი გოგბერაშვილი და  ირაკლი აგლაძე.

დავით რუსიშვილის ადვოკატი გელა ნიკოლაიშვილი  გაცხადებით, მისი დაცვის ქვეშ მყოფს ტარყაშვილი არ მოუკლავს.  რაც გაშიფრული ვიდეო კამერის ჩანაწერებიდან ჩანს. თუმცა სასამართლომ უარი თქვა ექსპერტის მიერ მომზადებული დასკვნის მოსმენაზე. ივერი გოგბერაშვილი და  ვინმე ირაკლი აგლაძე მიიმალნენ, დავით რუსიშვილი მკვლელობის მეორე დღეს საკუთარ სახლში დააპატიმრეს. “ბრალდების ვერსიით, ივერი გოგბერაშვილმა, რომელსაც რამდენიმე წლით ადრე კიდევ ერთი შვილი მოუკლეს, დაიფიცა შვილის საფლავზე, რომ ყველას დახოცავდა, ვინც მისი შვილის მკვლელობაში იღებდა მონაწილეობას, განურჩევლად იმისა, მისი შვილის მიმართ ხულიგნობის ბრალდება დაუმტკიცდათ თუ მკვლელობის, ხოლო ვინაიდან დავით რუსიშვილი გოგბერაშვილის მეზობლად ცხოვრობდა გრიბოედოვის ქუჩაზე და მის მოკლულ შვილთან ახლობლობდა, ბრალდების მხარემ და სასამართლომ ჩათალეს, რომ ლოგიკურად სწორედ ის უნდა მიებათ ამ საქმესთან მითუმეტეს, რომ მკვლელობაში მონაწილე ყველა სავარაუდო პირი გაქცეული იყო. ასეთ გახმაურებულ მკვლელობას დაკავებული ბრალდებულის გარეშე ვერ დატოვებდნენ. ასეთი მიკერძოებით გამოძიებული საქმე განიხილა 2012 წლის 15 ივნისს ნაფიც მსაჯულთა სასამართლომ.”

ადვოკატისაზრით, “იმ შემთხვევაში, თუ მოსამართლე დააკმაყოფილებდა პროფესორ გია დეკანოზიშვილის მიერ გაშიფრული და გასუფთავებული მასალის სასამართლო სხდომაზე დემონსტრირების და მის მიერ სასამართლოზე განმარტების მიცემის შუამდგომლობას, ყველასათვის ნათელი გახდებოდა, რომ დავით რუსიშვილს არავითარი შეხება არ ჰქონია ზურაბ ტარყაშვილის მკვლელობასთან. რადგან უტყუარად დადასტურდებოდა, რომ საქმეში არსებულ ვიდეო კადრებზე დაფიქსირებულ 3 პირს შორის რუსიშვილი არცერთი არ არის.”

ექსპერტი, გია დეკანოზიშვილის განმარტებით, მისი სახელი და გვარი მოწმეების სიიდან ამოიღეს და სასამართლოზე დასკვნის წარდგენის უფლება არ მისცეს, რითაც დასტურდება, რომ დავით რუსიშვილი არ არის მკვლელი. ” მე ვიყავი მოწმეების სიაში და სასამართლოში უნდა წარმედგინა ეს დასკვნა. თუმცა გაირკვა, რომ მოწმეთა სიიდან ამოღებულია ჩემი გვარი. ადვოკატებმა ვერანაირი ხერხით ვერ შეძლეს დავებრუნებინეთ მოწმეთა სიაში. მინდა გითხრათ, რომ ვიდეო ფირზე აღბეჭდილ ფაქტზე გავაკეთე დასკვნა, რითაც დასტურდება, რომ ის ვინც  ხელს ადებს რუსიშვილს მანქანიდან ვერ დაინახავდა. ასევე კადრების გადიდების შემდეგ, აშკარად ჩანს, რომ პიროვნება რომელიც გადარბის ქუჩაზე არ არის რუსიშვილი.

ჩემს მიერ მომზადებული დასკვნის სასამართლოზე არ გატანა საფუძველს გვაძლევს, რომ გაპიარებული საქმის შემდეგ, სხვა გზა არ ჰქონდა პროკურატურას და დავით რუსიშვილი უსამართლოდ გაწირეს. ვიდეო კადრების გაშიფვრამ აჩვენა, რომ რუსიშვილი მკვლელობაში მონაწილეობას არ ღებულობდა. შესაძლოა სხვა რამეში მონაწილეობას ღებულობდა. მაგრამ, იმ პიროვნებებიდან რომელიც სასამართლოში წარდგენილი იყო, როგორც მკვლელი, დასკვნის მიხედვით დავით რუსიშვილი იქ არ იყო.”

როგორც ადვოკატი გელა ნიკოლაიშვილი აცხადებს: “სასამართლომ მხედველობაში არ მიიღო პოლიციის სამმართველოს შენობაში დავით რუსიშვილზე განხორციელებული ზეწოლის ფაქტი. მისი დაკავების დღეს.  კერძოდ, 2011 წლის 18 ოქტომბერს მთელი ღამის განმავლობაში რუსიშვილთან ოჯახის ადვოკატის არდაშვება, ხოლო მეორე დღეს გამოძიებისთვის სასურველი ადვოკატის, ხათუნა ვაჭრიძის შემთხვევის ადგილზე დასწრება. ასეთი საქციელის გამო, ადვოკატ ხათუნა ვაჭრიძის პროფესიული საქმიანობასთან შეუთავსებელი, არაეთიკური საქციელი განიხილა საქართველოს ადვოკატთა ასოციაციის ეთიკის კომისიამ და ვაჭრიძეს 18 თვით ჩამოართვა საადვოკატო საქმიანობის უფლება.

 აშკარაა, რომ როგორც წინასწარი, ისე სასამართლო გამოძიება წარიმართა მიკერძოებულად, ბრალდების მხარის მიერ მოწმეებზე ზემოქმედებით, მტკიცებულებათა გაყალბებით, ხოლო სასამართლოს მხრიდან, დაცვის მხარის მტკიცებულებების არდაშვებით და ხელოვნური იგნორირებით. აღნიშნულიდან გამომდინარე, იმის გამო, რომ ბრალდების მხარის წარმომადგენლების, პროკურორებისა და გამომძიებლების მხრიდან სასამართლომდე და სასამართლოს მიმდინარეობის პერიოდში დავით რუსიშვილის მიმართ განხორციელდა მორალური, ფსიქოლოგიური და ფიზიკური ზეწოლა, უნდა მოხდეს ამ საქმის ხელახალი გამოძიება და იმ პირთა დასჯა, ვინც თავისი “წვლილი” შეიტანა უდანაშაულო დავით რუსიშვილის დამნაშავედ გამოცხადების საქმეში.”