ინფრასტრუქტურის სამუშაოები ახლაც მიმდინარეობს. დაგვიანებით გამოყოფილმა თანხამ (წლეულს პირველად გამოიყო ბახმაროს ინფრასტურქტურის მოსაწესრიგებლად 56 ათასი ლარი) კურორტზე ამოსულებს დაპირებული კომფორტი ვერ დაახვედრა: ახალი წყალსადენით ბახმაროს წყალი ჯერ კიდევ არ მიეწოდება _ შარშანდელის მსგავსად, ონკანებთან დამსვენებლების რიგები ისევ დგას; პრობლემაა ელექტროენერგიის მიწოდების საქმეშიც _ მიუხედავად ახალი ბოძებისა, დენი ხშირად ითიშება. ამ კუთხით სიახლე ისაა, რომ მდინარის მარჯვენა მხარეს მოსახლეობას დენი წელს პირველად მიეწოდა. როგორც გვითხრეს, აქ შუქი 20 წელია, არ ანთებულა. აღსანიშნავია ისიც, რომ ბახმაროში ჩართულია გარე განათებაც, თუმცა, იგი დღეგამოშვებით ირთვება _ ყოველ შემთხვევაში, ჩვენი ბახმაროში ყოფნის პირველ დღეებში ასე იყო.
ელექტროენერგიის საფასური წელს გაძვირებულია _ თუკი გასულ წელს ფეშენებლურ კოტეჯში შუქის შეყვანა 50 ლარი ღირდა, ხოლო ჩვეულებრივ სახლებში _ 30 ლარი, წელს შესაბამისად 100 და 60 ლარი ღირს.
როგორც “ენერგო პრო ჯორჯიას” ჩოხატაურის სერვისცენტრის მენეჯერი სერგო გეგეშიძე ამბობს, დამსვენებლები 60 ლარზე მეტ ელექტროენერგიას წვავენ:
_ 60-ის კი არა, 160 ლარის ელექტროენერგიას წვავენ. ყველაფერი დენზე აქვთ შეერთებული, მთელი დღე ელექტროღუმელები უნთიათ, _ გვითხრა გეგეშიძემ.
ისევ შეუღობავია ქვესადგური. მიუხედავად დაპირებისა, რომ წელს მაინც შემოღობავდნენ, მაღალი ძაბვის ელექტროენერგიის წყარო ისევ ღიაა, რაც საფრთხეს უქმნის იქვე მოთამაშე ბავშვების სიცოცხლეს.
კურორტის “დირექტორები” საშა წიქარიძე და ჯონი კუტუბიძე არიან. დამსვენებლები, მათ მიმართ კმაყოფილებას გამოთქვამენ და ამბობენ, რომ პრობლემების მოგვარებაში ეხმარებიან,
პოლიცია, სახანძრო, საავადმყოფო მზადყოფნაშია. ყველა ამ უწყების წარმომადგენელი, ჩვენთან საუბრისას ამბობს, რომ დამსვენებლებს პრობლემები არ ექმნებათ.
დასუფთავების მანქანა ყოველ დილით დადის, თუმცა, ბევრ უბანში ნაგვის ურნა არ დგას, რაც მოაგარაკეებისთვის სერიოზული პრობლემაა.
გასულ კვირას, ბახმაროში ასულმა გურიის გუბერნატორმა, ვალერი ჩიტაიშვილმა ჩოხატაურის ხელისუფლებას დაავალა, რომ კურორტზე ურნები დაემატებინათ:
_ იშოვეთ, შეკერეთ და ნაგვის ურნები ყველა უბანში დადგით. მთავარია, ხალხს პრობლემა არ შეექმნას, _ თქვა გუბერნატორმა.
ვალერი ჩიტაიშვილის დავალება, ჩოხატაურის ხელისუფლებამ მეორე დღესვე შეასრულა. ოღონდ საკუთარი ინტერპრეტაციით _ ურნები დაბა ჩოხატაურის ქუჩებიდან აიღეს და ბახმაროში აიტანეს. ამ ფაქტს სკანდალის გარეშე არ ჩაუვლია _ როგორც გოგიბერიძის ქუჩის მცხოვრებლებმა ჩვენთან საუბრისას აღნიშნეს, გამგეობამ გასულ წელსაც იგივე გააკეთა: _ შარშანაც ჩვენი ქუჩიდან აიღეს ურნები. ასეთი რამე გაგონიათ? ჩვენ წაგვართვეს და ბახმაროში წაიღეს. რომ შევეწინააღმდეგეთ, აქეთ დაგვემუქრნენ, საერთოდ არ გავიტანთ ნაგავს და ბუზები რომ შეგჭამთო, _ აღნიშნეს ჩვენთან საუბრისას გოგიბერიძის ქუჩის მცხოვრებლებმა.
გამგებელი გია გიორგაძე ამბობს, რომ ბახმაროში ის ურნები აიტანეს, რომელიც ჩოხატაურში ზედმეტი იყო(?!).
კურორტზე ერთი მნიშვნელოვანი პრობლემა მოგვარდა _ დასახლებული ადგილებიდან მოშორებით ნაგავსაყრელი გაკეთდა და, იმედია, წლეულს ნაგავს მდინარეზე აღარ გადაყრიან.
ვალერი ჩიტაიშვილი ამბობს, რომ მომავალ სეზონზე პრობლემები კიდევ უფრო ნაკლები იქნება. გუბერნატორი არ გამორიცხავს, რომ ამ უნიკალური კურორტით ინვესტორებიც დაინტერესდნენ.
