“დღეს ჩვენ კიდევ ერთხელ ვფიქრობთ იმის შესახებ, რომ რით დაიმსახურა ქართველმა ხალხმა ამდენი წყალობა. უფალმა მოიღო ამდენი მადლი საქართველოზე. ჩვენ ამას ვერ ავხსნით. ნათქვამია, რომ ადამიანი ხედავს სახესა კაცისასა, ღმერთი კი ხედავს გულსა კაცისასა. აი, ამიტომ ჩანს, რომ მთლად დაკარგულები არ ვართ. ქართველ ადამიანს მოსიყვარულე გული გააჩნია, ამიტომ უფალი წყალობს საქართველოს. წმინდა ნინო ეს არის უდიდესი საუნჯე. უდიდესი მადლი, რომელიც უფალმა მოიღო საქართველოზე. ნათქვამია, რომ სადაც იქნება საუნჯე შენი, იქ იქნება გული შენი. უნდა ვეცადოთ იმისათვის, რომ დავაგროვოთ სულიერი საუნჯე. უნდა გავუფრთხილდეთ ჩვენს სულიერ საუნჯეს. როცა ჩვენი მეფეები და პატრიარქები მიდიოდნენ უცხოეთში, უპირველეს ყოვლისა, მათ საქართველოში ჩამოჰქონდათ არა – ოქრო და ვერცხლი, არამედ – სიწმინდეები. ყველაზე მდიდარი იყო და არის საქართველო ამ სიწმინდეებით. ეს სიწმინდეები თავის დიდ საქმეს აკეთებენ. ჩვენ უნდა გვახსოვდეს, რომ წმინდა ნინო არამარტო ისტორიული პიროვნებაა, არამედ დღეს ცხოვრობს ჩვენთან ერთად და გვეხმარება ჩვენ და საქართველოს,” _ აღნიშნა პატრიარქმა.
მრევლი სიონის საკათედრო ტაძარში, წმინდა ნინოს ვაზის ჯვარზე სამთხვევად შეიკრიბა. წელიწადში ორჯერ, როდესაც ნინოობა აღინიშნება, 27 იანვარს წმინდანის გარდაცვალების დღეს, და 1-ელ ივნისს წმინდა ნინოს საქართველოში შემობრძანების დღეს, ვაზის ჯვარს გამოაბრძანებენ და მრევლს სიწმინდის მოლოცვის საშუალება ეძლევა.
” დღეს სიონში მოვედი იმიტომ, რომ მინდა ჩემი შვილების, ქვეყნის, პატრიარქისთვის ვილოცო. გამთლიანებას ვუსურვებ საქართველოს. როცა კი ვახერხებ ამ დღესასწაულზე ყოველთვის მოვდივარ, რომ ვემთხვიო წმინდა ნინოს ჯვარს და მადლი წავიღო ჩემს ოჯახში,” _ გვითხრა ნინო ბერიძემ.
ნინოობა მართლმადიდებელ მრევლს სიონში მისულმა საქართველოს პრეზიდენტმა გიორგი მარგველაშვილმაც მიულოცა.
წმინდა ნინოს ვაზი ჯვრის მოლოცვა დღეს 5 საათამდე იქნება შესაძლებელი. სწორედ ამ დრომდე იქნება სიწმინდე ტაძარში გამობრძანებული.
