რეგიონული განვითარების და ინფრასტრუქტურის მინისტრის დავით ნარმანიას განცხადებით, სტუდენტთა დაფინანსებისთვის სპეციალური პროგრამა მუშავდება და მათ სიას სამთავრობო კომისიას ადგილობრივი მუნიციპალიტეტებიდან მიაწვდიან.
“შემდეგი სემესტრის დაწყებამდე 10 დღით ადრე, ანუ 7 თებერვლამდე, ადგილობრივმა თვითმმართველობებმა იმ სტუდენტთა ზუსტი სია უნდა მოგვაწოდონ, რომლებიც ადგილობრივი მაცხოვრებლები არიან და ამავდროულად აკრედიტირებულ სასწავლებლებში სწავლობენ. განათლების სამინისტროსთან ერთად მოვამზადებთ შესაბამის განკარგულებას, რომ მთავრობის სხდომაზე იქნას ეს გადაწყვეტილება მიღებული,” _ აღნიშნა ნარმანიამ.
“დამატებითი დაფინანსება ჯერ არ ვიცით, რამდენ სტუდენტს შეეხება, იმიტომ რომ ჯერ არ არის დამატებითი სიები წარმოდგენილი. ამ ეტაპზე საზღვრისპირა რაიონებიდან 236 სტუდენტია დაფინანსებული, აქედან 11 მაგისტრანტია, დანარჩენი – ბაკალავრები,” _ განაცხადა განათლებისა და მეცნიერების მინისტრის მოადგილე ლიკა გიგაურმა.
სამთავრობო კომისიის სხდომაზე გაეროს პროგრამის UNHCR -ის ფარგლებში განხორციელებულ დახმარებებზეც ისაუბრეს.
“გაერომ მარტოხელა ოჯახებისთვის და სოციალურად დაუცველი მოსახლეობის დახმარებისთვის, რომლებიც გამყოფ ზოლზე ცხოვრობენ, გამოყო თანხები და მადლობის მეტი რა გვეთქმის. კარგი იქნება, სხვა საერთაშორისო ორგანიზაციებიც თუ მიბაძავენ მას. იმედია, ეს წელი იქნება განსაკუთრებული ყურადღების წელიწადი გამყოფი ხაზის მიმდებარე სოფლებისთვის. გაზაფხულზე ყველა სოფელში დასრულდება გამრიცხველიანება და გაზიფიცირება, ანუ ყველა ოჯახში უფასოდ გაზი შევა, რაც ძალიან მნიშვნელოვანია. კომპანია “სილქნეტმა” თავის თავზე აიღო ვალდებულება და ნიქოზის ამბულატორიისათვის საჭირო აპარატურა, ასევე ქურთის საავადმყოფოსთვის ეხოსკოპიის აპარატი, ახალგორის რაიონისთვის კი ლაბორატორიის აღჭურვილობა შეიძინა. იმედია, მას სხვა კომპანიებიც მიბაძავენ,” _ განაცხადა შერიგებისა და სამოქალაქო თანასწორობის საკითხებში სახელმწიფო მინისტრმა პაატა ზაქარეიშვილმა.
კომისიის სხდომაზე ბუფერულ ზონებში ზამთრის სამზადისისთვის განკუთვნილ დახმარებაზეც ისაუბრეს.
“ზამთრის დასაწყისამდე მთავრობის გადაწყვეტილებით დაახლოებით 10-ათასამდე ოჯახმა სათბობით უზრუნველყოფასთან დაკავშირებით 200 ლარიანი დახმარება მიიღო. გარდა ამისა, სპეციალურად შეირჩა სოციალურად დაუცველთა კატეგორია, რომლებზე 500 ლარიანი დახმარება გასცა გაეროს პროგრამა UNHCR-მა, თუმცა დარიგების პროცესი ჯერ-ჯერობით დასრულებული არ არის. კიდევ დარჩა რამდენიმე ათეული ოჯახი, რომლებიც დახმარებას კომერციული ბანკების საშუალებით მიიღებენ,” _ აღნიშნა დავით ნარმანიამ.
გამყოფი ხაზის მიმდებარე სოფლებში დაზარალებული მოსახლეობის საჭიროებებზე რეაგირების დროებითმა სამთავრობო კომისიამ ასევე მიიღო გადაწყვეტილება მომდევნო 2 წლის სამოქმედო გეგმის მომზადების შესახებ, სადაც სამთავრობო უწყებები ჩაეწრთვებიან და კონკრეტული სამოქმედო გეგმები იქნება გაწერილი.
შეგახსენებთ, რომ აღნიშნული კომისია საქართველოს მთავრობის დადგენილების საფუძველზე 2013 წლის ოქტომბრის დასაწყისში შეიქმნა.
