“საქართველოს თაიგულს” ელექტროენერგია არ მიეწოდება

სოფელ წითელმთაში უკვე იმყოფებიან აჭარა-გურიის სააღსრულებლო ბიურის წარმომადგენლები. “საქართველოს თაიგულის” დირექტორმა, ილია ბასილაშვილმა ჩვენთან საუბრის დროს განაცხადა:

_ მინდა გითხრათ, რომ ამ საქმის უკან დგას ოზურგეთის მუნიციპალიტეტის გამგებლის მოვალეობის შემსრულებელი, კონსტანტინე შარაშენიძე. ასევე მინდა გითხრათ, რომ ადამიანი, რომელიც მედავება ეს არის ი.გოგუაძე, კონსტანტინე შარაშენიძის დეიდა. მე არაფერი მაქვს უკანონოდ გაკეთებული. საწარმოს ვამუშავებ და ხალხი მყავს დასაქმებული. ბოლო წლის განმავლობაში კარგი ურთიერთობა ავაწყვე ჩეხეთთან და ახლაც ელოდებიან ჩაის მიღებას ჩვენგან, მაგრამ შეიქმნა პრობლემები და როდის მოგვარდება ეს საკითხი არავინ არ იცის. ამ წუთებში, როდესაც მივედი წითელმთაში უჩემოდ დამხვდა ელექტრო სადენები მოხსნილი.

_ ბატონო ილია, შეგიძლიათ კონკრეტულად აგვიხსნათ, რა დავაზე არის საუბარი?

_ სოფელ წითელმთაში შპს “საქართველოს თაიგულის” საწარმოს მეზობლად მცხოვრებმა იზოლდა გოგუაძემ 2004 წელში მისი თანხმობით დადგმული ბოძები 2012 წელს სადაო გახადა და სარჩელით მიმართა ოზურგეთის რაიონულ სასამართლოს – ილარიონ ბასილაშვილის წინააღმდეგ, დადგმული ელექტრო ბოძების აღების თაობაზე – სასარჩელო მოთხოვნა “კერძო საკუთრების ხელშეშლის აღკვეთა”, ოზურგეთის სასამართლომ ი. გოგუაძის მოთხოვნა არ დააკმაყოფილა. გოგუაძემ ოზურგეთის სასამართლო გადაწყვეტილება გაასაჩივრა ქუთაისის სააპელაციო სასამართლოში. ქუთაისის სააპელაციო სასამართლომ მოპასუხე არ სცნო ილარიონ ბასილაშვილი და მოპასუხე მხარედ აღიარა შპს “საქართველოს თაიგული”. საქმე ხელახალი განხილვისთვის დაუბრუნდა  ოზურგეთის რაიონულ სასამართლოს. ოზურგეთის რაიონულმა სასამართლომ არც მეორეჯერ არ დააკმაყოფილა ი.გოგუაძის სასარჩელო მოთხოვნა – დაუსაბუთებლობისა და უსაფუძვლო მოთხოვნის მოტივით.

2013 წელს ი.გოგუაძემ ისევ გააგრძელა დავა ქუთაისის სააპელაციო სასამართლოში. გოგუაძემ თავიდანვე გაიძახოდა ჩემს ნათესავს საქმ,ე გადაწყვეტილი აქვს და მაინც მოვიგებო. ქუთაისის სააპელაციო სასამართლომ სხდომაზე, რომელსაც არ ესწრებოდა ი.გოგუაძეს მხარე, გამოიტანა გადაწყვეტილება ი.გოგუაძეს სააპელაციო მოთხოვნის დაკმაყოფილებაზე, ნაწილობრივ – “აღებულ იქნას იზოლდა გოგუაძის საკუთრებაში არსებული საკარმიდამო მიწის ნაკვეთიდან ელექტრო ბოძები და ელექტროგადამცემი ხაზები. შპს “საქართველოს თაიგული”-მ აღნიშნული გადაწყვეტილება  გაასაჩივრა უზენაეს სასამართლოში. გასაჩივრებული დოკუმენტაციას დაერთო მამტკიცებელი საბუთი – სსიპ ლევან სამხარაულის სახელობის სასამართლო ექსპერტიზის ეროვნული ბიუროს დასკვნა, სადაც წერია, რომ “ოზურგეთის მუნიციპალიტეტი, სოფ. შემოქმედში მდებარე შპს “საქართველოს თაიგული”-ს კუთვნილი ელ. გადამცემი ხაზის ხუთი ბოძის, სპეციალური GPS ხელსაწყოს მეშვეობით აზომვის შედეგად  დადგინდა, რომ ერთი ბოძი განთავსებულია ი. გოგუაძის სახელზე რეგისტრირებული მიწის ნაკვეთის საკადასტრო საზღვრებს შიგნით.

ყველა სასამართლო სხდომაზე ვაპელირებდი, რომ ელ. ბოძები არ იყო ი. გოგუაძის კერძო საკუთრებაში და სასამართლოს მივუთითებდიო, რომ მის მიერ წარმოდგენილი დოკუმენტი შეიცავდა სიყალბეს.

და ბოლოს მინდა გითხრათ, რომ წერილით უკვე მივმართე აჭარა-გურიის სააღსრულებლო ბიუროს აღმასრულებელს, ქალბატონ ნინო ლომთათიძეს, ეს მოხდა 2013 წლის ნოემბერში, მაგრამ მისგან წერილობით პასუხი არ მიმიღია.

სოფელ წითელმთაში მყოფმა სააღსრულებლო ბიუროს წარმომადგენლებმა პრესასთან კომენტარი არ გააკეთეს. ეს ჩანაწერი ბატონ ილია ბასილაშვილთან საუბრის დროს გაკეთდა: _ მე ვარ პაატა წილოსანი აჭარა-გურიის სააღსრულებლო ბიურის აღმასრულებელი და ვეყრდნობი სასამართლოს გადაწყვეტილებას და არაფერს უკანონოს არ ჩავდივართ. შეგიძლიათ, რომ მობრძანდეთ ჩვენთან სამსახურში და წერილობით დააფიქსიროთ თქვენი აზრი.

“გურია ნიუსი” შეეცადა ი.გოგუაძის ჩაწერა, მაგრამ მან ჩვენს სატელეფონო ზარს არ უპასუხა. ოზურგეთის მუნიციპალიტეტის გამგებლის მოვალეობის შემსრულებელმა, კონსტანტინე შარაშენიძემ გვითხრა, რომ  ის, რასაც ილია ბასილაშვილი მის შესახებ ამბობს არის ტყუილი.

_ მე რა შუაში ვარ ამ საქმესთან დაკავშირებით? შეგიძლიათ ადვოკატ კახა ჩავლეშვილს ჰკითხოთ და ის გეტყვით ყველაფერს, – გვითხრა კონსტანტინე შარაშენიძემ.