როგორც კომისიის ერთ-ერთმა წევრმა, გაზეთ “რეზონანსის” მთავარმა რედაქტორმა ლაშა ტუღუშმა დღეს გამართულ პრესკონფერენციაზე განაცხადა, შინგან საქმეთა სამინისტროში დაცული მასალა, რომელიც მოიცავს 789 საათს, 28 687 ფაილს, 24 კასეტას, ძირითადად პოლიტიკური ხასიათისაა და მისი გამოძიება დროში არ უნდა გაიწელოს.
“კომისიას ბოლო შეხვედრა ექნება ხვალ. ფინალური დოკუმენტი არ არის დასრულებული. ძალიან მნიშვნელოვანია, რა დასკვნას დადებს კომისია. ამის საფუძველზე გავარკვევთ, რამდენად კარგად იმუშავა მან. სამწუხაროდ კომისიამ 5 თვე ჩააგდო. შეიკრიბა “ავარიულ რეჟიმში”. თუმცა მას აქვს საბოლოოდ კარგი პროდუქტების დადების შანსი. რაც შეეხება შეკითხვებს, თუ გადაეცემა პროკურატურას ეს ძალიან დიდი ოდენობით მასალები, მაშინ უკვე პროკურატურის მოედანზე წავა თამაში. პროკურატურის საქმეა, რამდენად სწრაფად იმუშავებს და დადებს შედეგებს, თუ ვინ იდგა ამ სიბინძურის უკან. მან არა დაბალი ღობე უნდა მოძებნოს, არამედ – რეალური დამკვეთები, ვინ აგროვებდა ნახევარ საქართველოზე ინფორმაციას. ვინ იყო ჩართული ასეთ უკანონო მოქმედებებში. წინააღმდეგ შემთხვევაში, თუ ამას პროკურატურა არ გააკეთებს, გაჩნდება ეჭვი, რომ ის ხელს აფარებს ვიღაცას.
იმ მასალებში არის კომპრომატები მაშინდელ ოპოზიციურ ლიდერებზე, საზოგადოებრივად აქტიურ ადამიანებზე, რელიგიურ მოღვაწეებზე, მედიის წარმომადგენლებზე და ა.შ. სახელმწიფოს ვალია, დაადგინოს ვინ ჩაიდინა, ეს თუ ის დანაშაული. ჯერ-ჯერობით არანაირი მოკვლევა არ დაუწყია პროკურატურას. ის ადამიანები, ვინც იყვნენ ჩართული მსგავსი მასალების მოპოვებაში, არ უნდა იკავებდნენ თანამდებობას”,_ განაცხადა ლაშა ტუღუშმა.
