_მუხროვანის ამბოხზე დაპატიმრებულთა საქმეზე ერთ-ერთი პროკურორი ნათია სონღულაშვილი იყო. სწორედ ის, რომელიც ახლა ვანოს და ჩემი ბრალმდებელია. მაშინ ქალბატონი პროკურორი აღმკვეთი ღონისძიების სახით დაკავებულთა პატიმრობას ითხოვდა და ვანო მერაბიშვილის მიერ ჩატარებული ანტიტერორისტული ოპერაციის მიზანშეწონილობას ასაბუთებდა. საინტერესოა, ახლა რას ფიქრობს ქალბატონი პროკურორი ღარიბაშვილ-ჩოკუტაევის მიერ გავრცელებულ ვიდეოზე?! _ კითხვას სვამს ჭიაბერაშვილი.
ნათია სონღულაშვილმა “გურია ნიუსთან” საუბრისას აღნიშნა, რომ ზურაბ ჭიაბერაშვილი არასწორ ინფორმაციას ავრცელებს და მას მუხროვანის ამბოხის საქმის განხილვაში მონაწილეობა არ მიუღია:
_ არასწორი ინფორმაცია მოგაწოდათ ბატონმა ზურაბმა _ არც არსებით საქმის განხილვაზე გამოვდიოდი და შესაბამისად, ვერც ოპერაციის მიზანშეწონილობას დავასაბუთებდი. მხოლოდ და მხოლოდ აღმკვეთ ღონისძიებაზე მაქვს მონაწილეობა მიღებული, სხვა ექვს დოკუმენტთან ერთად, ერთი დღის განმავლობაში. ამით შემოიფარგლება ჩემი მონაწილეობა ამ საქმეში.
_ საინტერესოა თქვენი მოსაზრება, ახლა, ამ საქმესთან დაკავშირებით. მით უმეტეს, როგორც გვითხარით, ბრალდებულთათვის აღმკვეთი ღონისძიების შეფარდებაში მონაწილეობდით…
_ სისხლის სამართლის კონკრეტულ საქმესთან დაკავშირებით ჩემს მოსაზრებებს ვერ დავაფიქსირებ, ვინაიდან სახელმწიფო ბრალმდებელი ვარ და ვერანაირ კომენტარს და შეფასებას ვერ გავაკეთებ, არც კანონი მაძლევს ამის საშუალებას. შემიძლია მხოლოდ ფაქტი დავადასტურო _ ვიყავი აქ, ან არ ვიყავი. არასოდეს, არანაირი სპეცოპერაციის ან რაიმე მსგავსი ღონისძიების შეფასება არ გამიხორციელებია ჩემი საქმიანობის არც ერთ ეტაპზე და არც არსებით განხილვაში მიმიღია მონაწილეობა. შეგიძლიათ განაჩენშიც ნახოთ. ბატონი ზურაბი, როგორც ყოველთვის, ცრუობს! _ გვითხრა სონღულაშვილმა.
