(გურია ნიუსი, ლანჩხუთი) _ ლანჩხუთის მუნიციპალიტეტში რუსეთ-საქართველოს ომიდან სამი წლისთავზე პატივი მიაგეს ომში დაღუპულთა ხსოვნას. ლანჩხუთმა საქართველოს ერთიანობისათვის ბრძოლებში არაერთი ახალგაზრდა დაკარგა, გამონაკლისი არც 2008 წლის აგვისტო იყო. მამულს ზვარაკად შეეწირნენ: ემზარ წილოსანი, რუსლან წულაძე, ვასილ სმირნოვი. ამათგან მხოლოდ ემზარს დარჩა პატარა ქალ-ვაჟი.
თავდაპირველად, აგარაკის ივერიის ღვთისმშობლის ხატის სახელობის ეკლესიაში მამა იოანემ ომში დაღუპულ გმირთა სულის მოსახსენებელი პანაშვიდი გადაიხადა. პანაშვიდის დასრულების შემდეგ მამა იოანემ ბრძანა: “2008 წლის აგვისტო მართლაც ტრაგიკულია საქართველოსთვის. დღესაც გლოვობს ჩვენი ქვეყანა. ჩვენი მეხსიერებიდან წარუშლელია მაშინდელი ემოციები. ერთად შევთხოვოთ ზეციურ საქართველოს ამ ახალგაზრდა ბიჭების სულთა სასუფეველში განსვენება. მათ ხომ ყველაზე უმთავრესი, სიცოცხლეც კი არ დაიშურეს იმისთვის, რომ ილია მართლის სიტყვები: “ჩვენი თავი ჩვენადვე უნდა გვეყუდნოდეს”, აღესრულებინათ. დიახ, ეს ტრაგიკული დღეა ჩვენი ქვეყნის უახლეს ისტორიაში, მაგრამ მას თავისი ბრწყინვალებაც ახლავს, რადგან იმ საყოველთაო ნიჰილიზმის ფონზე, რაც გამეფებულია მთელ დედამიწაზე, ქართველ კაცს აღმოაჩნდა საოცარი პატრიოტიზმის გრძნობა. უფლისთვის სამგვარი სიკვდილია სათნო: სიკვდილი რწმენისთვის, სიკვდილი მამულისთვის და სიკვდილი მეგობრისთვის. ეს ბიჭები კი სწორედ რწმენას, მამულს და მეგობრებს შეეწირნენ. ამიტომ, გვჯერა, რომ მათი სული ცათა სასუფეველში დაიმკვიდრებს და იქიდან იზრუნებს საქართველოსთვის”.
პანაშვიდის შემდეგ ხელისუფლების წარმომადგენლებმა ყვავილებით შეამკეს გმირთა საფლავები. ადგილობრივი ხელისუფლება შეუერთდა “წითელი ყაყაჩოების” აქციას, რომელსაც საფუძველი 2010 წლის 6 აგვისტოს გაზეთ “პრაიმ ტაიმის” წიგნის “გმირები” პრეზენტაციაზე ჩაეყარა.
რუსეთთან ომში დაღუპული გმირების მოსაგონებლად საქართველოს ყველა მოქალაქე ერთი კვირის განმავლობაში წითელ ყაყაჩოს დაიბნევს. ყაყაჩოს ორმაგი დატვირთვა აქვს: ის ერთდროულად მშვიდობისა და ხსოვნის სიმბოლოა. ჩვენ აღარ გვინდა ომი და მუდამ გვემახსოვრება ადამიანები, რომლებმაც საკუთარი სიცოცხლის ფასად სამშობლოს უერთგულეს.
ლანჩხუთის ხელისუფლების წარმომადგენლები ქალაქის ცენტრში მდებარე სკვერში შეიკრიბნენ, სადაც უნდა დაიდგას საქართველოსთვის დაღუპულ მეომართა ხსოვნის მემორიალი. მუნიციპალიტეტის გამგებლის, გიორგი გოგუაძის თქმით, ყველას უნდა გვახსოვდეს სამშობლოსათვის დაღუპული გმირები და პატივი უნდა მივაგოთ მათ სახელებს. აქ აღიმართება მემორიალი, რომელიც მომავალ თაობას გაახსენებს საქართველოსთვის შეწირულ მამულიშვილებს. ჯერჯერობით თავისი იდეა ესკიზის სახით მხოლოდ მოქანდაკე თამაზ ჩხაიძემ წარმოადგინა, რომლის თქმით, მემორიალი იქნება 6-მეტრიანი და მას მერცხლის ფორმა ექნება.
