აღნიშნული ინფორმაცია “გურია ნიუსთან” საუბრისას გურიის სამხარეო პოლიციის მთავარი სამმართველოს უფროსმა, გიორგი მდინარაძემ დაადასტურა:
_ ჯერჯერობით, არავის დანიშვნის ბრძანება არ არის დაწერილი. გიდასტურებთ, რომ ერთ-ერთ კანდიდატურად გოჩა თავაძე განიხილება, თუმცა, სხვების შესახებაც არის საუბარი, _ გვითხრა მდინარაძემ.
კითხვაზე, ვინ შესთავაზა თავაძის კანდიდატურა და იცნობს თუ არა მის პოლიციურ წარსულს, მდინარაძემ აღნიშნა, რომ ყველაფერი შესწავლის პროცესშია.
გოჩა თავაძის ჩოხატაურის პოლიციის უფროსის მოადგილედ დანიშვნის შესახებ გავრცელებულ ინფორმაციას უკვე მოჰყვა გამოხმაურებები. დღეს ხელისუფლებაში მყოფი ადამიანები, რომლებსაც კარგად ახსოვთ გოჩა თავაძის მოღვაწეობა “ნაციონალური მოძრაობის დროს, როცა თავაძე ჩოხატაურის პოლიციის უფროსის მოადგილის პოსტს იკავებდა, ამბობენ, რომ იმ შემთხვევაში თუკი მისი კანდიდატურა გადაწყდება, საპროტესტო აქციებს გამართავენ:
_ გოჩა თავაძე ის ადამიანია, რომელიც “ნაციონალური მოძრაობის” დავალებებს ასრულებდა. მახსოვს, შუაღამით მომადგა სახლში და დაკითხვაზე წამიყვანა. ჩემს საქმეში, როცა ტროტილი ჩამიდეს თავადაც ფიგურირებდა. თავაძე იყო იმ ზეწოლების, დევნის ერთ-ერთი ავტორი, რომელიც ოპოზიციაში ყოფნის დროს პირადად ჩემი, ჩემი ოჯახის და ჩემი ახლობლების მიმართ ხორციელდებოდა. თავაძეს და იმ დროის ჩინოვნიკებს პასუხი აუცილებლად უნდა მოეთხოვოთ. ეს ყველაფერი შესასწავლია და დამნაშავეს პასუხი უნდა მოეთხოვოს. ვანო მერაბიშვილი ხომ ცნეს დამნაშავედ. სხვები დასასჯელები არიან. რა, ვანო ჩამოდიოდა და იარაღს გვიდებდა? ამ ყველაფერს ის ადამიანები აკეთებდნენ, რომლებიც იმ პერიოდში პოლიციას ხელმძღვანელობდნენ. მე რომ “ტროტილი” ჩამიდეს, თავაძე მაშინ პოლიციის უფროსის მოადგილე იყო, _ აღნიშნა ჩვენთან საუბრისას “რესპუბლიკური პარტიის” ჩოხატაურის ორგანიზაციის ხელმძღვანელმა, გოჩა ჯიქიამ.
“ნაციონალური” ხელისუფლების მიმართ ოპოზიციურად განწყობილი და 7 ნოემბრის აქციის აქტიური მონაწილე გოჩა ჯიქია, ჩოხატაურის ცენტრში, 2007 წლის, 26 ნოემბერს, დაახლოებით, სამი საათისთვის მაშინ დააკავეს, როცა არასრულწლოვანი შვილები გამოჰყავდა საბავშვო ბაღიდან. მანქანის ჩხრეკისას, პოლიციელებმა ტროტილი აღმოაჩინეს და შესაბამისად, სისხლის სამართლის საქმე აღძრეს.
ჯიქიას გარდა, გოჩა თავაძის პოლიციის უფროსი მოადგილეობის დროს, ჩოხატაურში ბევრი ოპოზიციონერი დააკავეს. თითქმის ყველა მათგანის საქმეს ერთნაირი ხელწერა ჰქონდა _ იარაღი ქათმის ბუდეში კვერცხებთან ერთად.
ჩოხატაურელი მამუკა ცინცაძე, ჩოხატაურის პოლიციის სამმართველომ 2009 წლის 10 ივნისს დააკავა. ოფიციალური ინფორმაციით, ცინცაძის სახლიდან თოფი _ “გეკო” ამოიღეს და შესაბამისად, ბრალი იარაღის შენახვის ბრალდებით წაუყენეს. სამართლდამცველებმა იარაღი ცინცაძის საქათმის ბუდეში, კვერცხებთან ერთად იპოვეს.
იმ დროს, ცინცაძე “რესპუბლიკური პარტიის” ჩოხატაურის ორგანიზაციის ახალგაზრდული ფრთის ხელმძღვანელი იყო. მისი დაკავება თავიდანვე შეფასდა ოპოზიციონერებზე ზეწოლად და ცინცაძე პოლიტპატიმრების სიაშიც მოხვდა. მით უმეტეს, რომ სწორედ მამუკა ცინცაძე იყო, გოჩა ჯიქიას საქმის ერთ-ერთი მოწმე. _ აღსანიშნავია, რომ იარაღი, რომელიც მამუკა ცინცაძის საქათმის ბუდეში სამართალდამცველებმა აღმოაჩინეს, შინაგან საქმეთა სამინისტროს საინფორმაციო ანალიტიკური ცენტრის დასკვნის თანახმად, იდენტურია სოფელ ვანზომლეთის სკოლაში 1992 წელს დაკარგული იარაღისა. უფრო დაზუსტებით კი ორივე იარაღის ნომერი ერთი და იგივეა.
თუმცა, ეს ყველაფერი არ არის _ ჩვენ ისიც გავარკვიეთ, რომ სკოლიდან იარაღის მოპარვაში ერთ-ერთი ეჭვმიტანილი, ამავე სკოლის მოსწავლე გოჩა თავაძე იყო. ადამიანი, რომელიც ცინცაძის დაკავების დროს პოლიციის უფროსის მოადგილე იყო და რომელიც ამავე თანამდებობაზე ახლაც განიხილება.
ის, რომ სკოლიდან იარაღის მოპარვის საქმეში ერთ-ერთი ეჭვმიტანილი იყო, ჩვენთან საუბრისას გოჩა თავაძემაც დაადასტურა:
_ იმ დროს 15 წლის ვიყავი. ძალიან ბევრ სკოლაში გაიძარცვა სამხედრო კაბინეტები და გაიტანეს იარაღები. თითქმის მთელი კლასი დაგვიბარეს დაკითხვაზე, თუმცა, რაც არ მქონდა ჩადენილი, ის ვერ დამიმტკიცეს.
_ ბატონო გოჩა, ხომ არ აგვიხსნით, 1992 წელს დაკარგული იარაღი, რომლის მოპარვაში ერთ-ერთი ეჭვმიტანილი იყავით, როგორ აღმოჩნდა ოპოზიციონერის სახლში, რაც ბევრ კითხვას აჩენს?
_ ნამდვილად არ ვიცი. ეს საქმე დიდი ხანია დახურულია. მაშინ ბევრი სკოლა გაიძარცვა. ქობალიას რაზმებმა ბევრი იარაღი გაიტანეს.
_ გინდათ გვითხრათ, რომ ქობალიას რაზმების მიერ მოპარული იარაღი 20 წლის შემდეგ, ისევ ჩოხატაურში, ცინცაძის საქათმეში აღმოჩნდა?
_ მე არ ვიცი, ვინ და რა მოიპარა, მაგრამ ის ვიცი, რომ ცინცაძის სახლიდან ყველა კანონის დაცვით ამოიღეს იარაღი ოპერატიული ინფორმაციის საფუძველზე. მასე ჩოხატაურში დაახლოებით 1000 ოჯახიდან იქნა ამოღებული უკანონო იარაღი.
_ 1000 ოჯახიდან? გამოდის თითქმის მთელი ჩოხატაური კრიმინალი ყოფილა…
_ დაახლოებით ასეთი ციფრია…
_ პოლიციელი ბრძანდებით და იცით, საქმე როგორ იხსნება. ისიც იცით, რომ თავიდან ყველაფერი ეჭვით იწყება. შესაბამისად ეჭვები, რომლებიც ამ ფაქტს ახლავს, არ უნდა გაგიკვირდეთ…
_ თქვენ როგორ ფიქრობთ, 15 წლის ბავშვი, შევძლებდი იმხელა სეიფების გატეხვას? რა სისულელეა…
_ იარაღი, რომლის მოპარვაში ერთ-ერთი ეჭვმიტანილი თქვენ იყავით, საკმაოდ დიდი ხნის შემდეგ აღმოჩნდა ოპოზიციონერთან, რის გამოც ის დააკავეს და თქვენ ამ დროს პოლიციის უფროსის მოადგილე იყავით…
_ პოლიციის უფროსის მოადგილე ნამდვილად ვიყავი. რაც შეეხება ვანზომლეთის სკოლიდან იარაღის მოპარვის ფაქტს, ეს საქმე დიდი ხანია დახურულია.
_ დაზუსტებით ვიცით, რომ ეს საქმე მამუკა ცინცაძის დაკავების შემდეგ დაიხურა.
_ არა, უფრო ადრე.
_ მამუკა ცინცაძის საქმეში მოწმეებად მხოლოდ პოლიციელები ფიგურირებენ. მხოლოდ მათ დაინახეს სად იყო იარაღი. ესეც ბევრ კითხვას ბადებს.
_ ჩხრეკას სხვების ესწრებოდნენ და სასამართლოზე პოლიციელების დაკითხვას, რომლებიც ჩხრეკას აწარმოებდნენ, კანონი ითვალისწინებს… (იხილეთ სტატიები: იარაღის მოპარვაში პოლიციის უფროსის მოადგილეს ადანაშაულებდნენ; დაკარგული იარაღი და უცნაურ ვითარებაში გარდაცვლილი ორი ადამიანი)
გოჩა თავაძე განსაკუთრებული აქტიურობით 2012 წლის საპარლამენტო არჩევნების პერიოდში გამოირჩეოდა. არჩევნების წინა ღამეს, პირადად ურეკავდა ოპოზიციის წარმომადგენლებს და პოლიციაში, არჩევნების დღეს, დაკითხვაზე იბარებდა.
არჩევნების დღეს კი პირადად ხელმძღვანელობდა საარჩევნო უბანთან მყოფი მამა ათანასეს დაპატიმრების ოპერაციას. მამაო, მისივე თქმით, მრევლს მოუწოდებდა, “მხარი იმ ძალისთვის დაეჭირა, რომელიც ქვეყნის მომავალს ძალადობაზე არ ააგებს”.
მმართველი გუნდის წევრები, “გურია ნიუსთან” საუბრისას ამბობენ, რომ თუ ახალდანიშნული სამმართველოს უფროსი თანამდებობაზე ზონდერებს დააბრუნებს შესაბამის რეაქციებს მიიღებს:
_ არ ვაპირებთ გავჩერდეთ. იმისთვის არ გვიბრძოლია, რომ თანამდებობებზე ზონდერები დანიშნონ. თავაძე და მისი გუნდი აქტიურად გვებრძოდა “ნაციონალების” დროს. ოჯახის წევრებს გარეთ ვერ ვუშვებდით. არჩევნების ღამეს, სპეცრაზმთან ერთად, დაბლაციხეში, სწორედ თავაძე ავიდა არჩევნების ჩასაშლელად. 50 კაცი გადაუდგა წინ. ალბათ, გახსოვთ როგორი დაცვის თანხმებით ჩამოიტანეს ოქმი საოლქო კომისიაში. დაგვერწმუნეთ, თუკი თავაძეს დააბრუნებენ, ეს ძალიან ცუდ შედეგს გამოიღებს და ხელისუფლება, ჩოხატაურში, მასშტაბურ პროტესტს მიიღებს, _ აღნიშნეს კოალიციის წევრებმა “გურია ნიუსთან” საუბრისას.
იხილეთ სტატიები: ჩოხატაურში ჩამოსულ მამა ათანასეს დაპატიმრებას უპირებენ _ ვიდეო; მამა ათანასეს დაპატიმრებას უპირებენ; ჯიქია მოწმის სახით დაიკითხა; საოლქო პროკურორის პასუხები ამ დრომდე უპასუხო კითხვებზე
