ოზურგეთის მუნიციპალიტეტის გამგებლის, გია ტაკიძის დაკავებიდან ათ დღეზე მეტი გავიდა. არც ერთ ოფიციალურ პირს, გარდა საკრებულოს თავმჯდომარის მოადგილისა, დღემდე კომენტარი არ გაუკეთებია. პროკურატურის მიერ გავრცელებულ ინფორმაციაში ბევრი უზუსტობაა. მათ შორის, ერთ-ერთი მთავარი ის არის, რომ თურმე ტაკიძე კურდღელაშვილს სამსახურებრივ მფარველობას უწევდა. კურდღელაშვილის უფროსი, საკრებულოს თავმჯდომარე, ალეკო მამეშვილი გახლდათ და შესაბამისად, დასუფთავების სამსახურის უფროსი მასთან იყო ანგარიშვალდებული. მიუხედავად იმისა, რომ ეს ფაქტი კანონმდებლობით არის განსაზღვრული, პროკურატურას მამეშვილი არც კი დაუკითხავს.
ტაკიძის დაკავების მეორე დღეს, ოზურგეთის საკრებულოს თავმჯდომარემ მომხდარს სამწუხარო ფაქტი უწოდა. თუმცა, ჩვენს კითხვაზე, გრძნობდა თუ არა პასუხისმგებლობას გამგებლის დაკავების გამო, წერილობითი პასუხის გაცემა მოისურვა:
_ მირჩევნია შეკითხვები წერილობით დამისვათ და აუცილებლად გაგცემთ პასუხს, _ გვითხრა მამეშვილმა (საუბრის აუდიო ჩანაწერი რედაქციაში ინახება).
კითხვები საკრებულოს თავმჯდომარეს ელექტრონული ფოსტით გადავუგზავნეთ. რამდენიმედღიანი ლოდინის შემდეგ, 10 აგვისტოს სამსახურში ვესტუმრეთ იმის გასაგებად, როდის ინებებდა საჯარო მოხელე საზოგადოებისთვის საინტერესო კითხვებზე პასუხის გაცემას:
_ პასუხები უკვე გადავუგზავნე ჩემს პრესამსახურს და დღესვე გამოგიგზავნით; ბოდიში დაგვიანებისთვის, ძალიან დატვირთული გრაფიკი მქონდა, _ გვითხრა მამეშვილმა, რომელსაც 9 აგვისტოს, ჩვენი წყაროს ინფორმაციით, ოზურგეთში ჩასული რამაზ ნიკოლაიშვილისგან საკმაოდ ბევრი საყვედური ერგო.
მიუხედავად მამეშვილის ამ კომენტარისა, 10 აგვისტოს ჩვენს ფოსტაზე მისი პასუხები არ მოსულა. სიტუაციაში გარკვევა მისი პრესსამსახურის ხელმძღვანელს ნანა თავდუმაძეს ვთხოვეთ:
_ გუშინ დაინიშნა გამგებლის მოვალეობის შემსრულებელი. ალეკომ გადაწყვიტა, რომ კომენტარს მოგვიანებით გააკეთებს. კითხვებზეც გიპასუხებთ, დამატებით გაცნობებთ როდის, _ გვითხრა თავდუმაძემ 11 აგვისტოს.
თუმცა, რამდენიმე წუთში მან ნათქვამი შეცვალა და პასუხების არგაცემის საფუძველიც გვითხრა:
_ ალეკომ მოწოდებული შეკითხვები არაკორექტულად მიიჩნია და უფრო სერიოზულ, საქმიან შეკითხვებზე გიპასუხებთ, _ დააკონკრეტა პრესამსახურის ხელმძღვანელმა.
არაკორექტულია თუ არა, ეს კითხვები თავად მკითხველმა ანუ იმ ამომრჩეველმა განსაჯოს, რომელთა ხმების მოსაპოვებლად მამეშვილს გასულ წელს არათუ კითხვებზე პასუხის გაცემა და ინფორმაცია, აშენების, აყვავების და დასაქმების დაპირებები არ დაუშურებია. არაკორექტულობაზე თუ მიდგა საქმე, საინტერესოა, რა პასუხი გასცა მამეშვილმა, სულ რამდენიმე დღის წინ გამართულ თათბირზე რამაზ ნიკოლაიშვილის მიერ, მისი მისამართით ნათქვამ “კორექტულ” ფრაზებს.
_ ბატონო ალეკო, გრძნობთ თუ არა პასუხისმგებლობას გია ტაკიძის დაკავების გამო, რადგან თქვენ, კანონით, გამგეობის საქმიანობის კონტროლი, ანგარიშის მოსმენა, დოკუმენტაციების შემოწმება გევალებოდათ?
_ გჯერათ რომ გიორგი ტაკიძე დამნაშავეა?
_ როგორც გვითხრეს, არსებობს ვარაუდი, რომ ტაკიძესთან საპროცესო შეთანხმება გაფორმდეს. ოღონდ იმ პირობით, რომ მან თანამზრახველები უნდა დაასახელოს. როგორ გგონიათ, რამდენად საშიში იქნება ტაკიძის აღიარება, როგორც ადგილობრივი, ისე სამხარეო ხელისუფლებისთვის?
_ რატომ უნდა დაიჯეროს საზოგადოებამ, რომ გურიის, ოზურგეთის ხელისუფლებაში ისევ არ არიან კორუმპირებული ჩინოვნიკები? თუ გავიხსენებთ ბოლო ერთი წლის მოვლენებს, ვნახავთ, რომ ნაციონალურ მოძრაობას არცთუ კარგი არჩევანი აქვს გაკეთებული. ჯერ იყო და ჩოხატაურში შოთა სირაძეს აღუძრეს საქმე, ახლა ტაკიძე დააკავეს. ხე-ტყის ბიზნესშიც ბევრმა მოითბო ხელი… ზოგი ძებნილია ან ციხეშია. ამ ფაქტების გათვალისწინებით, თქვენ რომ რიგითი მოქალაქე იყოთ, რა დასკვნას გააკეთებდით?
_ ვიცით, რომ “დარია თუ ავდარია, მიშა მაგარია”. საინტერესოა, როდის არის მაგარი ოზურგეთის ხელისუფლება?
_ რამდენად მძიმე დარტყმა იყო პირადად თქვენთვის ტაკიძის დაკავება და ელით თუ არა, რომ გამოძიება თქვენც დაგკითხავთ?
_ არ გვახსოვს არც ერთი ფაქტი, სადაც დასუფთავების სამსახურის მუშაობა გაგეკრიტიკებინოთ… ნუთუ ასე კარგად იყო ყველაფერი თუ თქვენ იყავით სუსტი და ეს ვერ შეამჩნიეთ?
