ვაშაყმაძე თვითმართველობის არჩევნებზე, “ნაციონალური მოძრაობის” სიის მეოთხე ნომერი იყო. დაიბადა 1973 წელს, ოზურგეთის მუნიციპალიტეტის სოფელ ლიხაურში. ჰყავს მეუღლე და ორი ქალიშვილი. ვარდების რევოლუციამდე რევოლუციამდე გურიის სახელმწიფო რწმუნებულის აპარატში მუშაობდა, შემდეგ არასამთავრობო ორგანიზაციის _ “საზოგადოებრივი კავშირი _ მუნიციპალური რეფორმა”-ს ხელმძღვანელი იყო. თუმცა, არასამთავრობოდან ისევ ხელისუფლებას დაუბრუნდა და გურიის რეგიონის ხაზინაში უფროსის მოადგილედ მუშაობდა.
_ ბოლო წლებში, მთლიანად ქვეყანაში და ოზურგეთშიც გაკეთდა იმდენი რამ, რაც არ გაკეთებულა თითქმის 35 წლის განმავლობაში. ბრმა უნდა იყო, ეს სასიკეთო ცვლილებები ვერ დაინახო, _ ამბობდა ერთი წლის წინ, წინასაარჩევნო კამპანიის დროს ვაშაყმაძე.
მომავალი გამგებელი, ერთი წლის წინ არც დაპირებებს იშურებდა: _ ამომრჩევლიდან ნდობის გამოცხადების შემთხვევაში, ჩემს გუნდთან ერთად, პრიორიტეტად დავისახავ სამუშაო ადგილებისათვის ბრძოლას. ეს ის ძირითადი პრობლემაა, რომლის მოგვარებაც ავტომატურად ხსნის უამრავ სხვა დაბრკოლებას.
როგორც ცნობილია, ამომრჩეველმა ნდობა მმართველ პარტიას გამოუცხადა, თუმცა, ვაშაყმაძემ მალე კერძო სექტორში გადაინაცვლა და დაპირებული სამუშაო ადგილებზე ზრუნვაც სხვას მიანდო.
როგორც წყარო ამბობს, იდეა ვაშაყმაძის გამგებლად დანიშვნის შესახებ გუბერნატორს, ვალერი ჩიტაიშვილს ეკუთვნის. ჩიტაიშვილი ჩვენთან საუბრისას ამბობს, რომ ეს საკითხი საკრებულოს გადასაწყვეტია:
_ გამგებლის კანდიდატურა საკრებულომ უნდა განიხილოს და დანიშვნაც მათი ფუნქციაა.
_ ბატონო ვალერი, განიხილება თუ არა გამგებლის პოსტზე ვაშაყმაძის კანდიდატურა?
_ ალბათ, განიხილება, _ გვითხრა გუბერნატორმა.
ჩვენი ინფორმაციით, საკრებულო გამგებლის კანდიდატურას უმოკლეს ვადაში განიხილავს და ვაშაყმაძის კანდიდატურასაც, ხმათა უმრავლესობით დაამტკიცებს.
ვაშაყმაძეზე ინფორმაციის მოგროვებისას, ერთ საინტერესო ინფორმაციას წავაწყდით _ ფეისბუქზე, მომავალ გამგებელს, პერსონალურ გვერდზე, უმაღლეს სასწავლებლის დასახელების გრაფაში ლიხაური (?!) უწერია. მართალია, ლიხაურში არანაირი უმაღლესი სასწავლებელი არ ყოფილა და არც არის, მაგრამ როგორც გავიგეთ ვაშაყმაძეს, ლიხაურთან ახლოს, ანასეულის ინსტიტუტი აქვს დამთავრებული.
ჩვენ ვეცადეთ ვაშაყმაძესაც დავკავშირებოდით, თუმცა, მან ჩვენს სატელეფონო ზარებს არ უპასუხა.
