დღეს, დილიდან ხმაური და დაპირისპირება იყო ქალაქ ოზურგეთის მუნიციპალიტეტის მერიაში. მერიის შესასვლელში მოქალაქეებს და ჟურნალისტებს თავისუფლად გადადგილების საშუალება არ მიეცათ. ამოქმედდა საშვთა სისტემა. 14 საათზე კი მერიამ მუნიციპალიტეტის სხდომათა დარბაზში, რამდენიმე არასასოფლო დანიშნულების მიწაზე საჯარო აუქციონი ჩაატარა. მათ შორის, აუქციონზე გავიდა ქალაქ ოზურგეთში, დავით აღმაშენებლის ქუჩაზე, ე.წ. “გმირთა“ მოედანზე 188 კვადრატული მიწის ნაკვეთი მასზედ განლაგებული უძრავი ქონებით.
აუქციონის დაწყებამდე მოქალაქეებსა და სავაჭრო ჯიხურში მომუშავე პირებში აგრესია გამოიწვია ერთ-ერთი პრეტენდენტის გამოჩენამ, რომელსაც სურდა, შეეძინა აღნიშნული ტერიტორია. სიტუაცია მას შემდეგ განიმუხტა, როცა შენოაბში ქალაქ ოზურგეთის მერი ბეგლარ სიორიძე გამოჩნდა და აუქციონზე დამსწრე მოქალაქეებს სიმშვიდისკენ მოუწოდა.
აუქციონი დანიშნულ დროს დაიწყო და მას, ასევე, დაესწრნენ ოზურგეთის პოლიციის უფროსი თემურ სხირტლაძე და სხვა სამართალდამცავებიც.
ერთ-ერთ აუქციონში მონაწილეობა შემოქმედელმა მიტროპოლიტმა მეუფე იოსებმაც (გივი კიკვაძე) მიიღო.
“მე უნდა დაგტოვოთ, გისურვებთ წარმატებებს“, _ განაცხადა სიორიძემ აუქციონის დაწყების წინ.
სხდომა ინფრასტრუქტურის სამსახურის უფროსს მერაბ წივწივაძეს მიჰყავდა:
“პირველი უძრავი ქონება, მდებარე ქალაქ ოზურგეთში, გურამიშვილის ქუჩა # 12 , საწყისი საპრივატიზაციო ფასი 30 100 ლარი, მხოლოდ ერთადერთი პრეტედენტი არის ლაშა მიქატაძე “ბ“- 3 100 ლარი, გასხვისდა უძრავი ქონება 33 110 ლარად„, _ განაცხადა მერიის ინფრასტრუქტურის სამსახურის უფროსმა მერაბ წივივაძემ.
“ქალაქ ოზურგეთში, ჭანტურიას ქუჩის #1- ში მდებარე 565 კვ არასასოფლო-სამეურნეო მიწის ნაკვეთი მასზედ განლაგებული შენობა- ნაგებობებით, საწყისი საპრივატიზაციო ფასი 38 ათას 378 ლარი აღნიშნულ ფართზე მხოლოდ ერთადერთი პრეტენდენტია ბერიძე ავთანდილი, რომელმაც შეიძინა ქონება 52 730 ლარად და 70 თეთრად“.
“ქალაქ ოზურგეთში დავით აღმაშენებლის ქუჩაზე მდებარე 188 კვადრატული არასასოფლო სამეურნეო მიწის ნაკვეთი მასზედ განლაგებული შენობა-ნაგებობებით, საწყისი საპრივატიზაციო ფასი _ 47 937 ლარი, “ბიჯი“ გახლავთ 4 7 93 , 7 არის ორი პრეტედენტი, მოქალაქეების სახელიტ ზურაბ ქარჩავა და ჯემალ დარჩია“, წივივაძის თქმით ვაჭრობის დაწყების დროს პირველი სიტყვა ზურაბ ქარჩავას ეკუთვნოდა:
ზურაბ ქარჩავა : “ერთი ბიჯი“ _ 52 730 ლარი და 70 თეთრი“
ჯემალ დარჩია: “თანხა _ 57 524 ლარი და 40 თეთრი“.
ამის შემდეგ ზურაბ ქარჩავამ აუქციონი დატოვა, რის შემდეგაც აუქციონზე დამსრე მოქალაქეებმა და მოვაჭრეებმა მერიის თანამდებობის პირებს დაუპირისპირდნენ. სიტუაცია სამართალდამცავებმა განმუხტეს და რამდენიმე მოქალაქე ს დარბაზი დაატოვებინეს:
აღნიშნული ქონება 57 524 ლარად გასხვისდა.
“თქვენ იცით, ვინ მოიყვანა ეგ პიროვნება აქ. არ დავამავრებთ ამ ამბავს ასე, გამოიძახეთ პატრული და დაგვაპატიმრეთ. ვიცით, ვინც მოაგზავნა, ვინც დგას ამ პიროვნების ზურგს უკან, ამას ერთი თეთრი არ გააჩნია, სად აქვს ამხელა ფული? ამოგალპობთ ციხეში, ნახავთ 18 ოჯახის გამწარება ასე თუ დაგიმთავრდეთ, არაკაცებო, მალე დატოვებთ ოზურგეთს“, _ ამ სიტყვებით მიმართავდნენ ჯიხურების უკვე ყოფილი მეპატრონეები აუქციონზე მერიის თანამდებობის პირებს.
მერაბ წივწივაძე:
“ქალაქ ოზურგეთში, 9 აპრილის ქუჩაზე მდებარე უძრავი ქონება, არასასოფლო სამეურნეო მიწის ნაკვეთით 454 კვადრატული, მასზე განლაგებული შენობის ნანგრევი, საწყისი საპრივატიზაციო ფასი 27 267 ლარი _ გახლავთ სამი პრეტედენტი _ გივი კიკვაძე (მეუფე იოსები), ქეთევან სვარიძე და ზიანიდა თენიეშვილის მინდობილი პირი ნოდარ თენეიშვილი“.
აღნიშნული მიწის ნაკვეთი შეიძინა ნოდარ თენიეშვილმა 74 520 ლარად და 20 თეთრად. მეუფემ პროტესტის ნიშნად აუქციონი დატოვა და მონაწილე პრეტედენტებს უთხრა, რომ სირცხვილი იყო, რასაც აკეთებდნენ, რადგან აღნიშნული მიწის ნაკვეთი საპატრიარქოს მიერ იყო ნაკურთხი.
აუქციონი ჩავარდა ქალაქ ოზურგეთში გურამიშვილის ქუჩაზე მდებარე უძრავ ქონებაზე, ე.წ. “აბრეშუმის ფაბრიკა“, უძრავი ქონება 8 0 65 კვადრატული მიწის ნაკვეთი, საწყისი საპრივატიზაციო ფასი 275 ათას 15 ლარი იყო, პრეტედენტი არ იყო და ქონება არ გაიყიდა.
აუქციონის დასრულების შემდეგ დაზარალებულმა მოვაჭრეებმა ხმაურით გამგეობის შენობის გარეთ განაგრძეს პროტესტის გამოხატვა, მათი თქმით, აღნიშნული პიროვნება, ჯემალ დარჩია, რომელმაც აუქციონზე მიიღო მონაწილეობა და უკვე შეიძინა ე.წ. გმირთა მოედანზე ჯიხურები, არის ქალაქ ოზურგეთის მუნიციპალიტეტის მერთან და საკრებულოს თავმჯდომარესთან გელა კობალაძესთან არის დაახლოებული პირი. “ჯემალ დარჩია გელა კობალაძისა და მისი მეგობრის რევაზ მახარაძის მეგობარია, მას არანაირი საშუალება არ გააჩნია, არ აქვს ამდენი ფული, ტყუილია, ჩვენი ოჯახს ბეგლარ სიორიძე პირადად დევნის, ამის გამო დაისაჯა ამდენი მოვაჭრე, ჩვენ არ გავჩერდებით და მივმართავთ სასამართლოს, კაცმა რომელმაც ბიუჯეტი დააზარალა რამდენიმე ათასი ლარით და ორ დირექტორს უხდიდა ფულს მისი ახირების გამო, არაფერი არ არის გამორიცხული, 18 ოჯახი ულუკმა-პუროდ დაგვტოვა, არ შერჩებათ ასეთი მოქცევა, უფალი არ აპატიებთ“, _ ამბობდნენ მანანა ბურჭულაძე, რამაზ ანდღულაძე, ნუნუ ნაკაიძე, თამარ ბაჯელიძე.
ქალაქ ოზურგეთის მუნიციპალიტეტის მერის, ბეგლარ სიორიძის პოზიცია აღნიშნულთან დაკავშირებით ასეთია: “აუქციონი გახლდათ ღია, საჯარო და ყველასთვის ხელმისაწვდომი. შესაბამისად, მასში მონაწილეობის მიღების შესაძლებლობა ჰქონდა ყველას. რაც შეეხება ჯემალ დარჩიას, ამ პიროვნებას საერთოდ არ ვიცნობ. აქედან გამომდინარე, ამ ადამიანის ჩემთან დაკავშირება აბსოლუტური აბსურდია. ამ ქალბატონების სურვილზე (აღნიშნულ აუქციონში მხოლოდ მათ მიეღოთ მონაწილეობა) არ გახლავთ ჩვენი კანონმდებლობა მორგებული. ჩვენი ინტერესი კი სწორედ ის გახლავთ, რაც მეტი პრეტენდენტი მიიღებს მონაწილეობას აუქციონში, მით მეტი თანხა შემოვა ადგილობრივ ბიუჯეტში“, _ ამბობს სიორიძე.
რაც შეეხება მანანა ბურჭულაძეს, რომელიც სტადიონის ყოფილი დირექტორის მეუღლეა, “გურია ნიუსთან“ ამბობს, რომ მის ოჯახს პირადად დევნის ოზურგეთის მერი, სიორიძე აცხადებს, რომ მურთაზ აბაშიძე დევნის ობიექტი არ გახლავთ:
“პირველ რიგში, უნდა აღვნიშნო, რომ მურთაზ აბაშიძეს არავინ დევნის, პირიქით, მას ქალაქ ოზურგეთის მუნიციპალიტეტის მერიამ სხვადასხვა თანამდებობრივი პოზიცია შესთავაზა, მაგრამ აბაშიძემ ყველა შეთავაზებაზე უარი განაცხადა. ამ პიროვნების გამოყენებით პოლიტიკური ქულების დაწერას სხვადასხვა ოპოზიციური პარტია ნამდვილად ცდილობს და მას საკუთარი, სუბიექტური გავლენის ქვეშ აქცევს, რაც ნამდვილად დასანანია. რაც შეეხება მისი მეუღლის განცხადებას, მურთაზ აბაშიძის საკითხის დღევანდელ აუქციონთან დაკავშირება სრული აბსურდია. როგორ შეიძლება ეს ორი საკითხი ერთმანეთთან კავშირში იყოს. აღნიშნული აუქციონისთვის მოქალაქეების ხსენებული ჯგუფის წარმომადგენელმა შემოიტანა განაცხადი, ‘’ბე’’ და აუქციონში მონაწილეობაც მიიღო, თუმცა, მის მიერ შემოთავაზებული თანხა არ აღმოჩნდა გამარჯვებისთვის საკმარისი და, როგორც ვიცი, დარბაზი, შეურაცხმყოფელი სიტყვებით დატოვა. არავის დაუშლია მათთვის აუქციონში ვაჭრობის დროს თანხის გაზრდა, გამარჯვების შემთხვევაში, მათ ხელს არავინ შეუშლიდათ. ხოლო, ვინც გაიმარჯვა, იმ პიროვნებამ კანონის სრული დაცვით მიიღო მონაწილეობა აუქციონში და მის გამარჯვებასთან ქალაქის მერს ან საკრებულოს თავმჯდომარეს არანაირი კავშირი არა აქვს და არც შეიძლება რომ ჰქონდეს“.
