რატომ მიყიდა სახელმწიფომ გაკოტრების პირას მყოფ კომპანიას 4 საავადმყოფო არავინ იცის, თუმცა საუბრობენ, იმაზე რომ საქართველოს ბანკის მფლობელობაში არსებულ სადაზღვევო კომპანია “ალდაგი ბისიაი”-ს 4 საავადმყოფო გადაცემის სანაცვლოდ “საქართველოს ბანკი” ზუგდიდში ახალ საავადმყოფოს ააშენებს.
ამასთან დაკავშირებით “გურია ნიუსთან” საქართველოს შრომის, ჯანმრთელობისა და სოციალური დაცვის მინისტრმა დავით სერგეენკომგანაცხადა, რომ კლინიკების ყიდვა გაყიდვის შესახებ მისთვის არაფერი უკითხავთ. “აბსოლუტურად გულწრფელად მოგახსენებთ, ამ ჰოლდინგის 4 კლინიკიანი საავადმყოფოს ყიდვა-გაყიდვის შესახებ ჩემთვის არავის არაფერი უკითხავს. ამის შესახებ პოსტფაქტუმ თქვენი კოლეგებისგან გავიგე. რაც მე გულისტკივილით აღვნიშნე “საქართველოს ბანკი”-სა და “ალდაგი”-ს ტოპმენეჯმენტთან შეხვედრის დროს.
ცალსახად ვადასტურებ, რომ არანაირი წინასწარი მოლაპარაკება არ ყოფილა, მითუმეტეს იმაზე, რომ ამ კლინიკების სანაცვლოდ “ალდაგს” ზუგდიდში ახალი კლინიკა აეშენებინა. უფრო მეტიც, ეს სახელმწიფოს ვალდებულებაა, რომელსაც აუცილებლად განახორციელებს. ზუგდიდში კლინიკას სახელმწიფო აშენებს და არა კერძო კომპანია. მათ შორის საქართველოს ბანკი. გუშინ ვიყავი, ზუგდიდში უკვე კონკრეტულ დეტალებს გავდივართ.
ჩემთან შეთანხმების გარეშე მოხდა ამ სავადმყოფოების გასხვისება. ვაღიარებ, ცუდია, რომ ამას მინისტრი პოსტფაქტუმ იგებს. მაგრამ, ეს არის ფორმალობა. რადგან ეს არის კერძო საკუთრება, მყიდველსაც და გამყიდველსაც ეს შეუძლია განახორციელონ ისე, რომ არც კი შეეკითხონ ჯანდაცვის მინისტრს. სწორედ ამ პრივილეგიით ისარგებლა ამ კომპანიამ. “
“გურიანიუსი” სადაზღვევო კომპანია “ალდაგიბისიაი”-ს პრესსამსახურს დაუკავშირდა, სადაც გვიპასუხეს. “ნამდვილად ვადასტურებთ, რომ “ჩემი ოჯახის კლინიკამ” მ.იაშვილის სახელობის ბავშვთა ცენტრალური საავადმყოფო, ი. ციციშვილისსახელობის ბავშვთა ახალი კლინიკა, “ახალი სიცოცხლე” და “ბათუმის დედათა და ბავშვთა საავადმყოფო” კომპანია “ავანტე” ჯგუფისგან შეიძინა.
თუმცა კითხვაზე, რატომ არ იყო ჯანდაცვის მინისტრი სავადმყოფოების ყიდვა-გაყიდვის შესახებ ინფორმირებული, გვითხრეს, რომ პასუხს ამის შესახებ, მოგვიანებით გაგვცემდნენ.
როგორც კი “ალდაგი ბისიაი” პასუხს გვაცნობებს “გურია ნიუსი” მას აუცილებლად გამოაქვეყნებს.
შეგახსენებთ, რომ „ალდაგი ბისიაის“ ყოფილი დირექტორი ნიკოლოზ გამყრელიძე, რომელიც ამჟამად “საქართველოს ბანკში” მუშაობს, დაავადებათა კონტროლის ხელმძღვანელის ამირან გამყრელიძის ვაჟია. კომპანია “ალდაგიბისიაი” “ნაციონალური მოძრაობის” ხელისუფლების დროს პრივილეგირებულთა სიაში 2012 წლის 26 სექტემბერს მოხვდა, სულ რაღაც 5 დღით ადრე არჩევნებამდე.
კონკურენციისა და სახელმწიფო შესყიდვების სააგენტოს თავმჯდომარის #392 განკარგულებაში ნათქვამია: “1. სს “სადაზღვევო კომაპნია “ალდაგი ბისიაი”-ს მოთხოვნისა (2012 წლის 21 სექტემბრის #0850 წერილი) და მასზე თანდართული დოკუმენტაციის განხილვის შედეგად, სს “სადაზღვევო კომაპნია ალდაგი ბისიაი” (ს/კ 204819008) 2012 წლის 26 სექტემბერს დარეგისტრირებულ იქნას თეთრ სიაში”.
