აჭარის ავტონომიური რესპუბლიკის შრომის, ჯანმრთელობისა და სოციალური დაცვის მინისტრმა, ლევან ანთაძემ 25 ივლისს თანამდებობა საკუთარი განცხადების საფუძველზე დატოვა.
ანთაძე მინისტრად 2008 წელს დაინიშნა. 2005-2006 წლებში მუშაობდა ბათუმის საზოგადოებრივი ჯანდაცვის ცენტრის უფროსის, 2006-დან 2007 წლამდე _ ბათუმის მერიის ჯანმრთელობის და სოციალური სამსახურის უფროსის, 2007 წლიდან 2008 წლამდე კი “ბათუმის წყლის” გენერალური დირექტორის მოვალეობის შემსრულებლად.
www.humanrights.ge–ს ინფორმაციით, ლევან ანთაძეს 2010 წლის განმავლობაში, მხოლოდ პრემიის სახით, 12 033 ლარი აქვს მიღებული. მისი ფულადი წახალისება, ივნისსა და დეკემბერში, 100%-ზე მეტი იყო _ საკუთარ ხელფასზე, 2 720 ლარზე, 1 153 ლარით მეტი.
როგორც წყარო ამბობს, ანთაძეს თანამდებობა დაატოვებინეს. მასთან ერთად, სამსახური ქობულეთის გამგეობის თანამშრომლებმა, სამსახურების ხელმძღვანელებმა და გამგებლის მოადგილეებმაც დატოვეს. 25 ივლისს, თანამდებობა სულ 78 ადამიანმა დატოვა, ყველამ საკუთარი განცხადების საფუძველზე.
ამას წინ უძღოდა საქართველოს ფინანსთა სამინისტროს საგამოძიებო სამსახურის თანამშრომლების მიერ ქრთამის აღების ფაქტზე ბათუმის მერიის კეთილმოწყობის სამსახურის ყოფილი უფროსის, ჯემალ ხიმშიაშვილისა და ამავე სამსახურის უფროსი სპეციალისტის თენგიზ ხუციშვილის დაკავება.
ერთადერთი კომენტარი, რაც გადამდგარმა მინისტრმა მედიასთან გააკეთა, ის იყო, რომ მას გარემოს შეცვლა სურდა. სხვა დეტალებზე ანთაძეს ჟურნალისტებთან არ უსაუბრია. უცნობია, რა კავშირი ჰქონდა ანთაძეს დაკავებულ ჩინოვნიკებთან, თუმცა, ფაქტია, რომ ის სამსახურიდან მაშინ წავიდა, როცა აჭარის მთავრობაში რამდენიმე კორუფციული სქემა გამოაშკარავდა.
როგორც ჩვენთვის გახდა ცნობილი, ლევან ანთაძე ოზურგეთში, “ავერსის” კლინიკას უხელმძღვანელებს.
ამ ფაქტმა ოზურგეთელების გაღიზიანება გამოიწვია. როგორც ამბობენ, თავიდანვე იყო იმის პირობა, რომ ოზურგეთში “ავერსის” ხელმძღვანელად ადგილობრივი კადრი დაინიშნებოდა. ამავე პირობის თანახმად, კლინიკას ადგილობრივი მედპერსონალი უნდა დაესაქმებინა, თუმცა, ჩვენი წყაროს ცნობით, ახალ საავადმყოფოში ოზურგეთელი მედიკოსების მხოლოდ 2 პროცენტი მოხვდება. ჯერჯერობით, უცნობია, ვინ იქნება ამ ორ პროცენტში, თუმცა, ცნობილია, რომ ბევრ ადამიანს უმუშევრად დარჩენა ემუქრება.
გურიის გუბერნატორი, ვალერი ჩიტაიშვილი ჩვენთან საუბრისას ამბობს, რომ ანთაძის დანიშვნის შესახებ მას ინფორმაცია არ გააჩნია:
_ ვინ გითხრათ, რომ ანთაძე ინიშნება? მე არ მაქვს მსგავსი ინფორმაცია.
_ თქვენი ინფორმაციით, კლინიკას ადგილობრივი კადრი უხელმძღვანელებს?
_ სავარაუდოდ. მართალია, მე არ მაქვს ამის გადაწყვეტის კომპეტენცია, თუმცა, შემიძლია, გარკვეული რეკომენდაციები გავწიო.
_ ვის გაუწევთ რეკომენდაციას? ოზურგეთელების უმრავლესობას მიაჩნია, რომ ამ თანამდებობაზე დავით მდინარაძე უნდა დანიშნოს მისი პროფესიონალიზმიდან გამომდინარე…
_ ვნახოთ. რამდენიმე კანდიდატურა განიხილება და არ არის გამორიცხული, კლინიკის ხელმძღვანელი მართლაც დავით მდინარაძე გახდეს. თუმცა, ამაზე საუბარი ნაადრევია _ ჯერ მშენებლობაა დასასრულებელი, _ გვითხრა ჩიტაიშვილმა.
ლევან ანთაძე ჩვენს ზარებს არ პასუხობს; “ავერსის” საზოგადოებასთან ურთიერთობის სამსახურში არც მეილზე გვიპასუხეს და არც ტელეფონზე. შესაბამისად, ამ დრომდე უცნობია კომპანიის პოზიცია.
