“თავს სინანული სჯობია” _ ასეთი დასათაურება აქვს 2014 წლის 10 თებერვლით დათარიღებულ წერილს, რომელიც ლანჩხუთში გამომავალ გაზეთში “ლანჩხუთი პლუს” უკვე გამოქვეყნდა.
“მოგესალმებით ძვირფასო ლანჩხუთლებო! 2012 წელს მე მერგო პატივი გავმხდარიყავი ლანჩხუთის მაჟორიტარი დეპუტატი. გახსოვთ ალბათ, მე ძალა და ღონე არ დამიშურებია, თითქმის ყველა ლანჩხუთელის ოჯახში მივიტანე ოცნების, ახალი ცხოვრების, თავისუფლებისთვის ბრძოლის აუცილებლობა. თქვენ გახსოვდათ ჩემი წარსული. თხუთმეტი წელი შევალიე სპორტს და ლანჩხუთის სახელი საქართველოს გარეთ გავიტანეთ. თქვენ ამაყობდით ჩვენით. ჩემმა წარსულმა ცხოვრებამ გადააწყვეტინა ალბათ ოცნების საბჭოს და ბატონ ბიძინას მე წარვედგინე თქვენს წინაშე კანდიდატად. ჩვენ ერთად გავიმარჯვეთ და დავამარცხეთ ბნელი წარსული. მაგრამ გულრწფელად გეტყვით, მინდორზე თამაში, თუნდაც კიევის “დინამოს” წინააღმდეგ, მოსკოვის “სპარტაკის” წინააღმდეგ ბევრად იოლი ყოფილა, ვიდრე წელში გატეხილი, გაჭირვებული ლანჩხუთის დეპუტატობა. კოჰაბიტაციის წელმა, “ნაციონალების” საბოტაჟმა, ახალი კადრების გამოუცდელობამ ბევრი ვერაფერი სიკეთე მოუტანა ჩვენ ქალაქს, რაიონს. ბევრმა ნდობაც გამიცრუა.
ამიტომ დავავალე ჩემს მეგობარს, ნიჭიერ შემოქმედს, თამაზ ზენაიშვილს შეექმნა ლანჩხუთში არასამთავრობო საზოგადოება, რათა პირველი პირიდან, ხალხიდან მცოდნოდა რა ხდებოდა ჩემს გარშემო. სამწუხაროდ, ეს ადამიანი მძიმე სენით დაავადებული საოპრაციო გახდა. მადლობა ღმერთს, ის დაუბრუნდა ჩვენს ჩანაფიქრს და ლანჩხუთში 2013 წლის 28 ოქტომბერს შეიქმნა საზოგადოება “საქართველო ჩვენ ვართ”.
სულ რაღაც ხუთ თვეში თქვენ ხედავთ შედეგს. მან თავი მოუყარა ლანჩხუთში ყველაზე პატიოსან, ინტელიგენტ და ქვეყანაზე გულშემატკივარ ადამიანებს. ეს საზოგადოება დაგვეხმარება, რომ თვითმმართველობის არჩევნებში მხოლოდ ღირსეულმა გაიმარჯვოს და ბოლოს და ბოლოს ლანჩხუთს ეღირსოს წესიერი, საქმიანი, პროფესიონალი კადრებით დაკომპლექტებული, ქვეყნის მომავალზე მზრუნველი Mთავრობა. ჩვენი მხრივ, მე ყველანაირად დავეხმარები ამ საზოგადოებას კეთილშOბილურ საქმეში. ღმერთი იყოს ჩვენი შემწე“, _ წერია წერილში.
დეპუტატის მიერ დაფუძნებული ორგანიზაციის შესახებ “გურია ნიუსმა” ინფორმაცია ადგილობრივ ხელისუფლებაში გადაამოწმა.
ლანჩხუთის მუნიციპალიტეტის საკრებულოს თავმჯდომარის, ამირან გიგინეიშვილის თქმით, ორგანიზაციის შესახებ მედიიდან გაიგო:
_ ამ ორგანიზაციასთან, არასოდეს, არანაირი ურთიერთობა არ მქონია. არ ვიცი მათი მიზანი, ამოცანები. წარმოდგენა არ მაქვს რა მიმართულებაზე მუშაობენ. ერთადერთი სტატია მაქვს წაკითხული რომელიღაც გაზეთში.
_ ჩვენ გვაქვს თემურ ჩხაიძის წერილი, სადაც აღნიშნულია, რომ ორგანიზაცია “თვითმართველობის არჩევნებში ღირსეულის გასამარჯვებლად” შეიქმნა…
_ ეს უკვე პოლიტიკური ორგანიზაცია ყოფილა.
_ მისი სახელწოდებაც საინტერესოა _ “საქართველო ჩვენ ვართ”. ასოცირდება თუ არა ეს ორგანიზაცია თქვენთვის ბიძინა ივანიშვილის მიერ დაფუძნებულ “მოქალაქესთან”?
_ ვერაფერს გეტყვით. მე დიდი ხანი ვმუშაობდი არასამთავრობოში და რაიმე ურთიერთობა თუ მინდოდა მქონოდა თვითმმართველობასთან მივდიოდი და ვეცნობოდი. როგორც წესი, არასამთავრობოები არის ორი მიმართულებით. ერთი არის დამხარე, რომელიც ეხმარება ნებისმიერ თვითმართველობას და ხელს უწყობს საქმიანობის განვითარებაში და მეორე, ეს არის ორგანიზაციები, რომლებიც ახორციელებენ მონიტორინგს. სხვა სახის არასამთავრობო ორგანიზაცია ბუნებაში არ არსებობს და თუ მესამე სახეა არჩევნებში ღირსეულის გასამარჯვებლად, ეს ნიშნავს, რომ პოლიტიკური მიმართულება აქვს აღებული, რაც ნამდვილად არ არის არასამთავრობო ორგანიზაციის ფუნქცია.
_ მსგავსი არასამთავრობოს დაფუძნება დეპუტატის ფუნქცია არის?
_ დარწმუნებული ხართ, რომ ბატონმა თემურმა დააფუძნა?
_ ეს გარკვევით წერია წერილში, სადაც ასევე აღნიშნულია, რომ დეპუტატს ამ არასამთავრობო ორგანიზაციის დაფუძნებით სურდა, პირველი პირიდან, ხალხიდან სცოდნოდა რა ხდებოდა მის გარშემო.
_ ეს კარგი თემაა _ რა ხდებოდა ჩვენს გარშემო, მაგრამ სხვა მხრივ ვერაფერს გეტყვით.
– თემურ ჩხაიძე ამბობს, რომ ნდობა გაუცრუეს. შემთხვევით თქვენ და გამგებელი ხომ არ იგულისხმებით?
– ნამდვილად ვიცი, რომ არა, _ დაგვიზუსტა გიგინეიშვილმა.
ჩხაიძის მიერ გასული წლის ოქტომბერში დაფუძნებული არასამთავრობო ორგანიზაციის შესახებ “გურია ნიუსიდან” გაიგო ლანჩხუთის მუნიციპალიტეტის გამგებლის მოვალეობის შემსრულებელმა ზაზა ურუშაძემ:
_ პირველად მესმის. არც ორგანიზაციის შესახებ ვიცი რაიმე და არც თემურ ჩხაიძის წერილის, _ გვითხრა ურუშაძემ, რომელიც გამგებლად სწორედ თემურ ჩხაიძის რეკომენდაციით დაინიშნა.
_ ბატონო ზაზა, დეპუტატი წერს, რომ ბევრმა გაუცრუა იმედები. თქვენ მისი ფავორიტი კადრი იყავით და ხომ არ იცით, წერილში თქვენ იგულისხმებით?
_ მაგ კითხვაზე, ალბათ, თემური გაგცემთ პასუხს. წერილი არ წამიკითხავს და წარმოდგენა არ მაქვს, რა ხდება, _ დასძინა ურუშაძემ.
თემურ ჩხაიძე კი ამბობს, რომ წერილი მას არ დაუწერია, თუმცა, რაც მასში წერია ეთანხმება:
_ მე არანაირი წერილი არ დამიწერია. არ ვიცი, რაზეა საუბარი.
_ ბატონო თემურ, წერილი, რომელიც ჩვენ მოგვაწოდეს თქვენი ხელწერითაა და მასში აღნიშნულია, რომ ორგანიზაცია თქვენ შექმენით “თვითმმართველობის არჩევნებში ღირსეულის გამარჯვებისთვის”. ამავე წერილში თქვენი წარსულის და აწმყოს მიმოხილვაცაა.
_ გასაგებია, რაც ხდება. არ მეგონა, ეს წერილი საგაზეთო თუ გახდებოდა. მე ვესაუბრე თამაზ ზენაიშვილს, რომელიც ჩემი კლასელია. ვეთანხმები იმას, რაც იქ წერია, მაგრამ მე არც წერილი დამიწერია და არაფერ შუაში ვარ.
_ გინდათ გვითხრათ, რომ თქვენი სახელით სხვამ გამოაქვეყნა წერილი?
_ თამაზ ზენაიშვილს ჰკითხეთ…
_ თუკი ეს წერილი თქვენი დაწერილი არ არის და ვიღაცამ თქვენი სახელით გამოაქვეყნა, თქვენი რეაქცია მხოლოდ ეს არის?
_ სხვა რა რეაქცია უნდა მქონდეს? შევხვდები თამაზს და დაველაპარაკები. მე პირადად მომხრე ვარ, რომ შეიქმნას არასამთავრობო ორგანიზაციები, რომლებიც ჩვენ გაგვაკონტროლებენ. ეს ბატონმა ბიძინამაც თქვა. “მოქალაქის” მსგავსი ორგანიზაციები თავისუფლად არის შესაძლებელი ყველა ქალაქსა და სოფელში შეიქმნას.
_ ბატონო თემურ, თქვენ აღნიშნეთ, რომ წერილს ეთანხმებით…
_ არა, არ ვეთანხმები. არ ვიცით, რა გითხრათ. მე არ დამიწერია.
_ საუბრის დასაწყისში გვითხარით, რომ ეთანხმებოდით. დაადასტურეთ, რომ შინაარსაც იცნობდით…
_ არ მეგონა, ეს თუ საგაზეთო გახდებოდა.
_ წერილში წერია, რომ ბევრმა ნდობა გაგიცრუათ. ვისზეა საუბარი? გამგებელზე თუ საკრებულოს თავმჯდომარეზე?
_ არავის არ გაუცრუებია ნდობა. მართლა არ ვიცი. მეტი რა გითხრათ. მასე ყველას შეუძლია ჩემი სახელით წერილი დაწეროს. ეს წერილი კი მე არ დამიწერია, _ გვითხრა ჩხაიძემ.
თამაზ ზენაიშვილი ჩვენთან საუბრისას ამბობს, რომ წერილი თემურ ჩხაიძესთან შეთანხმებით დაიწერა.
_ მან თქვა, რომ არ იცოდა? რა საინტერესოა. მე არანაირი უფლება არ მაქვს, სხვისი სახელით ვწერო წერილები, _ გვითხრა ზენაიშვილმა და დაააზუსტა, რომ წერილის შინაარსს თემურ ჩხაიძე კარგად იცნობდა.
მისივე ინფორმაციით, დეპუტატი იმის შესახებაც იყო ინფორმირებული, რომ წერილი გამოქვეყნდებოდა:
_ მგონი, რაღაც გაუგებრობას აქვს ადგილი. შევხვდები თემურს, დაველაპარაკები და მას შემდეგ გაგესაუბრებით დეტალებზე, _ აღნიშნა ჩვენთან საუბრისას თამაზ ზენაიშვილმა.
