როგორც არასამთავრობო ორგანიზაციის “ხელმისაწვდომი გარემო ყველასთვის” წევრი გიორგი ალავიძე ამბობს, შშმ პირების უმრავლესობისთვის საზოგადოებრივი ტრანსპორტი გადაადგილების ერთადერთი საშუალებაა.
“ქალაქს სჭირდება ადაპტირებული ტრანსპორტი. ეს არის აუცილებელი შშმ პირებისთვის და არა მარტო მათთვის. მათ ბიუჯეტიდან ამოიღეს ტრანსპორტის შეძენის პუნქტი. ჩვენი აქ ყოფნით კი ვახსენებთ საზოგადოებას, მერიას, საკრებულოს, რომ ქალაქს სჭირდება ადაპტირებული ტრანსპორტი, რადგან ელემენტარულად გადაადგილებას ვერ ვახერხებთ. გადაადგილების უფლება კი გაეროს კონვენციით გვაქვს შეზღუდული შესაძლებლობის მქონე პირებს, ისევე როგორც სხვებს”.
ორგანიზაციის “ხელმისაწვდომი გარემო ყველასთვის” პროექტების კოორდინატორმა ნინო ბაიდაურმა აღნიშნა, რომ შეზღუდული შესაძლებლობის მქონე (შშმ) პირებისთვის ადაპტირებული ტრანსპორტის შეძენაზე მერიის მხრიდან დაპირება იყო, თუმცა გამოცხადებულ ტენდერთან დაკავშირებით არსებული კითხვების და სხვა მიზეზების გამო ეს დაპირება ბიუჯეტში არ აისახა.
„მათ ერთ-ერთ მიზეზად დაასახელეს ის, რომ ქალაქში ახალი ტრანსპორტის შემოყვანის გადაუდებელი საჭიროება არ არსებობს. თუმცა ამ შეფასების გაკეთებისას გამორჩათ ის მრავალრიცხოვანი შშმ პირი, რომელიც თბილისში არსებობს და მათი აბსოლუტური უმრავლესობისთვის სასიცოცხლოდ მნიშვნელოვანია ხელმისაწვდომი ტრანსპორტი. ეს რომ გაეთვალისწინებინათ, აღარ იტყოდნენ, რომ ტრანსპორტის გადაუდებელი საჭიროება არ არის. ტენდერთან დაკავშირებით გაჩნდა კითხვებიც, რის გამოც მერიამ ის უბრალოდ ჩაშალა.
2012 წლიდან აქტიურად ვმუშაობდით შშმ პირებისთვის ადაპტირებული საზოგადოებრივი ტრანსპორტის შემოყვანის თემაზე. არ დავმალავ, რომ მერიის მხრიდან თანამშრომლობაზე იყო სრული მზაობა. 2013 წელს მიმდინარეობდა მოლაპარაკებები ტრანსპორტის შემოყვანაზე, სადაც გათვალისწინებული იქნებოდა შშმ პირების ინტერესები. ადამიანები ერთმანეთს ვულოცავდით მიღწეულ შეთანხმებას, რომ თბილისში ივლიდა შშმ პირებისთვის ადაპტირებული ტრანსპორტი, მაგრამ გაგვიკეთეს სიურპრიზი და საერთოდ აღარ იძენენ ავტობუსებს. თბილისის საკრებულოს ურბანული დაგეგმარებისა და საქალაქო მეურნეობის კომისიის თავმჯდომარე ნიკოლოზ ხაჩირიშვილი პირად საუბარში დაგვპირდა, რომ ქალაქის ბიუჯეტში ავტობუსების შეძენის პუნქტის ამოღების მიუხედავად, ადაპტირებული ტრანსპორტი თბილისში მაინც იქნება. თუმცა დღეს აქ შევიკრიბეთ იმისთვის, რომ ეს დაპირება საჯაროდ მედიის წინაშეც გააკეთოს და აგვიხსნას, ამ დაპირებების შესრულების რა ბერკეტები არსებობს“, – განაცხადა ნინო ბაიდაურმა.
ნიკოლოზ ხაჩირიშვილმა აქციის მონაწილეებს საჯაროდაც განუცხადა, რომ ტრანსპორტის შეძენის ფინანსები თბილისს ექნება, მაგრამ საიდან გაჩნდება ეს ფული ქალაქის ბიუჯეტში, არ დაუკონკრეტებია.
“ჩვენ გვქონდა შეხვედრა შშმ პირების უფლებების დამცველებთან. მათ ჩვენგან მიიღეს ადაპტირებული ტრანსპორტის შეძენის პირობა. იმაზეც შევჯერდით, რომ ამ დაპირებას ექნება ოფიციალური სახე. 22 მარტს გვაქვს შეხვედრა, სადაც ოფიციალურად დაფიქსირდება, რომ ქალაქი ტრანსპორტს შეიძენს. ის, რომ თბილისში ავტობუსი არ შემოვა, არის ტყუილი. სატენდერო კომისიაზე სისხლის სამართლის საქმეა აღძრული, პროკურატურაშია საქმე და ამ ეტაპისთვის ბიუჯეტში ეს თანხები ფიზიკურად ვერ იქნა გათვალისწინებული. 22 მარტს შეიკრიბება კომისია და ოფიციალურად გადავწყვეთ, რომ 2-3 თვეში 100 ავტობუსი კი არა, შეიძლება, 150-ც შემოვიყვანოთ. მერიაში ვინც გამოაცხადა ტენდერი, ის პირები ისევ იქ არიან და გულწრფელად ვამბობ, დაზღვეულები არ ვიყავით, რა მიმართულებას მიიღებდა ეს ტენდერი”, – აღნიშნა ხაჩირიშვილმა და აქციის მონაწილეებს ადაპტირებული ტრანსპორტის შეძენის გარანტია მისცა.
