ჩვენს მიერ მოკვლეული მასალებით ირკვევა, რომ გასული კვირის მიწურულს, გუბერნატორმა, ყველა მუნიციპალიტეტის შესყიდვების დოკუმენტაციის წარდგენა სასწრაფო წესით მოითხოვა. წყაროს თქმით, ამ დოკუმენტებს რამდენიმე თანამდებობა შეეწირება, მათ შორის, ლანჩხუთის მუნიციპალიტეტის გამგებლის, გია გოგუაძის, რომელიც ჩიტაიშვილს, კარგა ხანია, “ყელში ჰყავს” ამოსული. აღსანიშნავია, რომ ყოველი სკანდალის შემდეგ, ლანჩხუთის გამგებელი მომავალ გუბერნატორად სახელდებოდა, თუმცა, ჩიტაიშვილმა პოზიციების შენარჩუნება ყოველთვის შეძლო. გოგუაძე რამაზ ნიკოლაიშვილის ფავორიტად ითვლება და მას, “ვარდების რევოლუციამდე”, ოპოზიციაში მყოფ სააკაშვილთან მწვავე დაპირისპირებაც შერჩა. წყაროს თქმით, სააკაშვილთან მას უშუალოდ ნიკოლაიშვილმა უშუამდგომლა და თანამდებობაზე გამოსადეგი კაცის იმიჯით დანიშნა კიდეც.
ყველა სამთავრობო შეხვედრაზე ნიკოლაიშვილი გოგუაძის მიმართ სიმპათიებს არ მალავდა და მას ერთ-ერთ საუკეთესო გამგებლად ასახელებდა. მინისტრი გოგუაძეს, ჩიტაიშვილის თანდასწრებით, საჯარო შეხვედრებზეც უხდიდა მადლობას და პირად საუბრებში მის გაგუბერნატორებასაც არ გამორიცხავდა.
ამ ქება-დიდების პარალელურად, მომწიფდა კონფლიქტი გოგუაძეს და ჩიტაიშვილს შორის. ჩვენი წყაროს თქმით, ცოტა ხნის წინ, გოგუაძემ თანამდებობიდან წასვლის სურვილი გამოთქვა, თუმცა, თანხმობა ვერ მიიღო. აღსანიშნავია ისიც, რომ გია გოგუაძემ, წელს პირველად დაარღვია (უფრო სწორად დაარღვევინეს) ბახმაროს დოღზე ნიკოლაიშვილთან და ჩიტაიშვილთან ერთად ყოფნის ტრადიცია და დღესასწაულზე ჩინოვნიკებისგან მოშორებით იდგა.
წყაროს ინფორმაციით, გოგუაძის საქმიანობით პროკურატურაცაა დაინტერესებული _ მას, ბოლო სამ წელიწადში, სოფლის განვითარების პროგრამის ფარგლებში გაწეული სამუშაოს ანგარიშის წარდგენა მოსთხოვეს. როგორც წყარო ამბობს, პროკურატურამ უკვე დაკითხა ის ინდმეწარმეები, რომლებმაც ამ პროგრამაში მიიღეს მონაწილეობა.
თუ გავითვალისწინებთ იმასაც, რომ ამ ყველაფერს ჩიტაიშვილის მიერ მოთხოვნილი ინფორმაციაც დაემატა, სავარაუდოა, რომ მალე ლანჩხუთის მუნიციპალიტეტის გამგებლის სავარძელი გათავისუფლდება.
ეს ყველაფერი იმაზე მიანიშნებს, რომ ბრძოლა ხელისუფლებისთვის ახალ ფაზაში შევიდა. გუბერნატორთან დაახლოებული პირები ამბობენ, რომ ჩიტაიშვილმა ისე გაიმყარა პოზიციები, როგორც არასდროს. ამბობენ იმასაც, ჩიტაიშვილმა თავის საჭიროებაში ნიკოლაიშვილის დარწმუნებაც შეძლო (იმასაც ამტკიცებენ, რომ გოგუაძის ავტორიტეტი ნიკოლაიშვილთან სწორედ ჩიტაიშვილის დამსახურებით დაეცა) და ამის დასტურად ის მოჰყავთ, რომ ბოლო დროს, ჩიტაიშვილი და რამაზ ნიკოლაიშვილის მარჯვენა ხელად მოაზრებული მისი მოადგილე, ლელა თავართქილაძე ძალიან დაახლოვდნენ. წყაროს თქმით, თავართქილაძის და ჩიტაიშვილის საიდუმლო თათბირები ძალზე გახშირდა. ჩვენს მიერ მოპოვებული ინფორმაციით, გასულ კვირას, ჩოხატაურს და ლანჩხუთს თავართქილაძე მარტო სტუმრობდა და მუნიციპალიტეტების ხელმძღვანელ პირებს მოწმეების გარეშე შეხვდა. წყაროს განმარტებით, სწორედ ამის შემდეგ დაინტერესდა ჩიტაიშვილი გამგეობების შესყიდვებით.
თუ გავითვალისწინებთ იმ ფაქტს, რომ ჩიტაიშვილმა მოადგილედ არც თუ სუფთა წარსულის მქონე შაფაქიძე დაინიშნა, შემდეგ კი ოზურგეთის გამგებლის კანდიდატურაც დამოუკიდებლად შეარჩია, ცხადი ხდება, რომ გურიის გუბერნატორს შორს მიმავალი გეგმები აქვს.
გარდა ამისა, ჩვენ მიერ მოპოვებული ინფორმაციით, ჩიტაიშვილს გარკვეული პრეტენზიები ჩოხატაურის მუნიციპალიტეტის გამგებლის, გია გიორგაძის მიმართაც გააჩნია. მართალია, პატიოსნებაში გიორგაძეს ტოლს ძნელად თუ დაუდებს ვინმე, მაგრამ, როგორც წყარო ამბობს, მასთან ზემდგომს სხვა სახის პრეტენზიები აქვს _ გუბერნატორი ჩოხატაურის გამგებლისგან მეტ სიმკაცრეს მოითხოვს და გიორგაძეს რბილ ხასიათს უწუნებს.
არც ვალერი ჩიტაიშვილმა და არც ლელა თავართქილაძემ ამ თემაზე ჩვენთან საუბარი არ მოისურვეს. კომენტარზე სხვა ჩინოსნებმაც უარი გვითხრეს მოტივით _ ჭორებზე არ ვსაუბრობთო.
