შეხვედრაზე ისაუბრეს სახელმწიფო ენერგეტიკული პოლიტიკის ძირითად მიმართულებებზე, ქვეყნის გრძელვადიან ენერგეტიკულ სტრატეგიაზე, საქართველოს ენერგეტიკაში მიმდინარე მოვლენებსა და ენერგეტიკული სფეროს შესაძლებლობებზე. ასევე, ისეთ მნიშვნელოვან პროექტზე როგორიცაა “ხუდონჰესი”.
ექსპერტები, რომლებიც შეხვედრას ესწრებოდნენ, “გურია ნიუსთან” საუბრისას აცხადებენ, რომ ვიცე-პრემიერთან შეხვედრა ძალიან მნიშვნელოვანი იყო სამომავლო თანამშრომლობისთვის და არ იყო მხოლოდ “შეხვედრა შეხვედრისთვის”.
მარეგულირებელი კომისიის თავმჯდომარის, ირინა მილორავას განცხადებით, ენერგეტიკულ დამოუკიდებლობასთან ერთად, რაც პირდაპირ კავშირშია ქვეყნის ენერგეტიკულ უსაფრთხოებასთან, ჰიდროგენერაციის განვითარება საექსპორტო პოტენციალის ზრდის მნიშვნელოვანი წინაპირობაა.
“2011 წლიდან საქართველო ნეტ-ექსპორტიორი ქვეყნიდან ნეტ-იმპორტიორ ქვეყნად გადაიქცა, რაც ნიშნავს, რომ წლის განმავლობაში განხორციელებული იმპორტი უკვე აღემატება ამავე პერიოდში განხორციელებულ ექსპორტს. თუმცა, კიდევ ერთხელ უნდა აღვნიშნო, რომ ამგვარი პროექტების მთავარი ღირებულება და დანიშნულება, მოხმარების ზრდის პირობებში, ქვეყნის შიდა მოხმარების დაკმაყოფილების შესაძლებლობაა”, _ განაცხადა მარეგულირებელი კომისიის თავმჯდომარემ.
მისი განმარტებით, უკანასკნელ წლებში, ელექტროენერგეტიკულ სექტორში ჩამოყალიბებული საბალანსო ელექტროენერგიის ფასები ცხადყოფს, რომ იგი შესამჩნევად იზრდება მოხმარების ზრდასთან ერთად, ვინაიდან გაზრდილი მოხმარება სწორედ იმპორტირებული ელექტროენერგიით იფარება, რომლის ფასის ზრდის ტენდეციაც უკვე სახეზეა.
“ამდენად, ჰიდროგენერაციის განვითარება გრძელვადიან პერსპექტივაში ფასების სტაბილიზაციასაც შეუწყობს ხელს, ვინაიდან ყველა იმ მემორანდუმში, რომელიც სახელმწიფოსა და ინვესტორს შორის ფორმდება, ფიქსირდება ინვესტორის მიერ ელექტროენერგიის ადგილობრივ ბაზარზე გასაყიდი ფასი და გაყიდვის პერიოდი, რომელიც, როგორც წესი, ზამთრის დეფიციტურ თვეებს მოიცავს”, _ განაცხადა ირინა მილორავამ.
ასეთი ვალდებულებები აქვს აღებული სახელმწიფოს წინაშე “ხუდონჰესის” მშენებელ კომპანია “ტრანსელექტრიკა ჯორჯიას”, რომელმაც ზამთრის დეფიციტურ თვეებში ელექტროენერგია ქვეყნის ენერგოსისტემას უნდა მიაწოდოს.
შეხვედრაზე იმყოფებოდა კომპანია “ტრანსელექტრიკა ჯორჯიას” ტექნიკური ხელმძღვანელი, დავით მირცხულავა, რომელმაც ჩვენთან საუბრისას განაცხადა, რომ ენერგეტიკის სამინისტრომ წარმოადგინა ზოგადად ის მიმართულებები, რაზეც აპირებს მუშაობას, რასაც დაეფუძნება და რა პრიორიტეტებიც ექნება ქვეყნის ენერგეტიკულ პოლიტიკას. წარმოდგენილი იყო მეტად საინტერესო პრეზენტაცია ამ მიმართულებით.
დავით მირცხულავა: “იყო კითხვები, დისკუსია და რეკომენდაციები. ერთს მინდა ხაზი გაუსვა, რომ შეხვედრა იყო მეტად საინტერესო და საქმიანი. მინისტრი კალაძე, დარგობრივი ეკონომიკის თავმჯდომარე ზურაბ ტყემალაძე, შეხვედრაზე მყოფი დარგის სპეციალისტები და ასევე მოწვეული ცნობილი ეკონომისტები, ყველა შევთანხმდით და მხარი დაუჭირეთ მინისტრის წინადადებას, რომ ასეთ შეხვედრებს მივცეთ პერმანენტული ხასიათი. ჩემი აზრით, ეს იქნება ძალიან კარგი, ეფექტური და ხელს შეუწყობს საკითხების გადაწყვეტას. ერთადერთი წინადადება მაქვს, რომ განხილვები იყოს თემატური, მაგ: სატარიფო მეთოდოლოგიაზე, სადისტრიბუციო კომპანიებთან ურთიერთობაზე, უსაფრთხოებისა და საიმედოობის რეგულაციებზე დარგში, რეფორმებზე და ა.შ.
შეხვედრაზე იყო ხუდონჰესზეც საუბარი, მნიშვნელოვანია რომ დეპუტატებმა ერთმნიშვნელოვნად მხარი დაუჭირეს ასეთი პროექტის განხორციელების აუცილებლობას ჩვენი ქვეყნის ეკონომიკური განვითარებისთვის, მომავლისთვის. დეპუტატებს ჰქონდათ გარკვეული შეკითხვები ხუდონჰესთან დაკავშირებით, რომელზედაც პასუხები მიიღეს და საერთოდ, დისკუსიები ჩვენი ქვეყნის უმნიშვნელოვანეს მიმართულებაზე ზოგადად ჰიდროენერგეტიკის განვითარებაზე აუცილებლად უნდა გაგრძელდეს.”
პაატა ცინცაძე (ენერგეტიკის აკადემიის პრეზიდიუმის წევრი, ჰიდროენერგეტიკოსი): “ძალიან მნიშვნელოვანი შეხვედრა იყო რამდენიმე მიზეზის გამო. ეს იყო ენერგეტიკის სამინისტროს ხელმძღვანელობის, პარლამენტის დარგობრივი კომიტეტის ხელმძღვანელობის, ექსპერტებისა და დამოუკიდებლები ექსპერტების მონაწილეობით. პირადად მე არ მახსოვს სხვა ასეთი შეხვედრა. გამოითქვა ძალიან საინტერესო მოსაზრება საუბარი იყო ზოგადად ჰიდროენერგეტიკის განვითარებაზე, რომ ეს არის ერთადერთი რესურსი რომელიც ქვეყანას გააჩნია. მოგეხსენებათ სხვა ენერგეტიკული რესურსი, ნავთობი და გაზი ჩვენ არ გვაქვს. ამ რესურს სწორად და ეფექტურად გამოყენება ჭირდება. განსაკუთრებული ყურადღება გამახვილდა ქვეყნისთვის ისეთ უმნიშვნელოვანეს პროექტზე, როგორიც ხუდონია. მოწინააღმდეგე ხუდონის პროექტთან დაკავშირებით არავინ ყოფილა. ყველას ძალიან კარგად ესმის, რომ საჭიროა ეს სადგური აშენდეს. კითხვები დეპუტატებს ჰქონდათ სარგებელთან დაკავშირებით ანუ რა სარგებელს ნახულობს ამაში ქვეყანა. 20% დაკავშირებით, რომელიც რჩება ქვეყანაში და დანარჩენი გარეთ გადის. ეს იყო მათ კითხვა და ამაზე პასუხი მიიღეს”
