_ ბოლო თვეებში, ეტყობა, ძალიან გავეჩხირე ყელში ვლადიმერ პუტინს. პრაქტიკულად მე დავიწყე კამპანია უკრაინელების მხარდასაჭერად. რათქმაუნდა, მათთან ერთად ვაგრძელებ ამ კამპანიას. ძალიან ბევრი პრობლემა შევუქმენით მე და ჩემმა მეგობრებმა პუტინს და ჩემი აქეთ-იქით გადაადგილება მისთვის არის ძალიან დიდი პრობლემა. თუ პუტინი თვლის, რომ წავალ, ჩავბარდები და ჩემი გადაადგილება არ მოხდება, ეს არის დიდი სისულელე. მე ვაპირებ გავაგრძელო ბრძოლა საქართველოს და მთელი რეგიონის გათავისუფლებისთვის. როგორც თავისუფალმა ადამიანმა ვერავინ ვერ შეზღუდავს ჩემს გადაადგილებას. მე საქართველოში ჩამოვალ არა პუტინის ოცნების ასახდენად, არამედ, ჩამოვალ პუტინის დავალებების შემსრულებლებისგან საქართველოს გასათავისუფლებლად. ეს დრო დადგება ბევრად უფრო მალე, ვიდრე ივანიშვილს, რუს ოლიგარქს წარმოუდგენია, რომელსაც ამ დავალების შესასრულებლად ორი მილიარდი მისცეს. საერთოდ ეჭვს არ იწვევს, რომ ეს მისი გაკეთებულია. უფრო მეტიც, ევროპელები მეუბნებოდნენ, რომ ის გადადგა თანამდებობიდან იმის გამო, რომ ისე გააკეთოს ეს საქმე, თითქოს, თვითონ არაფერ შუაშია. ამას არავინ არ ჭამს. ყველამ კარგად იცის, რომ თვითონ აკეთებს სისხლის სამართლის საქმეს. ყველამ იცის, რომ საქართველოს მართავენ სრული არარაობები, რომლებიც არანაირ გადაწყვეტილებას არ იღებენ, მითუმეტეს ასეთს. ყველამ იცის, რომ ივანიშვილიც საბოლოო ჯამში არ იღებს ამ გადაწყვეტილებას და იღებს ის, ვინც მას მისცა ორი მილიარდი. ეს არის დროებითი. საქართველოსთვის მე ერთი წუთითაც არ შევწყვეტ ჩემ ბრძოლას. ვერაფერი შემაჩერებს გარდა ფიზიკური ლიკვიდაციისა პუტინის მხრიდან. გავაგრძელებ ბრძოლას იმისთვის, რომ ეს ყველაფერი, რასაც მრავალი წელი მოვანდომეთ, ვერავინ შეაბრუნოს უკან.
ვაპირებ ბრძოლის გაგრძელებას, როგორც თავისუფალი ადამიანი. არ ვაპირებ ივანიშვილ- პუტინის თამაშს. ეს არის ორჯერ ორი ოთხი. ასე რომ, მე ჩავაკითხავ ივანიშვილს, როცა საჭირო იქნება. ოღონდ, სხვა მიზნით, _ განაცხადა სააკაშვილმა.
სააკაშვილის თქმით, თქმით მას საქართველოდან წამოსვლის რეკომენდაცია და რჩევა იმ ამერიკელმა მეგობრებმა მისცეს, რომლებიც მაღალ თანამდებობებზე მუშაობენ.
შეგახსენებთ, რომ საქართველოს ყოფილი პრეზიდენტი, მიხეილ სააკაშვილი პროკურატურაში მოწმის სახით დაიბარეს.
“მაღალი საზოგადოებრივი ინტერესიდან გამომდინარე განვმარტავთ, რომ საქმე ეხება ალექსანდრე (სანდრო) გირგვლიანისა და ლევან ბუხაიძის მიმართ 2006 წლის 28 იანვარს ჩადენილი დანაშაულისათვის მსჯავრდებული პირების: გ. ალანიას, ალ. ღაჭავას, მ. ბიბილურიძისა და ა. აფციაურის შეწყალების ფაქტს, რომელიც განხორციელდა საქართველოს პრეზიდენტის 2008 წლის 24 ნოემბრის N768 განკარგულებით.
ასევე გვსურს განვმარტოთ, რომ ვინაიდან მთელ რიგ საქმეებზე გამოძიება შესულია დასკვნით ფაზაში და პროკურატურა დგას მ.სააკაშვილის დაკითხვის აუცილებლობის წინაშე, იგეგმება ყოფილი პრეზიდენტის მოწმის სახით დაკითხვა აღნიშნულ საქმეებზეც. საზოგადოების სრულად ინფორმირების მიზნით, საქართველოს პროკურატურა აქვეყნებს იმ საქმეების ჩამონათვალს, რომლებზეც დგას მ.სააკაშვილის დაკითხვის აუცილებლობა:
2008 წლის თებერვალში, მაღალი თანამდებობის პირების მიერ, ტელეკომპანია “იმედში”” შეჭრის, დარბევის, უკანონოდ დაუფლებისა და გარდაცვლილი ა. პატარკაციშვილის ოჯახის მიმართ განხორციელებული სხვადასხვა უკანონო ქმედებების ფაქტებზე, რაც დასრულდა 2011 წლის 6 ივლისს, საქართველოს ხელისუფლებასა და ა. პატარკაციშვილის ოჯახს შორის მემორანდუმის გაფორმებით;
2009-2012 წლებში, სახელმწიფო დაცვის სპეციალური სამსახურის კუთვნილი 8 837 461 ლარის გაფლანგვის ფაქტზე;
პრემიერ-მინისტრ ზურაბ ჟვანიას გარდაცვალებასთან დაკავშირებული გარემოებების დადგენის მიზნით წარმოებულ სისხლის სამართლის საქმეზე.
2004 წლის ივნისში, ტელეკომპანია “რუსთავი 2″-ისა და ტელეკომპანია ,,მზე”-ს კანონიერი მესაკუთრეებისათვის წილების იძულებით დათმობის ფაქტზე;
2009 წლის 20 მაისს, ე.წ. “მუხროვანის ამბოხებისათვის” ძებნილი პირების კობა ოთანაძის, ლევან ამირიძისა და გია კრიალაშვილის დაკავების სპეცოპერაციისას, გ.კრიალაშვილის ლიკვიდაციის, ლ.ამირიძის და კ.ოთანაძის დაჭრის ფაქტზე;
2012 წლის 24 თებერვალს სახელმწიფოს კუთვნილი შპს “აგრომეტი”-ს (აგრარული უნივერსიტეტის) ქონების გაფლანგვის ფაქტზე.
2012 წლის 31 ოქტომბრის პრეზიდენტის განკარგულებით მისი ბიძის თ.ალასანიასთვის უპირატესობის მინიჭებით, სახელმწიფო ქონების შპს “ბეზეკზე” უკანონოდ პრივატიზების ფაქტზე.
2012 წლის თებერვალში, აჭარის ავტონომიურ რესპუბლიკაში მოქმედი ტელევიზია ტვ-25-ის საარჩევნო პერიოდში გაკონტროლების მიზნით, მისი დამფუძნებლებისათვის 3 მილიონამდე აშშ დოლარის ღირებულების სახელმწიფოს კუთვნილი უძრავი ქონების სიმბოლურ ფასად – 1 ლარად გადაცემის ფაქტზე.
2011-2012 წლებში, მაღალი თანამდებობის პირების ორგანიზებითა და მონაწილეობით “ქართუ” ბანკის ხელოვნურად გაკოტრების მიზნით, ბანკში იპოთეკით დატვირთული ქონების თვალთმაქცურად გასხვისების გზით გადამალვის ფაქტზე“, – ნათქვამია პროკურატურის მიერ გავრცელებულ განცხადებაში.
სააკაშვილი პროკურატურაში 27 მარტს, 13:00 საათზეა დაბარებული.
