მოსახლეობა დახმარებას და მცენარეების სასწრაფოდ შეწამვლას ითხოვს. ჩოხატაურის მუნიციპალიტეტის სოფელ კოხნარის რწმუნებულის, ჟიფო ცინცაძის თქმით, სურსათის უვნებლობის და ვეტერინარიის სამსახურის ჩოხატაურის განყოფილების უფროსს, ლევან კეკელიძეს სოფლის მოსახლეობის მოთხოვნით რამდენჯერმე დაურეკა, თუმცა, დახმარებაზე უარი მიიღო.
_ არც წამალი მაქვს და არც შესაწამლი მანქანა მყავს, _ უთქვამს კეკელიძეს, რომელიც ცინცაძესთან საუბარს “გურია ნიუსთან” ვერ იხსენებს. თუმცა, ადასტურებს რომ ქვეყანაში თეთრი პეპლის საწინააღმდეგო წამალი არ არის.
სურსათის უვნებლობის და ვეტერინარიის სამსახურის წარმომადგენელი, დავით ცინცაძე ჩვენ გაზეთთან საუბრისას ამბობს, რომ ჩოხატაურში მხოლოდ რამდენიმე სოფელი შეიწამლება: _ გამგებელმა მოგვაწოდა სია და ჩვენც იმ სოფლებს შევწამლავთ, _ აღნიშნა ცინცაძემ.
ჩოხატაურის მუნიციპალიტეტის გამგებლის გია გიორგაძის თქმით, მას სია არავისთვის მიუცია და სოფლები არ აურჩევია, თუმცა, აღნიშნავს, რომ მუნიციპალიტეტის ზოგიერთ სოფელში საგანგაშო მდგომარეობა არ არის და სასწრაფო შეწამვლა აუცილებლობას არ წარმოადგენს: _ არის რამდენიმე სოფელი, სადაც სასწრაფოდ უნდა მოხდეს შეწამვლა. ამ ეტაპზე არც საჭირო ტექნიკაა და არც იმ რაოდენობის წამალი, რომელიც ყველა სოფელს ეყოფა. სურსათის უვნებლობის და ვეტერინარიის სამსახურს აქვს საკუთარი გეგმა და ამ გეგმის თანახმად ახორციელებს შემოვლას. მე არანაირი სია მათთვის არ მიმიცია, _ გვითხრა გამგებელმა.
გამგეობაში და არც სურსათის და ვეტერინარიის სამსახურში არ იციან, როდის შემოიტანენ საქართველოში საჭირო შხამ-ქიმიკატებს. ფაქტია, რომ მავნებელი უკვე ანადგურებს მოსახლეობის მოსავალს, რომელიც წლეულს ისედაც მცირეა.
აღსანიშნავია, რომ ამერიკულ თეთრ პეპელას აქტიურობის პერიოდი სექტემბერში აქვს.
