წყაროს თქმით, ამ სტუმრიანობამ გამგეობასა და საკრებულოში მომუშავე საჯარო მოხელეები კიდევ ერთხელ “შეაფუცხუნა”, რაც პირველ სექტემბერს გამართულ საკრებულოს სხდომასაც დაეტყო.
სხდომაზე ოზურგეთის მუნიციპალიტეტის რამდენიმე სოფელში “სოფლის მხარდაჭერის პროგრამის” ფარგლებში გახორციელებულ სამუშაოებში შესატანი ცვლილებები განიხილეს.
სოფელ ბახვში, მუზეუმის მშენებლობისთვის პროგრამით გათვალისწინებული 4 1396 ლარი შემდეგნაირად გადაანაწილეს: 1 500 ლარი ადმინისტრაციული შენობის გარე ფასადისა და ფოიეს რემონტისთვის; მინი-სტადიონის მოწყობისთვის _ 3 500 ლარი; საბავშვო ბაღისთვის ინვენტარის შესაძენად _ 2 000 ლარი; წყლის მილების წერტილოვანი შეკეთებისთვის _ 2 400 ლარი; სასაფლაოს შემოღობვისთვის _ 8 500 ლარი; ნაპირსამაგრი სამუშაოებისთვის _ 4 000 ლარი; საყანე ფართობებში მისასვლელი გზის რემონტისთვის _ 2 496 ლარი; ჭაბურღილის მოწყობისთვის _ 7 000 ლარი.
სოფელ ოზურგეთში სპორტული დარბაზის მშენებლობისთვის პროგრამით გათვალისწინებული 27 357 ლარი გადაანაწილეს შემდეგი პროექტების დასაფინანსებლად: სასაფლაოს ღობის მოწყობა-შეკეთება _ 1 000 ლარი; საბავშვო ბაღის შენობის შეკეთება _ 2 500 ლარი; 2 ერთეული არსებული სპორტული მოედნის მოწყობა _ 10 000 ლარი; მგზავრთა მოსაცდელის მოწყობა _ 2 000 ლარი; გარე განათების მოწყობა _ 2 500 ლარი; სანიაღვრე არხის გაწმენდა _ 2 000 ლარი; ადმინისტრაციული და ამბულატორიული შენობის შეკეთება _ 1 557 ლარი; კომპიუტერული ტექნიკის შეძენა _ 2 000 ლარი; 2 ერთეული ძრავიანი შემასხურებელი აპარატის (“სოლო 423”) შეძენა _ 3 300 ლარი; სოფლის ცენტრში გამწვანების ზოლის მოწყობა _ 500 ლარი.
სოფელ შრომაში ხიდის მშენებლობისთვის გამოყოფილი 14 882 ლარი გზების შეკეთებისთვის გადაიტანეს.
საკრებულოს თავმჯდომარის ალეკო მამეშვილის განცხადებით, სოფლის პროგრამებთან დაკავშირებით, წელს პირველად, საკრებულოს საინფორმაციო-ანალიტიკური სამსახურის განყოფილებას დაევალა პრობლემების კვლევა იმ სოფლებში, სადაც ცვლილებები გახორციელდა.
სახელმწიფო შესყიდვების გეგმაში შემავალი ერთ-ერთი მუხლი, რომელიც 23 000 ლარის ფარგლებში სკვერის მოწყობას ითვალისწინებდა, 7 400 ლარით შეამცირეს; 900 ლარით გაზარდეს მუნიციპალიტეტის საპროექტო სამუშაოებისთვის გამოყოფილი ხარჯები.
საკრებულოს მცირეფასიანი საქონლის შესყიდვის ხარჯებში მიღებული ეკონომიიდან, საკრებულო, მობილური ტელეფონის (რომლის ღირებულება 590 ლარია) შეძენას გეგმავს. პრესის მომსახურების ხარჯი 330 ლარით გაიზარდა; საკრებულოს სხდომათა დარბაზის რემონტი 3 000 ლარით შემცირდა, ხოლო აუდიტის მომსახურების ხარჯი 1 400 ლარით გაიზარდა.
სოციალური დახმარების პროგრამიდან _ მუხლი “მატერიალური დახმარება შვილის დაბადებისას”, შემცირდა 15 850 ლარით, საიდანაც 10 700 ლარი უფასო სასადილოს დაფინანსებას დაემატა.
საკრებულოს დღის წესრიგში ერთი მეტად უცნაური ჩანაწერიც ვნახეთ _ ოფიციალურ დოკუმენტში წერია, რომ “კულტურის სამსახურის ხარჯებში ნაჩვენები გაანგარიშების თანახმად ელჩაიდნის ნაცვლად შეისყიდიან ტელევიზორს, ანტენასა და დისტანციური პულტს”(?!).
ახალშობილებისთვის გამოყოფილი თანხის შემცირების საკითხს შეეხო სოფელ მელექედურის მაჟორიტარი დეპუტატი “ქრისტიან-დემოკრატიული მოძრაობიდან”, ავთო ხინთიბიძე. მისი თქმით, სოფელში შობადობამ საგრძნობლად იკლო, რაც ძალიან დიდი პრობლემაა:
_ რისთვის გვინდა ეს ყველაფერი, თუ სოფელში ახალშობილები არ იქნება? მათ ოჯახებს დახმარება უნდა. მე მირჩევნია, ხუთი ბავშვი დაიბადოს მელექედურში, ვიდრე გზა ვხრეშო და მერე ხრეში წყალმა წაიღოს, _ აღნიშნა მელექედურის მაჟორიტარმა.
ამ სიტყვებს საკრებულოს თავმჯდომარის მკაცრი რეპლიკა მოყვა:
_კარგით ახლა, მოხრეშვას და მორეცხვას… ცოტა…
ამის შემდეგ, საკრებულოს თავმჯდომარემ მაჟორიტარებს ისევ მკაცრი ტონით მიმართა:
_ კატეგორიულად გთხოვთ რწმუნებულებს და მაჟორიტარებს, რომელთა სოფლებშიც მოხდა ცვლილებები, ხალხის მოთხოვნა მაქსიმალურად გაითვალისწინეთ.
მამეშვილის ინფორმაციით, საკრებულოს საფინანსო საბიუჯეტო კომისიის და გამგეობის საფინანსო სამსახურის წარმომადგენლები, მუნიციპალიტეტის ტერიტორიაზე აიპ-ების საფინანსო ორგანიზაციული შემოწმებას განახორციელებენ:
_ შესაბამისმა კომისიამ დასკვნა უნდა დადოს თითოეული აიპ-ის საქმიანობის შესახებ, როგორც ორგანიზაციულ, ასევე საფინანსო ხარჯებთან დაკავშირებით. ეს პერმანენტულად გაგრძელდება, თუმცა, თავდაპირველად ეს შეეხო იმ აიპ-ებს, რომელთა ბიუჯეტი 100 000 ლარს აღემატება, _ აღნიშნა მამეშვილმა.
