ბატონო გიორგი, თქვენს გაზეთში (#68, 29 აგვისტო, 2011 წ.) გამოქვეყნებულ წერილთან _ “გურია ახალი სკანდალის მოლოდინში”, დაკავშირებით გვსურს განმარტება გავაკეთოთ.
წერილში ნათქვამია, რომ თითქოს ლანჩხუთის მუნიციპალიტეტის გამგებლის, გიორგი გოგუაძის საქმიანობით პროკურატურა დაინტერესდა და ის ინდმეწარმეები დაიკითხნენ, რომლებმაც ბოლო სამი წლის განმავლობაში სოფლის მხარდაჭერის პროგრამის გახორციელებაში მიიღეს მონაწილეობა.
სრული პასუხისმგებლობით ვაცხადებთ, რომ ეს ინფორმაცია არ შეესაბამება სიმართლეს _ სამართალდამცავ ორგანოებს მუნიციპალიტეტის გამგეობისთვის არ მოუმართავთ და საფინანსო სამსახურიდან საბუღალტრო საბუთების გადაცემა არ მოუთხოვიათ.
რაც შეეხება სამხარეო ადმინისტრაციაში გამართულ თათბირს, მუშა შეხვედრა მუნიციპალიტეტის სამსახურების ხელმძღვანელებთან, სხვადასხვა საკითხის აქტუალობიდან გამომდინარე, პერიოდულად იმართება.
ლანჩხუთის მუნიციპალიტეტის საზოგადოებასთან ურთიერთობისა და ინფორმაციის სამსახური
რედაქციისგან: სტატიაში მითითებული იყო, რომ ამ ინფორმაციას პროკურატურასთან დაახლოებული, საკმაოდ ინფორმირებული წყარო გვაწვდიდა. ჩვენ ხელმეორედ გადავამოწმეთ ინფორმაცია და წყარომ, რომლის ვინაობას მისივე თხოვნით არ ვახმაურებთ, კიდევ ერთხელ დაგვიდასტურა მისი ნამდვილობა. უფრო მეტიც, როგორც გვითხრეს, პროკურატურამ შესყიდვების სააგენტოში გაგზავნილი კვარტალური ანგარიშები ამოიღო, რომელსაც გამგეობაში არსებული ხელშკრულებებს და ანგარიშფაქტურებს შეადარებენ. პროკურატურის მიერ უკვე დაკითხულია რამდენიმე ინდმეწარმე, რომლებთანაც ერთ პირთან მოლაპარაკების გზით, ხელშეკრულებები იყო გაფორმებული სოფლის პროგრამის პროექტის ფარგლებში. გარდა ამისა, ჩვენ ვფლობთ ინფორმაციას, რომ მსგავსი ტიპის შემოწმებას, წელს პირველად ატარებს გურიის გუბერნატორი (და ეს არ არის მუშა შეხვედრები), რომელიც შესყიდვების ჩამონათვალთან ერთად, ხელშეკრულებებსა და ანგარიშფაქტურებსაც შეამოწმებს. ამ ინფორმაციას, ჩვენთან საუბარში, ვალერი ჩიტაიშვილიც ადასტურებს.
სტატიაში მოყვანილი ფაქტები, რამდენიმე სანდო წყაროსთან გადამოწმდა. თუკი, ლანჩხუთის მუნიციპალიტეტის საზოგადოებასთან ურთიერთობისა და ინფორმაციის სამსახური აღნიშნულ წერილში მოყვანილ ფაქტებთან დაკავშირებით, “სრული პასუხისმგებლობით” აცხადებს, რომ მხოლოდ “ეს ინფორმაცია არ შეესაბამება სიმართლეს”, საფიქრებელია, რომ გურიაში ახალ სკანდალს იმაზე უფრო ადრე უნდა ველოდეთ, ვიდრე ამას ვარაუდობენ, რადგან როგორც წყაროები მოწმობენ, გურიის გუბერნატორის და ლანჩხუთის მუნიციპალიტეტის გამგებლის იდილია კარგა ხანია დარღვეულია და ჩიტაიშვილი ადგილობრივი ჩინოვნიკების შეცდომებზე თვალს ყოველთვის აღარ დახუჭავს.
