“კორუფციის ალბათობა მინიმუმამდე უნდა დავიდეს”

იგი მოვალეობის შესრულებას 23 აგვისტოდან შეუდგა, მანამდე კი “ტაო-პრივატ ბანკის” ოზურგეთის ფილიალის მმართველი იყო.

_ ბატონო ილია, როცა დეპუტატებმა თქვენს კანდიდატურას მხარი დაუჭირეს, აღნიშნეთ, რომ თქვენს წარსადგენად არც თუ სასურველი ფონი იყო. მინდა გკითხოთ, რას გულისხმობდით არასასურველ ფონში და როგორი ფონი დაგხვდათ მუნიციპალიტეტის გამგეობაში?

_ როცა მოხდა ის, რაც მოხდა ცოტა ხნის წინ ოზურგეთში, როცა ყოფილი გამგებელი პასუხისგებაშია და საზოგადოება სასამართლო გადაწყვეტილებას ელოდება, მგონი, არასასურველ ფონზე საუბარი სრულიად ბუნებრივია, იმის მიუხედავად, თუ როგორი იქნება სასამართლოს საბოლოო განაჩენი. თუმცა, ამ კონკრეტულ შემთხვევაში, მე უფრო ის ფონი ვიგულისხმე, რაც საკრებულოს დეპუტატთა შორის ხანგრძლივ, ცალკეულ შემთხვევაში, არაკორექტული ფორმით კამათს მოჰყვა და იმ მომენტისთვის ნამდვილად ზედმეტი ემოციით დამუხტა სხდომა. ემოცია კი ყველაზე ნაკლებად უხდება ისეთ ინსტიტუტს, როგორიც საკრებულოა, სადაც ვთვლი, რომ ნებისმიერი გადაწყვეტილება ცივი გონებით, მხოლოდ კონსესუსის გზით უნდა მიიღწეოდეს.

_ იქვე განაცხადეთ, რომ თქვენთვის აღნიშნულ თანამდებობაზე დანიშვნა ძალიან მნიშვნელოვანი და საპასუხისმგებლოა. გეთანხმებით, საკმაოდ რთულ პერიოდში მოხდა თქვენი გამგებლის მოვალეობის შემსრულებლის თანამდებობაზე დამტკიცება. ეს გავლენას ხომ არ იქონიებს გამგეობის შიდა და გარე სტრუქტურულ საქმიანობზე?

_ ცხადია, ცვლილებები იქნება, როგორც შიდა, ისე გამგეობის გარე სამსახურებში. აქ საკადროსთან ერთად, სტრუქტურულ ცვლილებებსაც ვგულისხმობ. ჩვენ შევეცდებით, ესა თუ ის რგოლი უფრო ქმედითი და ფუნქციურად დატვირთული გავხადოთ. ცალკეული საჯარო მოხელის მენტალობა იმ კონდიციამდე მივიყვანოთ, რომ ადამიანებს არ ჰქონდეთ განცდა, უსაქმურობის შემთხვევაში, სამსახურებს შეინარჩუნებენ. მესმის, რომ ამ განცხადებით ბევრს ჩემს წინააღმდეგ ამთავითვე განვაწყობ, მაგრამ ეს აუცილებლად გასაკეთებელია. ყველაფრის ამოსავალი კი იქნება კორუფციის ალბათობის დაშვების მინიმუმამდე დაყვანა, ფინანსური და საბიუჯეტო კონტროლის გამკაცრება, განსაკუთრებით იმ უწყებებში, სადაც ამის საფრთხე ოდნავადაც კი არსებობს. მე მინდა, ხალხთან მჭიდრო კონტაქტით მივიღო ესა თუ ის გადაწყვეტილება, ანუ უფრო მეტად ვიღო ყურად საზოგადოების შეკვეთა ხელისუფლების მიმართ.

_ პირველ რიგში, როგორ შეუდექით საქმიანობას, როგორც გამგებლის მოვალეობის შემსრულებელი? თქვენ საკრებულოს სხდომაზე არ წარმოგიდგენიათ თქვენი ხედვები ამა თუ იმ საკითხთან დაკავშირებით. თუ შეგიძლიათ, გაგვაცნოთ თქვენი სამუშაო გეგმა, როგორ აპირებთ იმ პრობლემების მოგვარებას, რაც დღეს მუნიციპალიტეტს აქვს?

_ ის, რომ გამგებლის მოვალეობის შემსრულებლის სტატუსი მაქვს, ოდნავადაც არ ამცირებს ჩემს პირად და თანამდებობრივ პასუხისმგებლობას. პირველ რიგში, საზოგადოების, საკრებულოსა და თუ გნებავთ იმ ადამიანების წინაშე, ვინც რეკომენდაცია გამიწია ამ თანამდებობაზე. რაც შეეხება თქვენს კითხვას, თუ ეს გულისხმობს ამ რანგში ჩემს პირველ აქტივობებს, გეტყვით, რომ აქ სათქმელი ჯერ-ჯერობით ბევრი არაფერია. არ მჩვევია კლიშეებით აზროვნება და მით უფრო, იაფფასიან ეფექტებზე გათვლილი მოქმედება. ვაკეთებ და მომავალშიც გავაკეთებ იმას, რასაც ამა თუ იმ კონკრეტულ სიტუაციაში სწორად და სამართლიანად მივიჩნევ. გეტყვით იმასაც, რომ თითოეული ჩემი ქმედების განმსაზღვრელი იქნება მხოლოდ ერთი რამ _ მეტი სიკეთე და კეთილდღეობა ოზურგეთსა და ოზურგეთელებს. მე, როგორც ოზურგეთის მუნიციპალიტეტის საკრებულოს ყოფილი წევრი, ამაზე მოტივირებული ისედაც ვიყავი, მაგრამ, დამეთანხმეთ, რომ ამ პოსტიდან მეტის გაკეთება შეიძლება და მე ამას შევძლებ.

_ როგორი მდგომარეობაა ამ ეტაპზე ბიუჯეტში?

_ 2011 წლის ბიუჯეტი დღეის მდომარეობით 10 574.0 ათასი ლარია; მათ შორის ტრანსფერი _ 7527.9 ათასი ლარი. შემოსავალი _ 2769.5 ათასი ლარი. შემოსავლების კუთხით შესრულება 68%-ია. ცნობისთვის _ შესრულება წლის ბოლომდე გარანტირებულია, რადგან მიწისა და ქონების გადასახადების ძირითადი ნაწილი ოქტომბერ-ნოემბერში შემოდის.

_ რა გეგმები და ხედვები გაქვთ იმ კუთხით, რომ ხალხის ფული თავად ხალხს მოხმარდეს.

_ მე ზემოთ ნაწილობრივ გავეცი ამ კითხვას პასუხი; გავიმეორებ, რომ ხალხის ფული ხალხმა უნდა განკარგოს და მასვე უნდა მოხმარდეს. ამ მიმართულებით სერიოზული ნაბიჯები საკრებულომ უკვე გადადგა, თუმცა, ყველანი ვხედავთ, კიდევ მეტი ღიაობაა საჭირო. ვფიქრობ, საამისო ეფექტური გზები მარტო ხელისუფლებამ არ უნდა ეძებოს. ეს ყველას საქმეა, მათ შორის, მედიისაც. თქვენი პარტნიორობა ამ შემთხვევაში, ძალზე მნიშვნელოვანია, რადგან გაქვთ საიმისო ბერკეტი, რომ ხალხის სურვილი, მისი ხედვები დროულად და სწორად მიაწოდოთ ხელისუფლებას.

_ გეგმავთ თუ არა საკადრო ცვლილებების გახორციელებას ან შტატების შეკვეცას?! თვალნათელია, რომ გამგეობაში გაბერილი შტატებია და ბიუჯეტის დიდი ნაწილი, სწორედ სახელფასო ფონდში იხარჯება.

_ ბიუჯეტის დიდი ნაწილი სახელფასო ფონდში არ მიდის. 78773 ლარი, ეს ის თანხაა, რომელიც 14 სამსახურის 229 თანამშრომელზე თვის განმავლობაში ნაწილდება (რაც, წლის განმავლობაში 945 276 ლარია. ავტ.) თუმცა, გეთანხმებით, რომ საკადრო პოლიტიკა გადასახედია. საკადრო ცვლილებების დაგეგმვა შეუძლებელია, თუ არ შეისწავლე, რომელ თანამშრომელს რა ფუნქცია აკისრია და რამდენად დატვირთულია იგი. აუცილებლად უნდა ვიცოდე, ვინ როგორ ასრულებს დაკისრებულ მოვალეობას. გამომდინარე აქედან, რაღაც პერიოდი მჭირდება, ეს საკითხი სრულფასოვნად შევისწავლო, რომ ჩემს გადაწყვეტილებებში სამართლიანი ვიყო. დავძენ იმასაც, რეალურად არსებობს პროფესიონალი კადრების დეფიციტიც.

_ იმ შემთხვევაში, თუ გიორგი ტაკიძეს ბრალეულობა არ დაუმტკიცდა და თავის ადგილს დაუბრუნდა, ისევ სახელმწიფო სამსახურში დარჩებით, თუ კერძო სექტორს დაუბრუნდებით?

_ მე ყოველთვის ისე მოვიქცევი, როგორც საჭირო იქნება ჩემი ქვეყნისა და ჩემი ოჯახისთვის. მაქვს ფიზიკური და გონებრივი შესაძლებლობა, საკმარისი პროფესიონალიზმი საიმისოდ, რომ სადაც უნდა ვიყო, რა პოზიციაზეც, რიგითი ქართველის გასაკეთებელი მაინც გავაკეთო და საკუთარი ოჯახიც ღირსეულად, კაცურად შევინახო.