ოჯახის წევრებმა სახლიდან გამოსვლა ძლივს მოასწრეს. ხომერიკებმა დასახმარებლად მუნიციპალიტეტის გამგეობას მიმართეს.
_ სახლს ხანძარი გვიან ღამით გაუჩნდა. მთელ ოჯახს გვეძინა, შემთხვევით ჩემმა მეუღლემ გაიგო. ყველანი გარეთ გამოვცვივდით, სახლი მთლიანად დაიწვა. შიშველი ხელებით და იმით, რაც ტანთ გვეცვა, დავრჩით ღია ცის ქვეშ. საშინელი სტრესი და უბედურება გადავიტანეთ, თავშესაფრის ძებნას შევუდექით, რომ დროებით ვინმეს მაინც შევეფარებინეთ.
საგანგებო კომისიამ შეისწავლა ჩემი ოჯახის მდგომარეობა და უსახლკაროთა სიაში შემიყვანეს. პასუხიც მოვიდა _ ადგილობრივ ხელისუფლებას დაევალა 5000 ლარით დამეხმაროს, მაგრამ ჯერ არ ჩანს ეს დახმარება. გამგეობაში მითხრეს, ჯერჯერობით არანაირი დახმარება არ იქნებაო. მაგათ იმედზე ჩემი მტერი დადგა. თუ მეკუთვნის დახმარება, მომცენ _ თუ სახლს ვერ აღვადგენ, პატარა ოთახებს მაინც გავაკეთებ! უსახლკაროთა საქმეების შემსწავლელი კომისიის თავმჯდომარემ ლადო ქვილორიამ მირჩია, რომ “ენერგო-პრო ჯორჯიას” ვუჩივლო, რადგან ხანძრის გამომწვევი მიზეზი ელექტროენერგიააო. საგამოძიებო დასკვნაში წერია, რომ ხანძარი ძაბვის მომატების გამო არ გაჩენილა. თუ სახელმწიფო არ დამეხმარება, მთელი სიცოცხლე სხვის სახლში მომიხდება ცხოვრება. არადა, სამსართულიანი კაპიტალური სახლი მქონდა გაშენებული ეზოთი. ჩემთვის ეს დახმარება სასიცოცხლო მნიშვნელობისაა. მინდა, ჩემს შვილსაც ჰქონდეს საკუთარი ჭერი და თუ კი მეკუთვნის, რატომ არ უნდა მომცენ?! _ გვითხრა ქალბატონმა იზოლდამ.
ვახტანგ და იზოლდა ხომერიკების ოჯახი, დიდი ხანია სოფელ შრომაში ცხოვრობს, ჰყავთ ერთი შვილი და მოხუცებული დედა. იმ უბედური შემთხვევის შემდეგ, ქალაქში სხვის სახლში ცხოვრობენ, რომელსაც პატრონი ჰყიდის და გაყიდვის შემდეგ ახალი საცხოვრებელი უნდა ეძებონ.
_ გუბერნატორი დახმარებას შემპირდა. მითხრა, რომ მიქირავებს საცხოვრებელს, მაგრამ რით ვიცხოვრო და რით ვიარსებო აქ? ჩემი მეუღლე არ მუშაობს. თუ ხელისუფლებას ჩემი დახმარება უნდა, ხელი შემიწყოს ჩემს კერაზე დავბრუნდე და მივხედავ კარმიდამოს, წელში გავიმართები.
“გურია ნიუსი” ამ საკითხზე ოზურგეთის მუნიციპალიტეტის საკრებულოს თავმჯდომარეს ალეკო მამეშვილს ესაუბრა:
_ აუცილებლად უნდა მივიღოთ გადაწყვეტილება, რა ფორმით დავეხმაროთ უსახლკაროებს. ფულადი დახმარებები ეფექტური არ არის _ მძიმე სოციალურ პირობებში მყოფი ოჯახები მიღებულ თანხას მიზნობრივად არ ხარჯავენ და ისევ უსახლკაროებად რჩებიან. ვფიქრობ, უფრო ეფექტურია სახლი ჩვენ თვითონვე შევუძინოთ, თუმცა, ჯერ ბიუჯეტი უნდა დამტკიცდეს, რის შემდეგაც უფრო კომპეტენტურ და კონკრეტულ პასუხს მოგცემთ, _ გვითხრა მამეშვილმა.
